2014年3月4日星期二

開箱文: 黑鼎以外的另一選擇 - 法國De Buyer Mineral B Element 無塗層永久不沾鐵鍋 (附開鍋 + 試用過程)

La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element

最近有隻叫做"黑鼎"既台灣不沾鐵鑊好紅, 
睇完網上demo 後攪到鑊痴阿V心思思,
奈何此鑊不售海外.......
經我一輪網上明尋暗訪後, 
我發現咗一個有180多年歷史既法國鍋具牌子 - De Buyer~
(法文! 發音"Dee Bou yeh"~)

De Buyer 一樣有生產鐵鑊, 而且無論外型 + 造材 + 用法都同"黑鼎"一樣,
一樣係鐵鑊,一樣全無塗層,一樣係永久不沾!
觀乎網上用家對De Buyer 一致好評後,
急不及待叫Mr.T 即日訂一隻比我!!!


星期三晚網上訂,公司回電郵大約5個工作天會收到貨......
殊不知驚喜地星期五中午已經送貨來! 依d咪就叫做效率囉!! 讚~

一個大紙箱 + 幾呎長airbags 重重包圍隻鑊,
送貨packing 都咁認真一絲不苟,再讚!


La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
鑊包喺一個又大又厚既雞皮紙袋裡面,包裝簡約得來感覺高級classy! 愛~


法蘭西出世~


La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
我依隻係28cm round frying pan - 重2.17kg,鍋壁厚3mm~
鐵鑊一定係重架嘞,不過依隻我仲招架得來!


99%純鐵


La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
手柄有隻嗡嗡小蜜蜂標記~


La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
鑊面都有一隻......


大概係因為鐵鑊表面打咗一層有機蜂蠟防氧化!



用鐵鑊煮食前先要開鑊去咗層蜂蠟......

La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
1. 滾水落鑊滾數分鐘。


2. 將水倒去,用廚房紙抹乾,紙上深灰色就係蜂蠟!


La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
3. 倒入約1cm 油,開火加熱5分鐘,油會釋出一陣如蠟燭的氣味!


4. 小心倒去油,以廚房紙抹乾淨。


5. 白鑊加入肥豬肉(我用肥煙肉!) + 菜屑爆一會,要捽勻鑊面每一個位置~
箭咀所指好似燶咗有d黐鑊,但其實果d係殘餘蜂蠟來!


La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
6.  棄掉肥豬肉菜屑,以熱水 + 瓜菜布將鑊清洗乾淨 (唔需要用洗潔精!),抹乾後用廚房紙沾少許橄欖油抹勻鑊面,咁就完成開鑊架嘞!



之前一直都係用易潔鑊,只可用膠或木鑊剷.......

用鐵鑊唔再需要顧慮塗層既問題, 
雖然鐵鑊一樣可以用木鑊剷,
不過牡丹雖好終須綠葉扶持嘛...... 
所以收到鑊既第二日,即時去買枝不鏽鋼鑊剷來襯返個新鐵鑊! 嘻嘻~~~


La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
大家都係法國品牌,雖然Le Creuset 鑊剷來自祖國...咁都好相襯既~



鑊已開又有新鑊剷,急不及待要試吓用佢來煮野!
既然聲稱無塗層得來可以永久不沾,
咁就先試吓用來整最容易黐鑊既煎蛋啦.......

我落咗比平時用易潔鑊來煎蛋更少份量既油,
因為我想知道依隻鑊不沾程度可以有幾高......

第一個發現 - 依隻鑊熱鑊速度簡直可以用"極速"來形容!
尤其係我用緊出名慢熱既hotplate 爐頭~ 正!!


第二個發現 - 不沾不沾不沾不沾不沾不沾!!!!!!!!!!


La Cuisine De Veronica,V女廚房,鐵鑊,Iron Pan,De Buyer,De Buyer Mineral B Element
煎完第一隻蛋無加到油,直接煎第二隻蛋,一樣不沾不沾不沾不沾不沾不沾!
煎完鑊 + 鑊剷都乾乾淨~


兩隻蛋都有反面煎無穿黃架!


說明話隻鑊越用得多會變越深色,越深色不沾效果就會越好~
(我第一次用不沾效果已經超好咯喎! 仲可以越來越好?)


煮食後只用熱水瓜菜布清洗油膩抹乾,
原本銀光閃閃既鑊面已添上咗啡黑色既煮食痕跡,
個樣越來越pro~ 期待佢快d成個變成黑忟忟!


