99朋友既生日蛋糕 (2013年6月9日)

尋日(6月9日)99有朋自遠方來要盡地主之誼，

湊巧係其中一位auntie既生日，
於是一星期前99將生日蛋糕依個重任交咗比我........

平時整蛋糕送比屋企人或朋友，心意行頭;
客人比錢買我整既蛋糕，金錢掛帥(我指自己! );
不過整來送比99既朋友，就關乎99面子問題了!
所以有d緊張，怕買唔到新鮮材料......
怕一排無整蛋糕，手勢生疏咗整得唔好.......

99要求喺蛋糕上寫上有auntie名字既生日message，
我打算用朱古力牌寫生日message，
於是星期六先做好個朱古力牌~
殊不知超好天氣既星期六竟然來個30C高溫!

一直以來我整朱古力蛋糕裝飾都無特別調溫，
只係求其隔熱水坐溶朱古力就算，從來都無問題~
星期六天氣太熱無冷氣既我開衡哂風扇，
齋整個牌都滿頭大汗，仲要整咗3次先成功!!
頭2次朱古力攤極一係半溶唔肯set; set到但又泛白......
要到夜晚9點零鐘天氣涼返少少個牌終於成形~
(不過我亦因此明白到朱古力調溫既重要性，
於是順勢要求Mr.T送我一個chocolate melting pot!
衣嘻嘻~~~~~ )

我用早幾日用來整Pikachu cake pops剩低既黃色朱古力，
坐溶後倒喺膠片上攤薄待凝固成薄片，切出長方形，
然後用紅色糖霜寫上生日message，
再用彩色糖珠、糖花 + 食用金粉裝飾~


99預埋Mr.T + 我一齊同佢6位朋友食飯，
地點係Mr.T阿叔開既新城皇宮，
菜式非常豐富~
雖然Mr.T一早去買咗早餐比我食，
不過忙咗一個下午整蛋糕，我餓到肚打鼓........

一大盆薑蔥龍蝦~
龍蝦大隻又炒得夠乾身，啖啖肉夠哂鮮甜!

2大盆粉絲蒸帶子~
帶子新鮮爽甜，就咁用粉絲熟油 + 蔥絲蒸熟，好食到不得了!
99明智~ 因為我最怕用蒜頭豆豉去蒸帶子!
破壞哂帶子獨有既鮮甜味!!

白切走地雞~
雞細細隻肉好firm 好有雞味!

梅菜扣肉~
炆得好惹味，但豬腩稍嫌太瘦唔夠肥......

牛腩煲~
牛腩，係一樣我無辦法唔話自己整得好味d既食物! sorry.......

煎龍脷魚~

清蒸龍脷魚~

2條魚都好好味! 煎既香口，蒸既清鮮~
而且兩條魚都有大大孖魚春呢!

金銀蛋菠菜~
唯一一度我忘記夾來食既餸菜.........(太忙碌食其他野! )

仲有一大碟菜心，一張大枱擺滿哂!
豐富又好味既一餐~


飯後99示意Mr.T + 我攞個蛋糕出來，我帶咗碌火箭炮去點........
生日果位auntie本身不知情，所以佢好驚喜好開心~
當99告知個蛋糕係我親手整既時候，auntie更加驚喜，
一時間成枱人用手機對住個蛋糕影完又影!

其實大家本身食餸已經食到好飽，
不過非常比面地清哂成個蛋糕，
個個都讚我個蛋糕整得又靚又好味，所以我都好開心~

今次整依個蛋糕充滿挑戰!
除咗朱古力牌整咗3次先成功，
尋日天氣仍然好熱，雖然已一早雪凍咗忌廉，
但打起上來好有難度~
打得唔夠怕會溶; 打過籠唧花會唔靚 + 鞋口.........
幸好成品大家都食得開心，mission accomplished!


我99好趣緻.........
前一晚Mr.T返去幫佢整野，
佢竟然塞咗£50叫Mr.T轉交比我~
Mr.T已經話咗唔洗，但99堅持........
最終尋日我同99喺酒樓女廁玩完一輪"詠春推手"，
99先肯收返d錢!

雜果忌廉蛋糕做法請參考: http://blog.yahoo.com/_CGP6UH62KANBDKVGXW7MOFHWQQ/articles/77984