2011年5月22日星期日

愛丁堡台灣美食節2011 (2011年5月21日)


早前喺FB 得知Edinburgh Taiwanese Students’ Society + 1010 Social Club 舉辦咗個"愛丁堡台灣美食節"......

雖然我 + 老公唔係台灣人,不過我地都超級鍾意台灣,當然唔會錯過啦!


美食節6.30pm 開始,地點係Edinburgh St. Peter's Church......

 入場前先喺入口處購買餐券,每本£5,我地買咗4本£20~

喺檔攤購買食物時只需搣出價錢金額就得嘞,

人迫迫唔洗時時攞個銀包出來,真係方便好多呢!

不過因為太多人,買咗餐券後排咗隊30分鐘先入到場啊!

尋日我地由Glasgow 渣車去Edinburgh 時落好鬼大雨,心唸咁大雨可能會少d人去......

 點知我地7pm 去到時,整間教堂塞滿哂人!

 真係估唔到蘇格蘭原來有咁多台灣人!!

排咗咁耐隊,一入到場即時大開食戒~~~~


 不過場內人頭湧湧,買野食一樣要排隊!

是次活動規模比我想像中大得多! 場內售賣既係地道台灣食品及台式夜市小食,我發現比當初官方網站餐牌列出既食物種類更多呢~

我 + Mr.T 食咗乜野正野? 去相......

 鹽酥雞 + 茶葉蛋 (自備餐盒食具! )

 蔥花麵包

 香菇肉羹湯

 老公都話肉羹湯好正呢!

 估唔估到我攞住杯咩咁開心呢?

係我非常掛住既麵線!  去親台灣每晚我都要去夜市整碗麵線架~

 但好可惜排到我時,大腸麵線已經賣鬼哂......

 唯有肉羹麵線都照殺好過無啦!

 台灣香腸、滷蛋、滷豆干 + 滷昆布

 紅燒牛肉飯

 第一次見 + 食既"掛包" (裡面夾住既酸青瓜超好味!! )

 掛包包埋1杯豆漿架!
喺現場檔檔試吓,不知不覺已經好飽......

 剩低既餐券用來買咗好多打包小食返屋企!

 鹹蛋糕

 滷水牛肚

 滷蛋、滷昆布 + 滷麵筋

 滷昆布 + 滷麵筋 (原來滷既昆布 + 麵筋係咁好食果喎!! )

£20餐券真係好鬼抵用呢!

美食節前預購咗一咋台灣食品,食飽飽後就去進口台灣食品網上店Taipec 既攤位比錢 + 取貨......

 台沛依位叔叔好親切啊!


 買飽食醉抬住一箱,抽住兩抽滿足地返歸去~~~~~

 滿滿一箱裡面有乜野呢?

 大同柳丁醬油 - 一種西螺出產,加咗橙汁來釀製既黑豆醬油~

 4種不同口味張君雅小妹妹點心麵 - BBQ口味、醬油口味、墨西哥香辣雞口味 + 黑胡椒口味








今次台灣美食節有部份食物好快已經sold out,好似大腸麵線、油飯、水煎包、大腸包水腸、肉燥米粉、紅燒牛肉麵 etc,今次我都無緣食得到......

不過其中一個攤位負責人同我講 - 今年年尾將會再辦一次台灣美食節!

希望會成事啦!!

>>>>>>>>>>>>>>>>>>>>>>>>>>>>>>>>>>>>>>>>>>>>>

有感而發......

我 + 老公去過台灣2次,覺得台灣係一個風景好靚,周圍充滿美食兼好有文化氣息既地方; 而且台灣人熱情友善,令我地完全愛上咗台灣~

今次依個愛丁堡台灣美食節,愛丁堡台灣同學會有份主辦,令我感受到台灣人既團結!

雖然我唔係台灣人, 不過我真係非常舉腳歡迎依類咁有東方特色既活動呢!!

想當年我大學都有個香港同學會,佢地都有搞過大圍活動.......不過係米蘭旅行團!

我無參加呀! 去旅行洗鬼跟同學會去咩?