用後感:

1. 我食緊果兩隻煎蛋時,已決定要買多一隻深d既Country frypan(炒鑊);

2. 我相信我買埋隻炒鑊之後,真係可以以後都唔需要再買鑊!

3. 我決定將我現有已開封/未開封既易潔鑊,全數car boot sale 賣鬼哂去! (Well...我應該會留返隻Tefal Red Spot 炒鑊以備不時之需既~)

4. 什麼鑽石鑊陶瓷鑊雲石鑊氣墊鑊...通通全部同我彈埋一邊!




De Buyer Official Website: http://debuyer.com






150 則留言:

  1. 嘩,又有開箱文睇~~唔睇由自可,一睇一燒到我條買鍋/鑊癮~~死得~~又想買添! 你想買多隻既Country Pan,係咪有D好似中式鍋/鑊咁呢? 係咪呢種呀? -->http://www.amazon.ca/Buyer-Mineral-Element-Country-Handles/dp/B00462QP2U/ref=sr_1_fkmr0_2?ie=UTF8&qid=1393985616&sr=8-2-fkmr0&keywords=DeBuyer+Mineral+B+Element+Country+Cheff+Iron+Pan%2C+Round

    回覆刪除
    回覆
    1. 係呀~ 其實依隻用來炒野都OK,因為鑊面都夠大,而且我地得兩丁友嘛!
      不過如果炒多少少,都係用返炒鑊好d! 依幾日我日日都用隻鑊,越來越鍾意,所以決定買多隻炒鑊

      刪除
    2. E~~你真係好衰架…成日都介紹D咁正既野比大家~~~真係想唔買都唔得!! 琴日上網見到有local seller 賣$40 for 隻11",我估就係你果隻…超抵呀~~所以今個weekend就有新野用~~Happy~~如果買隻炒鑊,你會買幾大呀? 大果隻成12",好似好大,個handle又長~~但細又好似太細好難選擇呢~~

      刪除
    3. 真係多謝你既介紹呀~~我前兩日開完鑊,今日用左來煎魚,正呀~~一D都唔痴底,傳熱又快...

      刪除
    4. 唔洗客氣! ;;) 我越用越鍾意隻鑊! weekend 再網上訂咗隻28cm 深炒鑊,好心急想快d送來~ ~X(

      刪除
    5. 此留言已被作者移除。

      刪除
  2. 好正咁,我用易潔一年就要轉。重嗎?我隻手好易整到

    回覆刪除
    回覆
    1. 其實易潔鑊用法正確的話,都可以用好耐,但就一定唔會永久,始終有一日會玩完~
      我依隻28cm frying pan 2.17kg,其他款式重量妳可以喺website 裡面搵到!
      鐵鑊比易潔鑊重好多架嘞! 熟鐵已經無生鐵(cast iron) 咁重~

      刪除
    2. 樓下有位blog友話上海街聯品企業有各款De Buyer 賣! 不妨去昅昅試試重量~ ;;)

      刪除
    3. 多謝你既info 哩到無comment alert email真係有D唔方便。
      (遲來既reply)

      刪除
    4. 妳想收到回應通知的話,每次留言後剔咗右下角"通知我",咁就會收到架嘞

      刪除
  3. 對於第二點,係未有所保留呢....XDDDDD
    de buyer真係好堅喎,搞到我都心思思添....

    B媽

    回覆刪除
    回覆
    1. 哈哈~~~~ B媽妳真係醒! 所以妳都見我講得好有保留!! =))
      如果我買埋炒鑊後再買鑊,應該都係會De Buyer! :-bd

      刪除
  4. 好正喎...個樣仲好pro, 好like呀! 我隻易潔鑊就快打柴, 好想買你呢隻呀... 不過寄到黎香港可能好貴...

