我的心水蛋卷王

蛋卷我其中一樣我間唔中先會食一次既食物~


對於果d我間唔中先食一次既食物，

我食慣咗某一個牌子就好少會去試新野試新牌子......

因為當我一試新野，多數就係我瀨野之時!

 多年來我食親蛋卷都係買精記蛋卷王~

喺英國每種香港入口既食品都選擇不多~ 雖然可以買得到嘉頓依類大牌子，
不過嘉頓果種好西式feel 既牛油卷非我杯茶!

蛋卷，我係要食蜂窩狀+傳統懷舊feel 果種!!

依邊幾乎間間中式超市都有得賣精記蛋卷王，想食時一定買得到，非常方便!

甜食一向非我所愛~ 就算可以令我破例既甜食，味道都唔可以太複雜，越簡單越好!!

精記完全符合哂我要求! 有時口痕想淺嚐一兩條; 有時又會突然食到停唔到口，睇緊電視不知不覺已經搞掂咗大半罐!!

 早排喺中超發現依盒同類型傳統懷舊feel 雞蛋卷~
見佢包裝幾classy，即時挑起咗我果顆好奇八卦既心條筋，再加上Mr.T 慫恿: You will never know unless you try it! 於是買咗盒返屋企試吓......

精記蛋卷王VS十月初五奶油雞蛋卷

第一回合: 響"朵"

精記 - 香港出名蛋卷老字號;

十月初五餅家 - 見到依盒野之前聽到未聽過!  見到後亦只唸起張智霖同佘詩曼拍過套"十月初五的月光"......

第二回合: 外包裝

精記 - 包裝設計較老土，亦唔鍾意鐵罐既包裝! 有理由相信因為用鐵罐成本較高，售價亦因此提高咗...不過從另一角度去睇可以視為特色 - 傳統懷舊feel 嘛!

十月初五餅家 - 紙盒包印刷精美，設計classy，令人有種"貴野"既感覺~

第三回合: 內裡包裝

精記 - 我一直都好鬼憎依個圓蓋! 蛋卷條條都長過依個圓蓋既直徑，好難從罐內攞到一條完整無缺既蛋卷出來 - 尤其係開新罐攞第一層既蛋卷!!

 十月初五餅家 - 紙盒內分開多包每份2條既獨立包，方便企理!

第四回合: 賣相

 精記 - 蜂窩狀既蛋卷，未食就咁望都感覺到鬆化~ 而且條條顏色均勻一致!

 十月初五餅家(前) - 已經完全無蜂窩狀，加上條蛋卷原因不明一撻深色一撻淺色......我已經覺得好核突!

 賣相同包裝盒上依張靚靚相好大分別! 即時有種被人老點咗既感覺!!

第五回合: 口感食味

 精記 - 表面夠蜂窩仲捲埋好多層，食落超級鬆化，唔太甜又蛋味適中! 啱哂我依種鍾意subtle 味道既人~

 十月初五餅家 - 薄到幾乎完全無層次; 脆係幾脆，而且意外地比我預期中鬆化! 不過......

 雖然叫做奶油雞蛋卷，但果陣奶油味實在太誇張毫無靈魂，假到阿媽唔認得!
因為牛油味太假，咬咗一啖後有少少唔"敢"再食......

第六回合: 誠實度

 精記 - 明刀明槍，光明正大，中英對照標明"香港製造"!

 十月初五餅家 -你老闆包裝盒上有幅澳門大三巴......

 Logo 中英對照打正旗號註明"澳門"......等我坐定粒六以為係澳門野來!

 睇清楚後面先知原來係江門製造!!

上網查一查......澳門街根本就無一間餅家叫做"十月初五餅家"!
"十月初五餅家"地址位於南山南頭常興路159號 - 即係深圳!!

蛋卷已經唔好食，加上有刻意誤導消費者之嫌，

我對依個牌子印象好差囉! 一定唔會再買依個牌子!!

我都話咗一試新野就會瀨野架啦.......

後話: 盒十月初五小妹只食咗半條就頂唔順，剩低果99%全部由偉大既Mr.T 一口包辦哂! 萬分感激~~~~~~

>>>>>>>>>>>>>>>>>>>>>>>>>>>>>>>>>>>

睇見網上好多人攞精記蛋卷王 + 德成號蛋卷來比較~

而且大家對2個牌子既評價似乎叮噹馬頭!

綜合咗我睇到既意見，發現網民對德成號蛋卷既評價幾極端......

大部份鍾意既人都話好有蛋香，比精記優勝;

但亦有人覺得味道一般、唔夠鬆脆，並非特別好食云云~

本來已經引起咗我既好奇心，好想試一試德成號蛋卷!

不過我又發現一點 - 無論鍾意德成號蛋卷與否既人，

都一致地認為德成號生意唔憂做，所以對客人態度好差!

e.g. Forum見到有人話曾經試過親身到德成號選購，

只稍為猶豫計算一下購買數量，只係咁就比店員反白眼啤咗幾野......

(對我來講咁既態度何止差，直情係惡劣啦!! )

平日送禮淡季都要電話預訂，接受你預訂分分鐘又要個幾兩個月後先收貨;

walk in 又要撞運氣睇吓佢地賣唔賣比你......相當大既架子!!

有人朝早9.30到德成號已經見到有40 -50人喺門口排緊隊，

排咗足足1粒鐘10.30am 先買到蛋卷;

店明明係開到7pm，但10.30am 就楝個牌出來寫住 "今日蛋卷售完，明日請早"......

德成號蛋卷真係受歡迎得咁誇張?

姑勿論德成號蛋卷是否真係如此巴閉，

我睇完以上forum 討論後，雖然唔係自己親歷其境，

不過我原本好奇想試德成號既心態已被厭惡感覺完全蓋過!

人年紀越大就越受唔住"貼錢買難受"......

依種對顧客好似有仇既店，我真係話之你食咗會飛!!