2011年3月3日星期四

孖T跨年回"香"省親2010 - 廚房既收穫 (特長!!!!)

我個香港跨年之行仲未完果喎!

話哂今次返香港返得耐嘛,仲有好多餐香港美食未記低呀......

不過今篇唔講玩唔講食,而講吓喺香港有咩收穫!

衫褲鞋襪果d就唔講嘞,因為逐件攞來影相都幾係野......

講吓香港之行後,我個廚房多咗d乜野啦!

As usual - 行李超重!

雖然Mr.T 先返英國時幫我帶走咗好多野,不過就係因為我恃住佢幫我帶咗好多野返英國......所以之後我又大買特買!

Emirates 每人可以有30kg~ 結果老公37kg; 我自己35kg! (無罰錢啊~ )

回正題 - 廚房收穫!

唔洗錢既收穫......

 一落機當晚,已經收到一套我好鍾意既茶杯!

是咁的......我一直好想買一套類似咁既英式茶杯組~ 不過我唔係真係用來飲茶,只係想用來影相!

話明係英式,依度當然有得賣,不過一直揀唔啱我鍾意既花紋......

我記得之前返香港喺Sogo 見過好多好靚,2百零3百蚊一套既英式茶杯組,所以今次返香港前同老公提過返到香港搵日去Sogo 睇睇~

返到香港當晚我地返V家見V爸爸V媽媽,傾傾吓計V媽媽突然攞咗2套咁既茶杯出來問我要唔要......

老公一睇都即時"咦......"咗一聲!

 我 (問V媽媽): 妳點知我想要一套依d杯架?

 V媽媽: 我唔知架! 我喺街邊檔見到幾靚覺得妳會鍾意咋,如果妳唔要我就送比人架嘞!

哈哈~~~~ 真係知女莫若母呀!

我根本從來都無同V媽媽提過我想要一套英式茶杯組~

雖然依套只係幾十蚊既街邊檔貨仔,但個花真係好靚我好鍾意!!


 依隻有少少似高跟鞋既物體,係一個可調較不同份量既量羹~

99知我鍾意整野食,佢行街時見到依個量羹覺得好得意,買咗送比我!

上海街戰利品.....

 Mr.T 陪我去咗轉上海街~

 最重竟然係依隻透明膠蛋糕盒! (二德惠)

間中會整蛋糕比99或朋友,但英國好難搵到依種靚靚蛋糕盒! 今次一口氣買咗10個盒 + 10個蛋糕托,有排用!

 整餅材料 + 配件 (右下角既係食用金箔!)

 年年有餘年糕模 - 圓形果個其實都係年年有餘來架~

大魚 + 細魚模因為太大,要剪走d角位先放得到入鑊蒸!

上海街之行最正既收穫 - 一套48款唧花咀~

想買依套野好耐架嘞,英國既唧花咀套組下下要幾十鎊一套架!

啱啱去到上海街睇頭頭果幾間店已經見到依套野(一模一樣!),但價錢全部要過百,當時老公催我快d買 - 佢費事我後悔遲吓要行返轉頭......

不過我最後証明咗 - 買廚具依家野始終都係女人叻!

因為行到尾尾幾間,比我搵到一間依套野只賣$95~ 成交!!

哇哈哈~~~~~~

Jusco 10蚊店戰利品......

一得閒我就走去行Jusco 10蚊店!

 一行就行足粒幾兩粒鐘,每次都唔會空手行出門口......

日式煎蛋pan - 睇咗依個野已經幾年,每次攞咗上手最後都放返低......

因為其實依個pan 都幾無聊!

 蛋糕紙盒 + 長紙杯

 大咋朱古力筆

 煲墊 + 花花圍裙

 不鏽鋼蛋糕忌廉花紋刮

 切蔥絲器

 廚用隔渣器

 心心碗

 豬仔膠墊、木煲墊 + 意粉量度器

我好鍾意 仔型既廚具架! 每次見到都一定唔會放過~

除咗廚房用品之外......

 我喺Jusco 仲買咗好多唔係廚用既野......

 可以裝上任何膠水樽既花花型淋花膠蓋 (cute! )

 著上腳好舒服裡面有毛毛既暖暖襪 (我買咗2對! )

 化妝打底液 + 馬油hand cream

今次喺香港唔敢再狂買化妝護膚品,因為上次返香港買咗太多,有好多仲未開呢......

 大咋刻章用既擦膠

 買來刻印章用既切割膠墊板

其實我本身都有一塊,不過果塊好鬼大......

咁點解今次買咗2塊細呢? 因為我第一次去心急買咗塊細綠色,後來再去時先見到塊粉紅色,我貪靚買埋佢~

 液體粉筆

 For 我廚房塊心型黑板!