    回覆刪除
    回覆
    1. 妳去eBay 搵吓吖! 我見eBay 有d seller 寄interational 架!
      妳搵一咋慢慢比較吓郵費,平過黑鼎~

      刪除
    2. 樓下有位blog友話上海街聯品企業有各款De Buyer 賣! ;;)

      刪除
  5. 對你介紹個鑊非常有興趣亦打算買,不過可否幫我度下隻鑊高度,由外面直度,怕太淺炒嘢時容易走出,謝謝妳幫忙

    回覆刪除
    回覆
    1. 依個係frying pan - 煎pan,我個人用來炒野覺得OK,因為28cm 平面夠大,而且我地人少炒得唔多~
      不過想炒多少少最好都係用炒鑊款 - 所以我先話要買多隻Country frypan!
      炒野妳最好揀依款:http://www.amazon.ca/Buyer-Mineral-Element-Country-Handles/dp/B00462QP2U/ref=sr_1_fkmr0_2?ie=UTF8&qid=1393985616&sr=8-2-fkmr0&keywords=DeBuyer+Mineral+B+Element+Country+Cheff+Iron+Pan%2C+Round

      刪除
  6. 越來越黑, 越來越不沾! 好神奇啊! 一定有鑊氣好多.

    回覆刪除
    回覆
    1. 其實同舊式圓底中式炒鑊原理一樣之嘛! 鐵鑊炒餸的確好有鑊氣~

      刪除
  7. 回覆
    1. 妳search De Buyer 會搵到好多online shops / ebay / amazon 都有得賣

      刪除
  8. 呢篇開箱文真係好正~!!! 呢個生鐵frypan看來好得你歡心~


    講開煮野食,你有冇聽過銅鍋, 上年有一排見好多Blogger 話銅鍋煮野食點好點好~
    著點我都想買...但知道原來越用得多要保持佢光澤就要定期用特別野清洗,我就卻步~

    回覆刪除
    回覆
    1. 依隻唔係生鐵鑊,係熟鐵鑊~ 生鐵質太脆,鍋柄唔可以打窿上窩釘架!
      依隻鑊的確係我用過最好既鑊! (網上好多用家都係咁講!!) 所以我先決定買多一個炒鑊~

      銅鍋我3年前已經買咗一個! http://happymrst.blogspot.co.uk/2011/01/2011-2011129-30_31.html
      傳熱一樣係好快! 不過copper 太貴,唔捨得買copper 鑊......
      其實我唔明點解咁多人想keep 住d 煲煲餐餐新蔟蔟既樣? 又話要買乜買物去抹,有d仲誇張到收埋唔捨得用...我買廚具真係會用先會買,我唔介意廚具外表變舊,所以我無買專用清潔劑來清潔個銅煲

      刪除
  9. 回覆
    1. 我都唔信! :)) 所以我話"可以以後都唔需要再買鑊"...但我無話唔再買! =))

      刪除
  10. 嘩,好吸引呀,心郁郁好想買隻返屋企~~

    回覆刪除
    回覆
    1. 網上好多De Buyer 用家用後評語都話 - "once you use their fry pans for cooking meats you'll never use anything else"...包括我自己在內! :-bd

      刪除
  11. 嘩, 以上位位朋友對隻鑊都咁有興趣. 阿v, 我都不例外啊!!!
    睇落又幾好用, 最好是不沾! 等我又諗諗 去search......買唔買

    回覆刪除
    回覆
    1. De Buyer 喺法國有180幾年歷史,80年代開始法國好多餐廳酒店都用佢地既廚具!
      暫時我網上睇咁多reviews 都係有讚無彈,我用咗一次已經愛上咗隻鑊 + 決定買多隻!! :D

      其實要無塗層又不沾唔一定要買佢,舊式圓底果種中式熟鐵鑊一樣係無塗層又不沾,只係我無火煮食唔用得圓底鑊

      刪除
    2. Hi Chef V, I was like you shopping for the ultimate pot & pan. But after finished (actually, still have few courses to go for the certificate) culinary training, I found the commerical restaurant cookware is the best. I wish I broken my current & stock cookware asap!!! LOL de Buyer no question is the best, a bit of pricey thou. Cheers, K

      刪除
    3. i totally fell in love with De Buyer after 1st use! i wish i'd found it sooner so i could have saved soooooo much money! (well Mr.T's money! haahaa~~~~) from now on, if i ever buy any more pans again, they have to be De Buyer~ :x
      have you tried ebay or amazon? not too pricey for a real good quality frying pan which can last for a lifetime la! cheaper than 黑鼎 (made in Taiwan) ;)

      刪除
    4. Oi Ling~ 樓下有位blog友話上海街聯品企業有各款De Buyer 賣! ;;)

      刪除
  12. 燒著左啦, 己經上網訂貨, 好期待!! 係咪要好似cast iron咁,每次用完都抺乾上油??

