China Red 中國紅 - 迴轉自助餐餐廳

迴轉壽司相信大家都食過，咁迴轉中式點心大家又食過未呢? ^^


無論係China Red 或中國紅...個名都非常明顯係一間中國人開既餐廰!
阿V + Mr.T 一向對呃洋人既中式自助餐嗤之以鼻，
不過依間中國人開既自助餐餐廳有d野唔同........

首先佢係迴轉既~ 迴轉帶同迴轉壽司完全唔同.......
迴轉壽司只得一條開放式無遮無掩迴轉帶;
China Red 既迴轉帶分上下兩層 - 上層熱食 + 下層冷食，
兩層都有門罩住食物保溫 / 保冷~

上層熱食.........

下層冷食.........

甜品都係下層~

無論熱食冷食，每樣食物旁邊都有個中英對照既牌，告知客人係乜野食物~

客人見到想要既食物時，要拉開透明門先可以攞到食物~


OK......迴轉中式自助餐...幾特別~ 不過有d咩野食呢? 
英國一般中式自助餐來來去去不外乎果咋野......
咕嚕雞宮保雞咖喱雞豉椒牛椒鹽雞翼炸排骨春卷炒麵炒飯薯條蝦多士 - 即係洋人叫中式外賣經常會點果咋!
China Red 一樣有依咋野! 不過除咗依d之外，仲有d真正中國人鍾意食既野......

就係中 ‧ 式 ‧ 點 ‧ 心!!!!!!!! (左奶黃包 + 右叉燒包)

上面白雪雪係蒸奶黃包，依個係炸奶黃包~

雞包仔

連叉燒酥都有!

蝦餃...同香港真正既蝦餃差少少......因為佢加埋豬肉，唔算真正蝦餃~

粟米豬肉蒸餃

正常蟹子燒賣

另一種雞肉冬菇燒賣

雞肉煎餃

另一種唔記得係咩既煎餃...好似係韭菜.......

炸雲吞

炸魷魚鬚

蛋撻仔


連咸水角 + 蘿蔔糕都有...除咗蝦餃 + 炸魷魚鬚之外，樣樣中式點心都係好食既! 
可媲美依度既酒樓~ 碟碟細細碟，份量比酒樓飲茶少，
兩丁友人少少都可以食多幾種不同點心~ ^^
基本上阿V覺得齋食點心都抵!

除咗呃洋人既中菜 + 正宗中式點心之外，
仲有少量水準OK既日韓泰菜........

日式三文魚沙律

枝豆

日本野另外仲有壽司、刺生、手卷，不過午市只提供加州卷之類，
晚市先有更多種類~ (咁晚市每位價錢都貴d!)

泰式香葉牛

晚市先有既黑椒牛扒，細細塊好鬼cute XDDDD

都係晚市先有既凍大蝦


至於韓菜方面，so far 我去過兩次，只見過韓式炒雞肉 + 韓式炒豬肉，
兩個都幾好味，只係我掛住食唔記得影相........ =P

熱食帶上面有兩種中式湯 - 粟米雞湯.......

酸辣湯 (兩個湯都唔錯，但我自己比較鍾意酸辣湯~)


食物水準唔算係頂級果種 (始終係中式自助餐，仲想點?)，
勝在選擇多，每碟份量少，一餐可以食多幾種不同食物~

China Red 選址有點奇怪，並唔喺愛丁堡市中心內，
幸好係隣近巴士站 + 火車站，就算唔渣車都可以去到!


https://www.facebook.com/chinarededinburgh 
(雖然開咗張但官網仲未整好.......)