老翻V媽媽靚正餸 - 花椒冰糖炆鹹豬手 (阿V版)

上次返香港陪V媽媽買餸，PK超級市場鹹手大減價........




V媽媽買咗隻返去簡單地用冰糖炆到香軟爛熟，
至今令我念念不忘! 我話過一定要試吓老翻!!

1. 鹹手1隻拆去包裝，汆水10分鐘，撈起沖洗乾淨，用廚房紙抹乾。

2. 手掃上一層珠油，待5分鐘上色。(無珠油的話可用老抽!)

3. 燒熱少許油，將手煎至皮表面金黃微焦。


4. 將手放入炆鍋中，加入滾水至浸及手約一半。


5. 下冰糖約1個乒乓波份量和花椒1湯匙(視乎手大細自行調整份量!)，大火煲至大滾。


6. 蓋上鍋蓋，轉小火炆至皮肉鬆化，期間間中反轉手，以筷子插入手來測試是否夠鬆化。


7. 撈起手上碟，大火煮滾炆手的汁及試味，如有需要可下少許雞粉調味。


8. 勾粟粉水芡至汁稠，淋在手上。


9. 灑上少許鮮露即成。


NOTE

- 鹹手有無煙過都無所謂，不過要記住 - 隻鹹手要係生既!

- 炆手時間視乎手大小! 我依隻炆咗大約2粒鐘~

- 想炆到皮肉用筷子一篤就散，可以先炆1小時，熄火焗1小時，再開火煮滾後轉回小火炆多1小時。

- 反轉手時要溫柔! 否則就會好似我咁整爛塊皮.......

- V媽媽版無用花椒，因為佢唔鍾意花椒陣味! 依個花椒版係我自行多手加落去既，用邊個版本悉隨尊便!