    回覆刪除
    回覆
    1. 我都訂咗隻深鑊嘞! :D
      除咗第一次開鑊後我有抹乾上油,之後我煮完野只係用熱水洗乾淨抹乾咋! (其實我連cast iron 都係咁!) 最緊要唔好用洗潔精 + 唔好浸隻鑊

      刪除
  13. 回覆
    1. 自從有咗依隻鑊之後,我發現自己好鍾意食煎蛋! =))

      刪除
  14. 我買了12吋炒镬,用了3天,煎蛋很一流不沾,同時煎豆腐也不沾。不過炒河粉有些沾,可能要用多一些時間看如何。我是在九龍上海街,联品廚具店,買的。

    回覆刪除
    回覆
    1. Thank you very much Sze Ming Cheung! :-bd
      我用咗一星期唔夠,煎蛋炒菜都好正,尋日再訂咗隻28cm 炒鑊~

      刪除
  15. 我係買12吋De Buyer Country Fry Pan, 联品有De Buyer多款pan賣。

    回覆刪除
    回覆
    1. 請問在聯品幾錢呀?

      刪除
    2. 最初在Pan-handler買了一隻Matfer 28cm black steel fry pan,愈用愈好用,炒粉麵也不沾,但沒有大的深镬才買De Buyer. 兩隻镬是Matfer好用些

      刪除
  16. V記帶旺左聯品,店員講呢幾日好多人來搵 de buyer

    回覆刪除
    回覆
    1. 哈哈~~~~ 有朋友今日去買咗2隻,佢都話店員話依隻鑊以前無人吼,但依幾日好多人去買! 仲有人打電話去留4隻~ =))

      妳呢? 妳有無買到??

      刪除
    2. 買左32cm炒鑊,仲玩緊開鑊過程

      刪除
    3. :-bd 32cm 炒鑊多隻耳仔~
      我weekend 訂咗隻28cm 炒鑊,仲等緊送貨來.......~X(

      刪除
    4. 留4隻咪係我囉,聯品多謝你既推介就真!!

      刪除
    5. 原來係你....匿名.... 希望你會領略到用依隻鑊既樂趣!
      4隻都係你自己架? 定幫埋其他人買埋??

      刪除
    6. 自己+幫朋友同家人買,我用開黑鼎的,手上的剛剛也讓左比家人了!暫時比較唔到2者分別。但以開鑊計,黑鼎較方便!想請問de buyer煮食完後變成污穢貓,唔需要洗擦佢嗎??我意思係尤得佢呀??謝謝你的解答!

      刪除
    7. 黑鼎本身黑色當然唔會變污穢貓~
      至於清洗只需用百潔布 + 熱水(我用滾水!),洗乾淨油漬就可以,鑊越用顏色會越變黑,越會不沾!
      你可以睇上面YouTube 條片,最尾有show 隻鑊會變到黑忟忟咁,但會更好用更不沾

      刪除
    8. Hi, 咁黑鼎可以喺邊度買呢?thx

      刪除
  17. 昨天煮了番茄煎封紅衫魚,無錯煎魚真的不沾,但煮完了番茄,這隻镬的黑色变得淡色了,要重新開镬多次。

    回覆刪除
    回覆
    1. 我估可能因為你隻鑊都仲係新,果層天然不沾層養得未夠"厚"...蕃茄又係酸性食物,所以蝕薄咗天然不沾層!
      有人買咗個鐵鑊返來會先養鍋,不過我無 + 暫時覺得都唔洗,因為我幾乎日日用,黑色範圍越來越大 + 均勻~ 我唸比d耐性勤力用耐d,儲夠天然不沾層就會好好多~ ;;)

      刪除
    2. 剛剛ebay訂了28mm costs me HK$400. 多謝推介.

      刪除
    3. 此留言已被作者移除。

      刪除
    4. 联品的28cm country pan 賣HK$589. ebay 賣得好平。
      今日炒米粉,一点也不沾又有镬氣,真的好久無這個效果的感受。

      刪除
    5. Kent 買既28cm 係咪即係我依篇blog 果隻? 平過我買啊......

      刪除
    6. 係呀, 我買時eur36,現在貴了.但仲等緊寄嚟.
      http://www.ebay.com.hk/itm/MINERAL-B-POELE-28-CM-DE-BUYER-/221378200729?ssPageName=ADME:R:RC:HK:1123

      刪除
    7. 36 Euros 幾抵喎!
      我喺英國一間廚具店既online shop 買,連埋郵£36,兌返滙率都係你買得平過我! 平成80蚊港紙....