 日式插花針 (劍山)

想試吓玩日式插花好耐嘞!  不過英國買唔到劍山,上網買又好貴~

深水埗意外收穫......

陪老公去深水埗黃金商場,經過一間裝修簡陋既廚具貨尾夜冷店......

 入去打個白鴿轉就買咗個超平燉盅($20) + $10/5個白瓷筷子座~

想買一個燉盅好耐架嘞!

不過中式超市既燉盅一律係白色配死人藍花紋,而且盅身太高 + 價錢又貴......

 依個矮身燉盅顏色花紋清淡,只售$20~ 筍!!!!!!

食得落肚既收穫......

 工展會帶咗2枝依度買唔到既豉油返來~

 CitySuper 買既日本綠茶粉 + 台灣低筋麵粉~

基本上英國無低筋麵粉賣,所以之前返香港會買日清薄力粉帶返來~

今次試吓依隻台灣低粉,價錢比日清平一半啊!

 依咋係V媽媽 + auntie 送比我既海味~

除咗有2罐鮑魚之外,仲有......

 花膠

 日月魚

 沙蟲乾

 乾螺頭

 我每次返香港,有一位auntie 一定會送我大包佢自己親手曬既靚菜乾~

Auntie 曬既菜乾,係我食過最好食最香既菜乾呢! 

自家製真係零舍唔同!

另外仲有喺香港時blog 友們送我大咋正野美食 (網誌),我個廚房幸福到爆哂棚啊~~~~



40 則留言:

  1. 情若無花不結果2011年3月3日 上午7:58

    請問妳去邊間jusco 10 店呀, 我都想買古古力筆。thx
    [版主回覆03/04/2011 02:21:00]旺角創興廣場分店~
     
    依間係我去得最多既Jusco 10蚊店!
     
     

    回覆刪除
  2. 大有收獲喎! 有 D 我都 o岩我喎! Jusco 10 我有去 o架! 等我返到 HK 都去上海街行 o下先!
    [版主回覆03/04/2011 02:20:00]我次次返完香港都係咁架! 所以每次都會過磅.......
     
    上海街真係好多正廚具店架! 妳下次返去一定要去行吓!
     
     

    回覆刪除
  3. waakkaaa...陣容鼎盛呀!
    [版主回覆03/04/2011 02:18:00]所以我 + 老公都超哂磅囉!
     
     

    回覆刪除
  4. 唧花咀唧花咀我也有一套,我的是28个,9.90镑在T K Maxx 买的。
    海味可以入境吗??伦敦机场会不会比较严??
    你这个trip 真的是“大” 收穫。
    [版主回覆03/04/2011 02:10:00]TK Maxx 係好多正野! 衰就衰在唔係妳想要既野佢就一定有......
     
    無人叫妳大搖大擺手提帶海味入境架嘛! 我係入喼寄倉既,如果妳唔敢試一係就打箱郵寄~
     
    我次次返親香港都係咁架! 所以每次都會過磅....
     
     
     

    回覆刪除

  5.  
    我見到有盒乳化劑wor~我成日都想做實驗比較下落唔落乳化劑有無分別.....但一盒好似有排用,所以我每次見到都想買無買。試過好用的話,麻煩界紹下
    [版主回覆03/04/2011 01:54:00]依隻係膏狀既乳化劑,我未用過,因為依度無得賣~
     
    不過我之前用過另一隻英國買得到既粉狀乳化劑來整紙包蛋糕,質感真係好似街買紙包蛋糕! 後來介紹咗比另一位英國網友,佢都話好用! 兩隻都係乳化劑,我唸都係大同小異既啫~
     
     

    回覆刪除
  6. 嘩...大掃貨!好似掃o左成間shop返屋企咁~ 不過jusco 10蚊店真係好好行!好多平又令o野買!
    [版主回覆03/04/2011 01:51:00]嘻嘻~~~~ 我次次返完香港都係咁架,仲未計我喺香港買既衫褲鞋襪、書呀...同埋其他立雜玩具喎!! 有咩辦法唔過磅......
     
    我超鍾意Jusco 10蚊店! 千色10蚊店都唔錯~ 如果依度都有間就好咯~~~~~
     
     

    回覆刪除
  7. Wow, you bought and brought a lot of useful things. Also, a lot of excellent gifts .
    [版主回覆03/04/2011 03:17:00]haahaa~~~~ that's why my luggage was over weight!
     
     

    回覆刪除

  8. 我第1次見咋, 真係幾好用咁喎 , 搵日我去睇下先得呀 .
    [版主回覆03/04/2011 06:17:00]依個蓋有幾個款 + 顏色架!
     
