二人世界三餸一湯 - 2011年10月5日 (附食譜)

紅蘿蔔蜜瓜螺頭煲豬腱; 薑蔥蟲草花煀雞; 七味胡瓜魚 & 清炒軟枝西蘭花

原來上一餐三餸一湯已經係2星期前!  自覺實在有點懶得過份...... 

 蘇格蘭已經開始轉天氣......

咪睇成地枯黃咗既落葉，就以為天氣涼/凍咗好多喎!

落葉只係代表可愛既深嫲已經靜雞雞遠離蘇格蘭......

依張相係上星期某一日影既，查實當時有成廿幾度但一滴風都無，悶熱翳焗到著住件背心唔郁都不停標汗!!

不過尋日星期三天氣突變到好鬼凍~~~ (今日星期四最高氣溫只得9C!! )



其實近排就算未轉涼都feel 到天氣轉緊 - 因為近排瞓醒喉嚨好乾涸!

咁就要煲返d滋潤湯水潤一潤......

 見超市honeydew melon 好靚好大隻......

 抬咗隻返屋企加埋紅蘿蔔、無花果 + 螺頭，煲咗依個超甜超潤既正湯!



之前只用蟲草花來煲湯，煲完湯既蟲草花口感爽爽好好食~

 今次試吓用來煮餸 - 加埋薑蔥、乾蔥頭、紹興酒......依個煀雞件超級惹味呢!



英國洋人超市鮮魚選擇實在太少! 而且唔算得上好鮮......

不過有一種我 + Mr.T 都好鍾意食既超平價小魚，

我只喺Morrisons 見過有得賣，而且一定新鮮 - Sprats!

所以我見親有sprats 賣，都一定會買大咋!!

魚雖小但因為成條食得唔需要劏肚，所以處理非常簡單......

 炸後酥炸可口，且含豐富Omega 3，真正價廉物美~

有幾價廉? 上面一大碟只係£1!

 之前用依隻軟枝西蘭花(Tenderstem Broccoli)來炒肉片，有blog 友以為係菜心......

今次來個close up 比大家睇清楚d!

個人覺得軟枝西蘭花味道大致上同普通西蘭花無咩分別，

只係比較爽脆 + 清甜少少~

但價錢就相差好遠嘞......

普通西蘭花£1.67/kg; 軟枝西蘭花竟然要£7.85/kg!!!!!!  



天氣一下子轉涼咗咁多，咁我就要趕走懶蟲煮多d飯嘞!

因為我要食多d飯先夠暖嘛!!



 紅蘿蔔蜜瓜螺頭煲豬腱食譜click here~

 薑蔥蟲草花煀雞食譜click here~

 七味胡瓜魚食譜click here~



>>>>>>>>>>>>>>>>>>>>>>>>>>>>>>>>>>>>>>>>>

雖然近排懶咗少煮三餸一湯，不過其實我都係有煮飯既!

只係煮得比較簡單......

 9月27日: 素蠔油炆上素

是日初一食花齋，老公又要開會遲返~ 我等佢唔切自己一個人先開飯!

 素蠔油炆上素食譜click here~

 9月28日: 叉燒; 煎荷包蛋 & 清炒黃芽白

是晚天氣悶熱，偷懶唔想煮飯，於是叫老公買盒叉燒返來加料，

炒咗屋企有棵黃芽白 + 煎幾隻粉藍雞蛋，咁又搞掂一餐!

 盒粉藍雞蛋有1隻特別長型......

 原來係雙黃蛋來果喎! 嘻嘻~~~~~

是晚老公第一次食粉藍雞蛋，所以我將隻雙黃蛋讓比老公~

不過愛妻號Mr.T 企圖將隻蛋讓返比我......

過程中爭d篤鬼穿咗隻蛋!

老公都話依種粉藍雞蛋蛋黃的確香濃有蛋味，好好食!!

 9月29日: 叉燒蛋炒飯 & 清炒翠玉瓜 + 黃芽白

 之前2次有食剩外賣叉燒，第二日我用來炒飯做午餐......

Mr.T 睇到我放上FB既炒飯相，大叫話佢都想試吓依個炒飯!

是晚佢終於有機會嘞!!

 食完飯仲有老公好鍾意既cream horns 做甜品呢~

連我自己都覺得老公好幸福! 哈哈~~~~

 叉燒蛋炒飯食譜click here~

 Cannoncini(意式忌廉號角)食譜click here~

 9月30日: 豉油皇炒麵

晏晝簡單地炒咗大兜豉油皇炒麵做午餐~

只有西班牙黑毛豬油、滴珠油、日本胡麻油、銀芽、乾蔥頭 + 蔥段既豉油皇炒麵，加幾pat 余均益辣椒醬...身在異鄉都食到依種味道太幸福咯! 呵呵~~~

 銀芽豉油皇炒麵食譜click here~

 之前喺Waitrose 買咗盒蟹膏，原本打算試吓用來炒飯......

不過早幾日口痕鬼上身搵唔到野止口痕......

 就咁空口比我食哂成盒膽固醇!

蟹膏超鮮甜! 感覺好似食咗10個大閘蟹蟹蓋一樣!! 哈哈~~~~