      刪除
    8. 邊間online shop? 可否推介一下?

      刪除
    9. 你買得平過我買喎! 仲要推介? 你都住喺英國既咩?
      我唔想等咁耐所以先喺英國online shop 訂貨~
      anyway 我喺依間訂既: http://www.fridgefreezerdirect.co.uk/

      刪除
    10. 我和妳一樣,都是心急的人,只想知多一個渠道.
      多謝推介

      刪除
    11. 其實喺ebay or Amazon 買都會平過依d online shop,所以除非你都住喺英國既啫,否則根本無原因要喺UK online shop 買

      刪除
  18. 炒米粉可以話係終極測試.

    回覆刪除
    回覆
    1. 今日啱啱收到隻28cm 深炒鑊! 開完鑊後我都試吓炒米粉~ :D

      刪除
  19. 請問可否告知聯品電話?因我剛打去上海街聯品佢話無呢個牌子嘅鑊賣呀

    回覆刪除
  20. 联品的电話是23744500,今日經过联品見有位女仕一次过買了三隻。

    回覆刪除
  21. 謝謝!剛打去問32cm炒鑊已賣哂,要4月返貨😪

    回覆刪除
  22. 下午售貨員話32cm炒鍋只剩一隻,可能在你至电前給人買了。那就等等。

    回覆刪除
  23. 咩嘢叫瓜菜布? 係唔係唔好用洗潔精?

    回覆刪除
    回覆
    1. 瓜菜布即係百潔布~
      無錯,洗鑊時唔好用洗潔精

      刪除
  24. 其實鐵鑊係可以用洗潔精洗,只係怕洗走D油而生鏽,只要每次用洗潔精洗完抺乾,再用爐火徹底烘乾,再簿簿掃層油就一定唔會生鏽,我媽咪咁多年油都冇掃都冇話生鏽,就咁用熱水沖洗亦無不可,睇個人接受程度

    回覆刪除
    回覆
    1. 其實鐵鑊係可以用洗潔精洗,只係怕洗走D油 <// 依點應該好多人都知

      一直以來我見所有用鐵鑊既人都係唔用洗潔精洗既~
      De Buyer 官網亦唔建議用洗潔精,
      我用熱水洗完全無問題,洗潔精始終係化學野,我睇唔到要用洗潔精既需要

      刪除
  25. 已經毒發, 睇完就仲加想快d 到手添.......

    回覆刪除
  26. 我係聯品訂左個28寸鈔獲終於反黎啦!頭果幾日掌握得唔係太好好好沾又覺得好鬼重,日日用完用快白潔布擦到佢白雪雪,擦到手都痛晒,真係有d嫌棄佢。不過用到第四日,先明白咩叫愈黑愈不沾道理,千其唔好擦甩果d黑色,終於尋晚煎魚完全不沾,魚皮仲脆卜卜靚仔到呢........我依家都中左毒,超 like,多謝Mrs.T 好介紹

    回覆刪除
    回覆
    1. 黑色部份要攪清楚係太熱燶鑊定係天然不沾層啊! 如果係燶鑊,黑色部份會凸起不平 + 鞋手; 如果係天然不沾層摸落係平滑既~ 凸起就要擦甩,平滑就keep 住,會越來越好用架! ;;)

      刪除
    2. 我想問下我隻鑊用一次後個底無野,但個邊就黑左,係咪開鑊唔夠徹底?可以點做? Thank you!

      刪除
    3. 你只用咗一次個底未必咁快會變黑架,唔同爐既種類或火力都會有關係~
      你開鑊時有無開埋個邊? 你煮野有無黐鑊? 如果無黐就無問題啦!

      刪除
  27. 想請教下, 是否 ebay 包運費?https://m.ebay.com/pay?itemId=331065497731&trxId=1003601103014&qty=1

    回覆刪除
    回覆
    1. 妳條link 去ebay 主頁果喎,係咪包運費妳要睇返個別item 裡面既資料,唔同seller 包唔包運費 / 運費多少都唔一樣~
      P.S. 我3隻都唔係ebay 買既

      刪除
    2. Sorry for the invalid link.
      Would you pls. refer your eBay link ?
      I want to buy a 28 cm frying pan.
      Many thanks.