地點仲要係米蘭......唉~~~~



38 則留言:

  1. 見到妳們當地的台灣美食節 , 不其然也會想起香港每年一度在會展舉行的美食節 , 近兩三年我都有參與 , 見到很多食材 , 醬料 , 美食.....跟妳一樣呢 , 一定滿載而歸呢!
    [版主回覆05/23/2011 17:30:00]其實香港除咗夏天大規模會展美食節之外,年中大大細細唔同地點都有好多唔同美食節,仲有工展會性質都差不多!
     
    對我來講香港果種美食節只係各大品牌速銷會,因為有好多售賣既食品,平時香港都有得賣! 性質同今次我去依個台灣美食節唔同 - 果日買到 + 食到既,平時喺英國好少見或好少有咁集中~
     
     

    回覆刪除
  2. 真的很多好吃的,英国应该要多搞这种活动。
    [版主回覆05/23/2011 17:27:00]我都好贊成英國搞多d依類活動!
     
    不過我唸佢地最少要預計最低到場人數,所以主辦單位大多會選擇大埠來辦依類活動!
     
     

    回覆刪除
  3. 我地seattle呢邊每年都有咁既活動呢~ 今年搞既仲要同你地個邊同日喎~ 不過...我上年去過一次... 可能係因為係大學學團搞既活動... 都未入到去就聽到literally「震耳欲聾」既music 佢地請左好多學生搞既band係台上表演... 仲嘈過我落club...=.= 最慘既係...排隊排到好辛苦... 我同男朋友早左到...都要排左差唔多半個鐘先入到場 而場內既選擇好少... 有大約十幾個攤檔...而當中有大部份都係chinatown有得賣既野... 每個檔位我都要排至少廿分鐘先買到野食... 係已經排隊排到身水身汗既情況下...仲要每廿分鐘先食到少少野...=.= 而且仲要係咁嘈雜既環境... 結果~我同我男朋友都好快就give up左...走返落chinatown食飯...=.= 至少唔使同人逼~又唔使俾人逼住聽嘈音~
    [版主回覆05/23/2011 17:24:00]都有咁既活動 </// 都係台灣美食節呀?
     
    我去依個台上只有人唱聖詩(可能因為地點喺教堂啦!),現場好熱鬧,不過無band 所以唔嘈,只係聽到大家食得好開心笑囉!  
     
     

    回覆刪除
  4. 我同男友都好喜歡台灣的文化氣息, 重有美食啦...真係好想快D再去台灣玩下食下...
    香菇肉羮湯又幾正喎...我成日都想試煮麵線呢(但要走大腸, 因為我唔食內臟...)...
    [版主回覆05/23/2011 17:22:00]香港去台灣好近之嘛,而且又平~ 如果我住喺香港既話,我唸我會成日忍唔住去呢!
     
    搵日我要老翻肉羹湯,因為實在太好味嘞! 麵線唔要大腸,可以煮蚵仔麵線或好似佢地咁肉羹麵線~
     
     

    回覆刪除
  5. 哈哈哈  你真係滿 載而歸, 睇你 笑得幾開心!     好多包小食,真開心。
    [版主回覆05/23/2011 17:19:00]其實果張所謂滿載而歸開心相......係我當時踎低放杯豆漿喺紙箱上面,唸住喺手袋度攞紙巾~ 不過我踎低時唔小心成個"燉"咗落地下,我拿拿淋起返身見老公影相先笑到"咁開心"!
     
    不過買咗 + 食咗咁多好野,都真係好開心!
     
     

    回覆刪除
  6. 其實我對台灣一啲認識都無....何況係美食.....   我只係去過台灣機場轉過二次機咋....
    [版主回覆05/23/2011 17:16:00]妳咁鍾意食野,我唸妳去到台灣一定會好鍾意啫!
     
    我同Mr.T 晚晚去蒲夜市食小食,蒲到檔攤d人都認得我地!
     
     

    回覆刪除
  7. My Taiwanese friend very friendly too! We became very good friend in just a month or so~
    [版主回覆05/23/2011 17:15:00]i also have a few taiwanese friends, they are all super nice people!
     
    my experience is most taiwanese are very nice, polite and friendly to other people - even to strangers~ when Mr.T and i went to Taiwan, we asked strangers for directions, they werent just explain to you, they even draw you a map using their own pen and paper!
     
