二人世界分開食...花齋 - 2011年6月16日 (附食譜 + 炸麵筋做法)

南乳炆齋
話咁快就半個月，眨吓眼尋日又到農曆十五 - 係我實行食花齋第二次既日子!


上次初一食齋因為老公開OT，所以我只求其開咗罐罐頭麵筋~

今次老公堅持要我預埋佢一份......

 所以我炆咗煲南乳炆齋!
見食肉獸咁有心主動堅持陪我食花齋，所以依煲齋菜我落足心機，加多d唔同花款材料......

 黃芽白;

 鮮雜菌: 法國啡蘑菇、本菇、蠔菇;

 白背黑木耳、冬菇、枝竹、竹笙、紅蘿蔔;

 仲有自製炸麵筋!

其實仲有罐頭粟米筍! 唔記得影相......

當我炆好齋菜既時候，Mr.T 來電話要晏少少返~ 不過我好鬼肚餓，所以我忍唔住自己一個人食飯先!

Mr.T 返到來開飯時好擔心咁問我:d齋裡面有咩架? 妳點煮呀??


我估佢好怕我只淥兩條青菜來應酬佢!

不過最後佢一路食一路話: 咦~ actually 好正喎! 原來齋咁好食架!!


食肉獸乖乖剷除咗一大兜齋 + 一大湯碗份量既白飯!!

P.S. 原來Mr.T 尋日好乖 - lunch 時食咗個齋沙律喎! 真係抵鍚~~~~

>>>>>>>>>>>>>>>>>>>>>>>>>>>>>>>>>>

早排有網友見到我部BOSCH mixer 就走來同我講 - 聽講依部BOSCH 打高粉麵糰只可以打300g 以下; 又話覺得個麵糰勾好幼，

質疑只得550W會唔夠力，打唔到麵糰變薄膜云云......

(佢自己無用過甚至無見過依部機，唔知佢聽邊個講? )

買咗部BOSCH 咁耐，我一直只用來整蛋糕打蛋打忌廉，未試過用來整麵包，因為我每次整麵包份量都唔多，大約只會用200g 麵粉左右，所以貪方便我多數都係用返Breville 手提mixer 來打麵糰!

 今次用500g 高粉搓麵筋，於是我就用部BOSCH 來打麵糰，証實一下依位網友所講既意見是否屬實......

我先放高筋粉、泡打粉、鹽 + 油落鋼盆，開最慢速1號一面打一面慢慢再加水(怕乾粉飛到周圍都係!! )

大約1分鐘後材料初步拌勻，我就加速改用2號繼續打;

 用2號打咗2分鐘左右已完全搞成麵糰!

之後持續打咗5分鐘，麵糰已經起哂筋性唔黏手 - 我個人經驗從未試過打一個麵糰咁快手就搞掂! 整蛋糕時打蛋打忌廉都一樣好快趣呢!

只可以打300g 以下高粉 - 依點係完全唔正確既!

(我覺得可以打超過500g 呢~ ) 

依部BOSCH 絕對係我用過最滿意既mixer!


 南乳炆齋煲食譜click here~

 自製炸麵筋做法click here~