      刪除
    3. 我上個回覆已經講咗 - 我3個都唔係ebay 買!
      我隻28cm 係英國一間供應餐廳廚具用品既網上店買,如果妳要link 我都可以比妳,不過唔係ebay link

      刪除
  28. Thanks a lot for the reply.
    Sorry 睇錯了上面你的 reply. => 3隻都唔係ebay 買既 :P
    Would you pls. give me the link about this "我隻28cm 係英國一間供應餐廳廚具用品既網上店買" ?
    I went to Shanghai Street 聯品, 訂貨須要 1-2 個月才有貨, 而且巴黎鐵塔版貴好多呢

    回覆刪除
    回覆
    1. 一,我住喺英國先喺依間網上店訂,佢地應該唔做海外order; 二,佢地做餐廳用具,無巴黎鐵塔款賣

      雖然我覺得聯品d人好無禮貌,不過妳住喺香港買De Buyer 係最好既途徑,有乜問題隨時可以換
      若妳堅持想網上訂,妳可以試吓Amazon

      刪除
  29. Thanks a lot for the reply.
    我某日在聯品路過買了一個 32 cm frying pan.
    非常好用

    回覆刪除
    回覆
    1. You're welcome~
      32cm 好重啊! 用時要小心手腕啊~ L-)

      刪除
  30. 之前睇完你個post一直都心郁郁想買, 今日終於買左啦!!! 期待之後試用

    回覆刪除
    回覆
    1. 開鑊要開得徹底d乾淨d,咁就第一次用都已經好好用架嘞! :) enjoy your new pan~

      刪除
  31. 請問知唔知澳門有冇得買GA?
    EBAY未用過唔係好識用....
    想入手但唔知仲有冇其他途徑///////

    回覆刪除
    回覆
    1. 我唔知澳門有無得賣,我估應該無,因為我有澳門朋友都係ebay 訂既~
      唔用ebay 的話,你可以過香港去上海街聯品買,最好先打個電話去問問有無現貨
      23744500

      刪除
  32. 多謝介紹,今日去聯品買左28CM country pan, 價錢已經上漲到669!
    好彩第一次煎蛋已經唔黏底,好滿意^^
    p.s. 佢地返左巴黎鐵塔版~

    回覆刪除
    回覆
    1. 唔客氣~ ;;)
      哇! 幾個月時間加價咁勁.....
      其實巴黎鐵塔早兩個月我返香港時,佢地已經入咗貨嘞~

      刪除
  33. 大家用落覺唔覺好大煙? 係唔係我開得太大火既關係定係鍋未養成?
    p.s. 我用同之前既特福比較,同樣火力,出煙多左~

    回覆刪除
    回覆
    1. 首先特福係鋁製易潔鑊,De Buyer 係碳鋼鐵鑊....易潔鑊無鐵鑊咁易受熱,所以用De Buyer 時應用比特福較細既火力~
      大煙係代表你隻鑊已燒得過熱,食油燒燶咗先會出煙~ 你可以先用大火加熱隻鑊,見到油有油紋就要調細個火
      我另一篇blog 有提到用依隻鑊要注意既野:
      http://happymrst.blogspot.co.uk/2014/03/de-buyer-mineral-b-element-country.html

      刪除
  34. 妳好, 我隻炒鑊已變黑到好此示範那隻, 但每次洗完用油抹時, 張紙都是啡色,係唔係我洗唔乾淨

    回覆刪除
    回覆
    1. 有可能係油漬,又有可能係生锈~ 試吓盡量用最熱既水去洗,洗完一定要抹到好乾先再抹油,用多幾次睇吓會唔會改善

      刪除
  35. 回覆
    1. De Buyer 係牌子名,佢有好多唔同質料既系列!
      第二個系列我唔清楚,不過依個Mineral B 可以

      刪除
  36. 今日煎蘿蔔糕,塊塊香噴噴,嗰面仲脆卜卜……仲用好少油添
    但最重要…………是無黐鑊!
    好耐無試過煎嘢煎得咁開心啦!

    回覆刪除
    回覆
    1. 我煎蘿蔔糕年糕都係用依隻鑊,真係好好煎! :-bd

      刪除
  37. 想問問是凍鑊加油還是熱鑊加油?

