老翻V媽媽靚正餸系列 - 蔥頭雞煲

自從V媽媽開始用Whatsapp 之後，我地經常互傳晚餐相片.......

正當我唸緊今晚食乜餸...V媽媽傳來一張令人產生幻覺聞到香味既拿手雞煲相，即時令阿V口水大流~~~~~~~ 我又要整!!!!!!!!


1. 走地free range 雞肶2隻斬件(V媽媽用全雞斬件)，用胡椒粉、糖、雞粉和粟粉撈勻醃最少1小時。


2. 乾蔥頭6粒去衣(不用切開); 預備薑2片、拍扁蒜頭2粒、紅辣椒1隻切片和蔥絲少許。


3. 下油燒熱鐵鍋，先爆香薑片、蒜頭和乾蔥頭。


4. 下雞件爆炒至變金黃，灒紹興酒。


5. 加入紅辣椒片、少許生抽、老抽和清水兜勻，蓋上鍋蓋焗4至5分鐘至雞全熟，灑上蔥絲即成。