     

    回覆刪除
  8. Gaileは林家歐巴桑2011年5月22日 下午11:21

    既然Mr.T都錯意食肉羹,妳搵日整黎食啦,好正....
     
    勁喎,妳都識講刮包既台語"掛"包  咦~~妳之前有冇食過張君雅小妹妹架??如果好味下次再寄d過妳
     
    唔只台灣人有人情味,我都好有人情味架~~聞唔聞到呀?
    [版主回覆05/23/2011 17:07:00]我點止要整肉羹呀? 我大部份都要老翻!!  我已經學識咗自己打魚漿~  我仲買齊哂太白粉 + 地瓜粉準備整鹽酥雞呢!
     
    唔勁唔勁~ 檔攤賣既食物都有餐牌架嘛! 買來放入自己口緊係要知係咩來啦!! 話時話我第一次食掛包咋,不過真係好好食!
     
    我之前網上見過人介紹張君雅小妹妹,覺得個名好得意! 我知道台沛有進口,不過幾包點心麵費事網上訂又要送貨咁麻煩啦,所以我之前未試過架!
     
    唔洗寄比我啦,我依邊買得到嘛!   我當然聞到妳好大陣人情味除啦~  仲搞到我即時覺得非常唔好意思 - 因為我pack 好咗寄比妳箱野九世,不過次次出街都唔記得帶出去寄.......  今個星期一定寄比妳!
     
     

    回覆刪除
  9. 滿載而歸~~~~~
    [版主回覆05/23/2011 16:57:00]個肚同對手都滿載而歸!
     
     

    回覆刪除
  10. 張君雅小妹妹點心麵-->我都鍾意架
     
    [版主回覆05/23/2011 16:56:00]之前網上見過有人介紹,覺得個名好得意! 尋日試咗一包好好食啊!!
     
     

    回覆刪除
  11. 《Ka MaN 日記》2011年5月23日 上午1:42

    好多嘢食吖。。。
     
    [版主回覆05/23/2011 16:55:00]係呀~ 好熱鬧好多野食呀! 不過可能佢地當初低估咗到場人數,所以有好多食物一早已賣哂咯~
     
     

    回覆刪除
  12. 鹽酥雞係"賣飛佛"
    [版主回覆05/23/2011 19:00:00]我食果咋樣樣都係我飛佛!
     
     

    回覆刪除
  13. Gaileは林家歐巴桑2011年5月23日 上午3:14

    傻啦...咩唔好意思啫!! 妳尋日食既鹽酥雞有冇加洋蔥同蒜片一齊炸架??傳統食開果d係冇落,只係有九層塔...如果佢地冇加,妳整既話一定要加埋依兩樣喎,超級勁爆正好食 我最近愛上咗屋企附近既一攤早餐,我次次都去買佢地d筍子包,又係好好食~~妳講開刮包,我太耐冇食嘞,間野都有刮包賣,過幾日去買返隻返黎食先...
    自己打魚漿會唔會好攰?不過手打一定好味好多
    [版主回覆05/23/2011 18:59:00]我真係唔好意思架! 不過今個星期內一定寄比妳~
     
    我都唔知佢有無加洋蔥 + 蒜片喎....就咁睇唔見有,連九層塔都唔見呢~ 不過食到炸粉裡面好香蒜味,我估係材料中既蒜粉!
     
    我第一次掛包咋,好鍾意佢裡面夾住既酸青瓜,而且超多莞茜,加埋個煙煙靭靭既包,真係好好食呢! 我尋晚搵咗掛包食譜,搵日試吓老翻!! (我要扮台灣人!!! 哈哈~~~ )
     
    魚漿用機打架! 因為我想老翻肉羹湯,但我依度無魚漿賣,所以尋晚上網搵吓有咩辦法,點知比我搵到一個台灣人既blog 教DIY打魚漿,原來一d都唔難果喎~
     
    喂~ 見唔見到我買咗柳丁醬油呀?
     