    回覆刪除
  38. 我買了28cm炒鑊,跟以上程序開鑊只是開始時沖多一次滾水。有以下問題想請教:
    1.沖第二次滾水時鑊面出現不均勻色,而且沒有復原
    2.完全開鑊后想用滾水沖一沖再煮食,但一抹仍是黑色,之后每次抹鑊仍是黑
    3.第一次煮蕃茄炒蛋蛋痴得很厲害,看以上留言說是酸性問題,之后煎牛仔骨下了得多油就沒痴鑊,我是否要再開鑊?
    謝謝!

    回覆刪除
    回覆
    1. 1. 鑊面出現不均勻色,而且沒有復原 <= 唔明妳既意思~ 正常開完鑊係會變色,隻鑊係會越用越黑,唔會復原既

      2. 開完鑊沖水後抹乾,廚房紙應該無色,仍有黑色應該係蜂蠟未去得乾淨

      3. 唔關事,鐵鑊一樣可以炒酸性食物,只要唔好長時間煮就無問題,我一樣係用DB來整蕃茄炒蛋,以妳既情況黐鑊有兩個可能性 - 妳隻鑊未開得夠有殘餘蜂蠟 / 鑊或油未夠熱就落食物煮

      最好再開多次鑊

      刪除
    2. 妳可以睇吓依篇,裡面有講用DB 幾個重點

      http://happymrst.blogspot.com/2014/03/de-buyer-mineral-b-element-country.html

      刪除
  39. Hihi 我睇完你介紹又買左呀 跟住你開埋鍋 但變左黑色呀 煎蛋有痴痴地 煎完牛扒又黑哂 唔知太大火定點 我可以黠做呀 有冇得救呀 thanks

    回覆刪除
    回覆
    1. 隻鑊煮完係會變黑色既,而且會越用越黑

      依篇裡面有詳細講隻鑊應該點用

      http://happymrst.blogspot.com/2014/03/de-buyer-mineral-b-element-country.html

      刪除
  40. 其實鑊外圍及外底有D生銹,可以不理?

    回覆刪除
    回覆
    1. 其實如果你保養到鑊面唔生銹,外圍外底一樣可以! 要隻鑊襟用好用就唔爭在保養埋出面
      先攪清楚 - 黃啡唔一定係生銹! 可能係油漬
      鑊乾身時用乾布或廚房紙抹黃啡位置,如果抹出黃啡就係生銹; 若抹出無色就係油漬
      油漬可以不理,但銹就最好清理保養返,因為就算只外圍都可能會唔小心落入食物

      刪除
  41. 唔知係咪處理得唔好,煎蛋都有少少,請問可以點補救?��

    回覆刪除
    回覆
    1. 煎蛋都有少少咩野? 黐鑊??
      你隻鑊用咗幾耐? 其實未必係關處理問題,可能係妳未摸索到火力問題!
      e.g. 鑊未夠熱落蛋 / 隻鑊太熱煎燶 / 太心急反蛋......
      多用隻鑊掌握一下火力,睇吓有無改善

      刪除
  42. 係黐鑊��…隻鑊用咗5次,炒肉無問題,係煎魚及蛋黐,我見到有少少煙便落鑊,等我再試下先,多謝回覆…另外想請教,如果生誘了有冇得補救?

    回覆刪除
    回覆
    1. 唔好等到油出煙先落鑊! 油出煙代表油燒燶咗,無益架
      另外煎炒應該用發煙點較高既油e.g. 粟米油
      見鑊起油紋已經可以落魚落蛋架嘞,同時要調低火力

      至於生咗銹你就用熱水 + 無皂鋼絲刷擦走銹漬,沖乾淨,徹底抹乾或烘乾再搽返生油保護
      如果你洗 + 存放方法正確,隻鑊會越用越靚唔會生銹既

      刪除
    2. 你要先攪清楚隻鑊果d係咪真係銹漬,定係隻鑊慢慢自然變黑
      開頭可能係啡啡黑黑咁既,依隻鑊越用會越黑,黑色係隻鑊build up 天然不沾層,
      唔洗擦到白雪雪乾乾淨淨既,否則會生銹生到阿媽唔認得

      我依篇有講用依隻鑊有咩要注意: http://happymrst.blogspot.com/2014/03/de-buyer-mineral-b-element-country.html

      刪除
  43. 另外想請教,隻鑊用完後係咪要即刻洗?如果煮完D餸放喺鑊入面幾個鐘會不會容易生銹?