     

    回覆刪除

  9. 今期中獎啦  按
    [版主回覆03/04/2011 23:08:00]多謝蟻兄贈字啊! 好鬼鍾意呢~
     
     

    回覆刪除
  10. Gaileは林家歐巴桑2011年3月3日 下午4:44

    哇...好多正野呀
     
    果個蔥絲器我都有隻,而家蒸親魚用伴碟既蔥都係用佢
     
    我本來都想寄兩包低粉過妳架,但都估到妳返香港會買,所以得妳用完先再寄
    [版主回覆03/04/2011 23:07:00]個蔥絲器好唔好用呀? 我個仲未開光! 我都買咗個比V媽媽~
     
    係喎~ 妳好似係用依隻低粉果喎!
     
     

    回覆刪除
  11. 收鑊好豐富呀
    [版主回覆03/04/2011 23:05:00]哈哈~~~ 一年一次嘛!
     
     

    回覆刪除
  12. 我都有買果隻綠茶粉,同埋 台灣啲牌子的中筋,高筋粉,我唔係用佢地去學你的 v 女 pizza ,真係好好味!
    [版主回覆03/04/2011 23:05:00]係呀? 依隻綠茶粉正唔正架? 我仲未開呀~ 不過我覺得依罐野好貴啊......
     
    原來依隻台灣麵粉仲有中筋 + 高筋架? 我無留意只買咗低筋,因為中筋 + 高筋英國都好易買得到~
     
    我記得妳整個pizza!  其實pizza 只要學識整個底就一定會整得好味架嘞~
     
     

    回覆刪除
  13. 我係百佳見到有很多外國返來的貸品,不過價錢就很貴,又要運費.相信英國的生活指數比香港高很多,是嗎?
     
    我偶爾在一些家品店都看到一些用品很美,不過家中有太多雜物,要待油油後才買
    [版主回覆03/04/2011 23:00:00]英國物價喺歐洲來講係數一數二貴架! 而且間間超市或店賣既野都差唔多,唔似香港咁多選擇,所以我返親去港都會買到行李超哂磅.....
     
     

    回覆刪除
  14. 我都成日係10蚊店掃貨架,不過我真係從未見過粉紅色墊枱墊呀,你係邊間10蚊店買架???thanks~~~
    [版主回覆03/04/2011 22:59:00]粉紅色枱墊?  無枱墊喎......
     
     

    回覆刪除
  15. 個支馬油手霜,我覺得幾好用!
    [版主回覆03/04/2011 22:55:00]其實馬油手霜我都用過架! 不過之前Jusco 10蚊店賣另一隻白色tube 既馬油手霜,即係依枝:
     
    我都覺得幾好用啊~ 所以今次見到橙色依枝又買來試吓!
     
     

    回覆刪除
  16. 大收獲呀 !!!!!!!!!!!!!! 女人始終最愛shopping +買到平靚正既野 
    [版主回覆03/04/2011 22:52:00]我最鍾意平靚正既筍野!  所以我咁鬼鍾意去10蚊店~
     
     

    回覆刪除
  17. 好利害...大堆頭既禮物, 証明大家都好錫你...你要煮多D好送呀...
    [版主回覆03/04/2011 22:51:00]唔係全部禮物來架! 有好多係我自己買架~
     
    當然大家真係好鍚我啦!
     
     

    回覆刪除
  18. 我有排失控地係咁買杯,碟同碗...個櫃一下就俾我塞到爆左...而家因為無位擺...已經要control自己啦...哈哈哈~
    個日我見到個Le Creuset煲on sale...超想買...不過最後都control到~即刻覺得自己好有自制能力!不過見到D首飾on sale就即刻買左~因為我個jewelry box仲未滿
    [版主回覆03/04/2011 22:50:00]我唸我都要開始訓練自我控制能力!
     
    手袋、鞋、化妝護膚品我已經開始控制得到; 但衫、廚具、書...暫時仍未戒到!
     
    唸唸吓我好似未試過自己買首飾比自己~  我d首飾全部係V媽媽 + Mr.T 送既,我個已經滿滿地,有d已經入咗保險箱咯~
     
     

    回覆刪除
  19. 我想講Mr.T畫d公仔真係好鬼正, 係喎,你剪咗頭髮駛唔駛叫佢改改你個blog 張動畫相呀! 衫褲鞋襪戰利品其實都好想睇, 不過要你太麻煩當然唔好啦, 我知仲有大把機會嘅!
    [版主回覆03/04/2011 22:41:00]唔洗改啦! 果個煎魚公仔係我開blog 時Mr.T 特別為我而畫架嘛,我最鍾意依個公仔~ 而且我將來都會留返長頭髮既!
     