     

    回覆刪除
  14. Gaileは林家歐巴桑2011年5月23日 上午4:31

    係啦,用機打都好d...咁係咪要加肥豬肉落魚肉度打架??
     
    我見到呀...但我未試過柳丁醬油,唔知點用
    [版主回覆05/24/2011 18:45:00]無喎~ 我見佢只加水加調味料 + 太白粉之喎,唔見有肥豬肉呀! 佢用鱈魚打漿,啱哂我!  妳想睇吓既話我可以比條link 妳架~
     
    枝柳丁醬油我都未知點用住!  要研究吓先~
     
     

    回覆刪除
  15. 滿載而歸 !  我未去過台灣 , 但好希望呢兩年內能成行 , 盡情地食食食 !
    [版主回覆05/24/2011 18:43:00]台灣係一個只要妳去過一次就會愛上既地方!
     
    之前我2次都係去台北,希望下次有機會去台中台南等地~
     
     

    回覆刪除
  16. 果然好多收獲呀 間唔中有的特色節日活動都好新鮮又好玩 
    [版主回覆05/24/2011 18:41:00]喺外國生活真係好鍾意見到有東方特色既活動架!
     
     

    回覆刪除

  17. 嘩﹗真係有好多野食呀﹗吸引C人呢。我對你買既柳丁醬好有興趣﹐期待你用哩個做既菜式。
    [版主回覆05/24/2011 18:41:00]果枝柳丁醬油其實即係有橙汁既豉油~ 比少少時間我唸吓點用!
     
     

    回覆刪除
  18. 你最尾張相一臉滿足  好大型呀, 至愛鹽酥雞同鹵牛肚 
    [版主回覆05/24/2011 18:39:00]個美食節比我想像中有規模 + 辦得成功啊!
     
    最尾張相其實係我踎低時唔小心"燉"咗落地,我笑住遮醜起返身咋......
     
     

    回覆刪除
  19. WOO~呢個台灣美食節好正咁BO! 你食左個花生麵筋罐頭未呀? 我成日見到佢, 但無膽去試 我仲讀大學個陣個HK SOC都好把鬼 D FUNCTION無聊到死 去睇香港明星D CONCERT (但經佢買又無DISCOUNT WO...同我出街買一樣) 最好個次咪去STRAWBERRY PICKING同埋睇下LAVENDER 之後成年都無FUNCTION LA 我JOIN過一次都覺佢呃錢 不過幾年前見朋友JOIN HK SOC又多左好多野玩 又去CAMP又去成 點解.....要係我畢業之後先有呢D野 珮夫人
    [版主回覆05/24/2011 18:38:00]係呀~ 個美食節比我 + 老公想像中規模大 + 辦得成功呢! 其實我估連主辦單位都無唸過咁受歡迎,因為佢地當初估計大約超過100人,好明顯唔止啦! i think that's why 有好多食品好快就賣哂......
     
    個花生麵筋我未試呀! 我打算下月開始初一 + 十五食齋,到時先開罐來試~
     
    我覺得學生會搞去米蘭旅行真係好無聊! 同妳果個睇香港明星concert 異曲同工 - 一樣咁無聊!!
     
    係要搞旅行英國大把地方可以去啦,感覺果d所謂香港學生會好似利用學生會名義來for 自己吃喝玩樂!  依d野根本唔需要學生會自己都可以做架!
     
    好似人地愛丁堡台灣學生會咁, 喺英國搞一d推廣台灣文化既活動幾好呀! 真係好羨慕台灣人既 團結!! (而且美食節收益中10%仲會用來捐去日本震災架!)
     
     

    回覆刪除
  20. 大腸麵線!!! 我至愛TOO!!!
    完全FEEL到你果種失望~ 以前去親台灣我都會成日整碗架, 就算熱到死企係條街食都唔介意~
    你有冇食過即食既大腸麵線呀? 我好似係吉豬島台灣美食節買過來試, 雖然冇新鮮咁好食, 但都唔太差架...
    [版主回覆05/24/2011 18:25:00]唔緊要~ 我仲有機會食既! 佢地話年尾會再搞多次美食節嘛!!  再唔係咪試吓自己整囉,我依度買到大腸,睇吓搵唔搵到麵線嘞~
     
    我無食過即食呀! 聽落好似好怪,好難想像係咩味道....
     