    回覆刪除
    回覆
    1. 如果煮完D餸放喺鑊入面幾個鐘會不會容易生銹 <= 緊係會啦!
      依隻係炒鑊 / 煎鑊來,唔適合用來炆野或存放煮好既食物幾個鐘!
      我習慣煮完食埋餐飯就洗鑊

      刪除
  44. 多謝回覆,問題少女又嚟啦…之前我諗我保養得唔好,隻鑊巳生銹(用廚房紙抹係黃啡色),跟住起咗D銹再搽油保養,用紙抺只有油漬,但唔知點解每次洗完,搽油,用紙再試正常,但每次準備拿出來用時再用紙試抺就有黃啡色,每次用前都要洗,連續試過三次(其實我每次用後已抺乾再用火熱一熱等佢乾D先搽油),所以想請教高人有冇辦法再救救我

    回覆刪除
    回覆
    1. "每次拿出來用" - 妳收得好埋呀? 妳多唔多用?
      鐵鑊要常用先唔易生銹, 而且存放既地方要乾爽通風,廚房本身比較潮濕,煮食會產生蒸汽

      刪除
  45. 兩日一次…放喺廚櫃入面…

    回覆刪除
  46. 因為家傭問題,佢時常用鋼絲刷洗鑊,所以這隻可否這樣洗刷????

    回覆刪除
  47. 如果用了洗潔精,用完冇燒乾水,生了銹,有冇得攪????

    回覆刪除
  48. 啱啱買左番來開pan, 已經開咗Pan, 洗過, 但用紙抹pan底都會有的啡色既殘留物係張紙度,今晚煎魚同雞,洗淨再抹都係咁, 係咪我開得唔夠好呢?
    另外,係近個Pan裡面邊邊地方都有D燒乾油積系度,點樣可以清理呢?

    回覆刪除
    回覆
    1. 係近個Pan裡面邊邊地方都有D燒乾油積系度,點樣可以清理呢? <= 唔需要清理,依隻鑊係會越用越黑既,唔需要次次省到新既一樣

      刪除
  49. 仲有想請教下, 係咪每次用完,底面都要搽油? 我靜係搽煮食個面咋

    回覆刪除
    回覆
    1. 我幾乎日日用 + 依度天氣無咁潮濕 + 廚房保持空氣流通,所以我從來唔搽油
      如搽油搽煮食面得啦! 否則成隻鑊油淋淋.....個底洗乾淨後只抹得夠乾就唔會生銹

      刪除
  50. 如果煮完辣既餸,但唔用洗潔精,怕唔怕下一個餸都會辣?因為我屋企經常有家庭聚會,一時辣,一時唔辣,淨係用熱水同百潔布夠唔夠洗走辣味?

    回覆刪除
    回覆
    1. "鐵鑊唔用洗潔精清洗" - 並唔係只De Buyer 先係咁! 而係所有鐵鑊都唔用洗潔精洗
      如果真係有懷疑,不妨自己試吓! 無野好得過自己親身去試

      刪除
  51. I already forgot how I stumbled upon your website, but just wanner to say THANK YOU, THANK YOU!! I bought the exact same DeBuyer frying pan like yours, just 開鑊 yesterday and used it right away. I pan fry a salmon, result?... YUM YUM GOOD! The best pan fry fish I ever made.

    There are moments my eggs are sticked to the pan, ... Situation like this will happen and I agreed, it's because I am still in the learning process: I put a cold egg on a too hot pan. The more we use, the more we will understand "how" to use it, and the better it will serve us! :)

    After all, this is a very well made, sturdy pan that's well worth the money :) So happy about my purchase, and that's all thanks to you!

    回覆刪除
  52. 我買咗 5654.32 用了一個月,滾水洗完烘乾用廚房紙抹,仍是深啡色(如可比相你睇就好),請問是否正常?或是我開鑊不正確?因為第一次中大火乾燒8分鐘時白鑊沒有搽油。

    回覆刪除
  53. Happy mrs T 姐姐,
    請教 De Buyer鑊可否用來白鑊炒芝麻或羊腩,因不銹鋼鑊是不能用白鑊炒東西,是會釋放出毒素的。

    回覆刪除
  54. 请问你有没有用过Lodge的铸铁锅?唔知同De Buyer比较会如何?我用Lodge和Staub的珐琅铸铁锅炒菜,总觉得有铁腥味。

    回覆刪除

Related Posts Plugin for WordPress, Blogger...