單拖回香過新年 - V媽媽靚正餸...龍年新年篇

大家知唔知我打緊上一篇V媽媽靚正餸2011時有幾咁煎熬? 
望住相裡面既靚餸......一路打字個肚一路咕咕叫~~~~ 
原本想停一停先寫吓其他野轉移一下視線， 
但經過我慎重考慮後都係決定"長痛不如短痛"...... 
拿拿聲post 埋2餐新年飯! 
Are you guys ready?
先同大家熱熱身.......


依餐係大年初一V媽媽就我食齋而煮既齋菜~ 

裡面有天津白菜、髮菜、珍珠筍、鮮冬菇、草菇、磨菇、豆卜、枝竹、竹笙...... (係記得咁多料咋! ) 
仲有就係好睇唔好食既原隻齋鮑魚......
新年嘛~ 食齋都要食鮑魚!!  
(d齋鮑魚個樣好搞笑~~~~ )



依個齋鮑魚刺身就好好味嘞，味道有九成相似架!


V家年廿九當晚無煮到團年飯~ 因為......

(1) 6299都返咗香港過年，年廿九我返咗沙田食團年飯;

(2) 個個食完團年飯都去行花市，我地舖頭都照做生意~

打後初一要食齋; 初二 + 初三都去咗拜年，

所以V家初四先有開年飯食!

大家估吓依餐開年飯幾多個人食?


答對了 - 就係3個人嘞!

V媽媽話雖然屋企得3丁友，

不過年飯一定要攞個好意頭 - 足足有8餸1湯!!



竹笙魚肚粟米羹
平時過時過節V媽媽會煲髮菜蠔豉蓮藕煲豬手或鮑魚花膠湯，

不過上一篇都講過因為我飲緊中藥，唔飲得一切老火湯，

V媽媽深知我為食既性格 - 佢肯定若佢煲湯的話我會偷飲......

所以佢索性唔煲湯快手煮個羹~



雖然無老火靚湯飲，但有好多靚餸補償!

(咁其實個羹都好好味既! 嘻嘻~~~ )


金華火腿蠔汁炆鮑魚 + 刺參
鮑魚 + 海參真係好拍檔! I love both~




冰糖炆鹹豬手
依個超級讚仲超級易整!!

但要做到好似扣肉咁又香又腍又軟，用筷子一篤就散既口感，



就要一定要預早一晚開始細火慢慢炆!

(等我同V媽媽 confirm 一下做法 + 時間後再貼食譜出來~ )




蜆介煮釀鯪魚
依個仲未開得飯時炒起咗果種香味......

真係會折磨到人發癲架!!




發財冬菇好事
農曆新年必備好意頭!




薑蔥生蠔
新年嘛~ "好"野唔怕多!

本來V媽媽係想整炸蠔，

不過又係因為我飲緊中藥唔可以食煎炸野~




鴛鴦臘腸
左邊係我既至愛 - 金銀潤~ ♥ 只得農曆年期間先有得賣;

右邊既係我唔多吼既普通臘腸~



最後出場既兩味係百食不厭既"過節孖寶"，

唔止新年，其他大時大節都一同樣會見到佢地既蹤影!

佢地就係......


白切走地雞


唐芹炒爆砂魚肚雞雜



早前我將依餐8餸1湯開年飯post 上FB，

大家都問我 - 3個人食得哂嗎?

如果我話食得哂既話，你地都唔信啦!

咁食剩既餸菜會點呢?

就係咁整立雜盤菜嘞!



今次V媽媽靚正餸又暫告一段落嘞~

我而家要閃去煮野食...食......食.........食............