     

    回覆刪除
  21. 我好掛住台灣D食物呀。
    [版主回覆05/24/2011 18:22:00]我除咗掛住台灣既食物之外,仲好掛住台灣既靚風景、天然溫泉、書店.......what a beautiful island!
     
     
     
     

    回覆刪除
  22. 台灣又真係好多美食㗎!
    [版主回覆05/24/2011 18:21:00]妳有無去過台灣呀?
     
     

    回覆刪除
  23. 味全花瓜~可以整肉餅 將300G絞肉同一罐花瓜(剁爛)連湯汁 一起蒸熟 我香港朋友好中意食 妳可以試試 這算是台灣媽媽的家鄉菜(因為我係台灣人)   
    [版主回覆05/24/2011 18:19:00]Thanks for sharing the recipe!
     
    等我遲吓開一罐試吓妳既做法~
     
     

    回覆刪除
  24. Herbivore Cats 食菜貓貓2011年5月23日 下午8:37

    睇相都知現場啲食品好地道啊! 羨慕死人 我都係好鍾意台式美食, 不過買唔倒惟有自己做啦  仲有呢, 嗰個應該叫 「刈包」唔係「掛包」啊
    [版主回覆05/24/2011 18:09:00]據我所知愛丁堡有一間台灣餐廳,不過果日美食節裡面售賣既小食,有好多果間餐廳都無得食.
     
    btw 果個叫做"刈包"無錯,不過同時亦叫做"掛包"、"割包"或"虎咬豬"; 樓下住喺台灣既林家歐巴桑仲話有另一個名叫做"刮包"~ http://zh.wikipedia.org/zh-hant/%E5%89%B2%E5%8C%85
     
     

    回覆刪除
  25. 我好耐冇黎留言啦
    見到咁多台灣美食搞到我好想快d去呀!
    因為今個暑假(6月中)我會去台灣旅行呀
    諗起d美食我都覺得超興奮呀!
    [版主回覆05/24/2011 18:01:00]妳之前未去過台灣架? 咁妳一定會樂而忘返!
     
    祝妳玩得開心d啊!
     
     

    回覆刪除
  26. 原來張君雅小妹妹有咁多味道架
    [版主回覆05/24/2011 18:00:00]佢地做緊美食節特價,唔記得幾錢有4包,咁我咪買4個味囉! 唔知係咪只得4個味呢?
     
     

    回覆刪除
  27. WOW...大腸麵線我都好鐘意
    [版主回覆05/24/2011 17:59:00]大腸 + 蚵仔麵線我都鍾意!
     
     

    回覆刪除
  28. Gaileは林家歐巴桑2011年5月24日 上午4:04

    妳唔駛比條link我架喎,到時妳煮咗post上黎我咪一樣睇到食譜 我係咪好醒呢
    [版主回覆05/25/2011 08:10:00]好! 我一定要整到好似妳整果碗咁鬼靚!!!!!
     
     

    回覆刪除
  29. 係呀!未去過呀,因為之前唔想用屋企人錢去旅行嘛.
    只係而家有返part time所以先去下旅行
    [版主回覆05/25/2011 08:08:00]祝妳玩得開心d + 食得開心d啦!
     
     

    回覆刪除
  30. KwokMan kuen eunice2011年5月24日 上午4:55

    麵線,好味好味!
    [版主回覆05/25/2011 08:07:00]除咗麵線,其他野全部都好好味!
     
     
     
     

    回覆刪除
  31. Herbivore Cats 食菜貓貓2011年5月24日 上午5:46

    我淨係聽過割包同刈包咋, 不過國語都係咁上下音, 可能因為咁變出咁多個名啦 有台灣食肆已經好好啦, 我呢邊好少見, 有都成日係大陸人開扮台灣菜咋, 要正宗台式口味真係要自己整先有機會啦
    [版主回覆05/25/2011 08:07:00]而家台灣人大部份係叫掛包架! 我上網search 食譜,10個台灣網誌著咗10個都係叫掛包~
     
    妳果邊係邊度?  愛丁堡果間台灣餐廳係一個洋人男人 + 一個講台灣腔普通話既女人家庭式經營,食物味道好正宗!
     
