我的第一條...Vintage Dress (2012年6月3日)

又一例證"Everything happens for a reason"...... 
話說上星期六(6月2日)我又走咗去南下~
原本Mr.T 會返Glasgow，
仲約定朋友第二日6月3日去BBQ，
殊不知6月2日Mr.T 臨時又要開會，
於是一道聖旨下來又召我到南下陪佢，
星期日既BBQ泡湯了!

星期日Mr.T 架車攞咗去service，
再加上落大雨，出入酒店要打的~
殊不知撞正個扮唔識路既司機兜路搵笨!
(去City Centre 都會唔識路?)
我同Mr.T 緊係唔會比佢搵笨搵到底啦， 
於是未到目的地我地都決定早d落車......
但就因為早咗落車，無意中比我地撞見一個vintage 賣物會!

最近睇電視見到好多人喺跳蚤市場用幾英鎊買舊二手野返來，
賣既同買既都唔知道係好野，
買家後來攞舊二手野上電視節目比專家鑑定後先知係寶來，
轉個頭攞去拍賣竟然可以賺皮幾兩皮野!
於是我地又走去
vintage 賣物會碰碰運氣睇吓會唔會搵到寶......

一入到會場就聽到強勁六、七十年代音樂，
仲有pair 著住古著既男女，完全唔理身邊經過既人忘我地起舞......
(最終佢地撞跌咗側跟一個掛住二手皮帶既貨架! )

個賣物會好細，只有約5、6個檔攤，
清一色全部賣vintage clothing、二手飾物 + 擺設~其實我同Mr.T 根本完全唔識睇寶定唔寶，
只係貪得意樣樣攞上手睇吓摸吓......
本來我對一套三件款式古典高貴，
疑似銀雕花既頭刷、手鏡 + 一個唔知用來擦咩既刷好有興趣，
套野款式類似"呔攤力"裡面阿Rose 用來梳頭果種.......

即係大約好似依套咁上下~
(P.S. 依套係我喺博物館影既，唔係賣物會果套!)

不過我一攞果套野上手，
發現髮刷上有好多灰白色既頭髮.......
 
嚇到我即時放返低!!


結果行完整個賣物會乜寶物都搵唔到! 
(又或者我地走寶.......)

殊不知比我發現咗依條寶藍色vintage dress! ♥

我一直好抗拒vintage clothing，更加從來未買過~
一來唔知上一手主人係咩野人; 二來我有嚴重潔癖!
不過依條裙非常新淨，而且質地 + 手工都好好~
初時係裙既質地先吸引我，
攞上手後發現雖然係條長裙，
不過腰身好細，似乎會啱我著喎! (其他衫全部好大件!!)
但裙上無size 標籤，而且對公主袖好似好闊...... 
老公幫我左度右度咗好耐， 
我都唔肯定係咪真係啱身! 
再加上方領 - 我一向著方領都唔好睇.........
搞到我心大心細! 
好在依個時候攤主話我知可以試身! 

我喺更衣室一出來，Mr.T 就吹口哨~~~~
 條裙竟然啱身到好似為我度身訂造一樣! 
真係大半吋或細半吋都無咁fit!! 
一試上身我已經好好好鍾意! ♥ 
初時以為好闊既公主袖原來係啱啱好啊~

塞翁失馬......
如果唔係Mr.T 臨時開會，上星期日我會留喺Glasgow BBQ;
如果Mr.T 架車唔係咁啱攞咗去service，我地唔會打的;
如果個死人的士司機唔係兜路，我地唔會早d落車;
如果我地無早落車，我地唔發現依個vintage 賣物會;
如果我地無發現依個賣物會，我就唔會買到條靚裙! 

因為一條二手裙，
令我開心咗一整個下午! 
雖然依條裙唔可以令我賺皮幾兩皮野， 
不過快樂係無價既，我搵到寶啊~~~~