    正宗台灣口味要自己整? 妳係台灣人來架??
     
     

    回覆刪除
  32. 塔羅女神-王姬2011年5月24日 上午8:01

    呢種美食節真係好特別呀!我睇相好似係個Hall度開大食會咁!好開心! 多謝Mrs.T的分享呀!
    張君雅小妹妹點心麵!!!我有一輪成日食架!佢仲有一個巧克力甜甜圈!都係我的最愛呀!(不過你記得你講過你好似唔係好鍾意食甜野的~)
    呢個墨西哥香辣雞口味我係香港就未見過呀!
    台灣真係一個好好的地方,除左有好多美食外,亦都有好多書店呢~
     
    [版主回覆05/25/2011 08:00:00]喺外國生活,依類咁有東方特色既活動真係好特別,熱鬧又開心呢!
     
    係呀? 原來張君雅小妹妹仲有甜品架? 我見台沛淨係賣點心麵咋~ (無錯~ 妳好好記性 - 我係唔鍾意食甜品既! 不過唔太甜既我都會試吓無妨既!  )
     
    我 + Mr.T 真係好鍾意台灣!  周街都係書店,啱哂我依種書蟲!  講出來我自己都覺得好誇張.....我第一次去台北買咗60幾本書帶返香港; 第二次仲勁買咗80幾本! 返到香港再打箱寄返來英國.....
     
     

    回覆刪除
  33. V 女 , 我 OK 咗啦 ! Thx 
    [版主回覆05/25/2011 07:52:00]唔洗客氣!
     
    我講解到一舊舊妳都睇得明~ 叻叻!
     
     

    回覆刪除
  34. Herbivore Cats 食菜貓貓2011年5月24日 下午7:39

    我唔係台灣人, 只係熱愛台灣菜 平時成日會跟台灣食譜煮吓台灣菜咁囉, 尤其因為我住澳洲, 無香港咁方便隨時可以去台灣玩嘛, 想食就惟有靠自己啦
    [版主回覆05/25/2011 22:39:00]OIC~ 咁唔怪之妳唔知果個叫做"掛包"啦!
     
    咁妳果邊多唔多台灣食材賣架?
     
    雖然我都唔可以隨時去台灣玩,不過而家英國進口咗咁多台灣食品; 有時台灣blog 友又會寄d好野益我,喺英國都可以整到台灣風既食物,我已經好滿足咯~
     
     

    回覆刪除
  35. 多謝
    [版主回覆05/25/2011 22:34:00]
     
     

    回覆刪除
  36. Herbivore Cats 食菜貓貓2011年5月25日 下午7:29

    要買的話都買倒唔少嘅, 不過當然唔齊啦, 但如果自己煮的話, 有時好多食材都可以自己變通搵嘢代替嘅
    [版主回覆05/27/2011 01:48:00]喺外國生活係咁上下架嘞~ 有得賣已經好好!
     
     

    回覆刪除
  37. 我都估唔到呀﹗睇相先知咁多華人既?~ 我鐘意滷麵筋同鹹蛋糕呀﹐聽個名好吸引 ~
    [版主回覆05/27/2011 21:13:00]其實蘇格蘭係有好多華人架! 不過大部份係大陸 + 香港人~ 我只係無唸到連台灣人都有咁多~
     
    鹹蛋糕我第一次食咋! 真係好正呢~~~ 另外滷昆布我都係第一次食,我初時以為會好腥,點知原來好鬼正!!!
     
     

    回覆刪除
  38. 我都一樣好鐘意台灣美食,好想去台灣呀,我去過一次甘多嘅台北,好想去下台中.
    係呢個陰鼓係乜,点用嫁?
     
    [版主回覆05/28/2011 03:48:00]其實即係豆豉!  台灣西螺生產既豉油好出名,我唸豆豉品質都應該有返咁上下,所以買來試吓囉!
     
     

    回覆刪除

Related Posts Plugin for WordPress, Blogger...