    衫褲鞋襪我唔影嘞! 洗既洗咗,摺既摺好......而且我唔係大家想像中咁得閒!  
     
     

    回覆刪除
  20. 收獲好豐富喎...........見倒好開心
    [版主回覆03/04/2011 22:37:00]我每次返香港收穫都好豐富架!
     
    所以每一次行李都超重.....
     
     

    回覆刪除
  21. 我好羨慕你的乾貨呀~
    [版主回覆03/04/2011 22:36:00]寄乾貨去德國得唔得既呢??
     
     

    回覆刪除
  22. 我都好鍾意行$10店, 朱古力筆好用不過要浸暖佢。
    [版主回覆03/04/2011 22:30:00]我超鍾意Jusco 10蚊店! 如果我依度都有一間就好嘞~
     
    係呀~ d朱古力筆係硬架嘛,唔浸軟佢根本唧唔到!
     
     

    回覆刪除
  23. 妳媽咪買o個tea set好掂呀又平, 佢咁好眼光既!
    [版主回覆03/04/2011 22:29:00]套杯真係又靚又抵! 後來我都見到賣杯既街邊檔,有幾個款唔同花,不過V媽媽揀依套最靚~  而且杯身好薄好輕,攞上手同Sogo 賣既骨瓷貴野無乜分別,呃到吓人架!!    
     
     

    回覆刪除
  24. 個花花型淋花膠蓋真係好得意呀!! 同埋套唧嘴真係好抵呀~~ 仲有套茶杯真係好得! 睇唔出係幾十蚊貨仔呀!!
    [版主回覆03/04/2011 21:07:00]個淋花膠蓋花灑果邊其實幾廢! 得個樣得意架咋,不過管果邊幾好用~ 用水樽無一般淋花花灑咁大隻!
     
    套唧咀真係好正呀! 好開心買到咁平~
     
    套杯真係又靚又抵! 後來我都見到賣杯既街邊檔,有幾款唔同花,不過V媽媽揀依套最靚~ 而且杯身好薄好輕,攞上手同Sogo 貴野無乜分別架!
     
     

    回覆刪除
  25. 蛋pan我都係睇左好多次,拎左起手好多次但最後都無買到! 次次返香港都諗好耐買唔買好 珮夫人
    [版主回覆03/04/2011 22:26:00]哈哈~~~~ 係啦~ 其實唔洗依個蛋pan 都整到玉子既!
     
     

    回覆刪除
  26. 搵日我都要去$10店買個煲墊+豬仔木煲墊
    [版主回覆03/04/2011 22:25:00]果塊豬仔木墊我買時本來有好多塊架,後來我想再買多幾塊,再去已經一塊都無嘞......  希望妳會搵到啦!
     
     

    回覆刪除
  27. 其實英國有低筋麵粉賣架, 不過要去Japanese Centre. 佢有日清薄力粉賣, 但係就要去LONDON 同埋貴少少。你可以上佢個網買, 佢有DELIVERY。
    [版主回覆03/04/2011 22:24:00]我知倫敦Japan Centre 有得賣,(Japan Centre~ not Japanese Centre!) 我話英國無低筋麵粉賣,係指一般超市無得賣~
     
     

    回覆刪除
  28. 嘩!收獲好豐富呀!
    [版主回覆03/05/2011 00:07:00]係呀~ 所以我同老公行李都超哂磅!
     
     

    回覆刪除
  29. 嘩~ 真係大豐收喎 我都係每次返去都超重! 有次本來得30KG, 但係我個LUGGAGE 43KG 佢都照比我過呀  但其實我個時都唔覺得自己買左咁多野架!其實我次次都係超起碼5KG!  上年12月個次搭FINNAIR, 個地勤同我講由於HK機場既安全理由, 每個LUGGAGE 唔可以超過35KG~ 係都要我執番D野出黎呀! 我依家先知原來我被呃啦!
    [版主回覆03/05/2011 02:54:00]依咋只係我廚房野既收穫,另外我仲有大咋書、衫褲鞋襪 + 其他玩具呢......  點會唔超吖?
     
    比人呃? 比邊個呃呀?
     
     

    回覆刪除
  30. 被CHECK IN 個個STAFF 呃我每件LUGGAGE 唔可以重過35KG(基於安全理由喎) 而呃我拎番D野出黎~ (不過我點都唔ARM, 因為我得30KG但帶37KG 野) 我講件好瘀既野比您知吖~ 我上次番HK竟然係HK機場蕩失路!   因為佢D指示牌太唔清楚(同埋我白痴!), 指示牌係叫我行左去拎LUGGAGE, 但係我見所有人都行右, 因為跟人群心態我咪跟住行右。。行到一半時, 我見到個指示牌話右邊係轉機! 跟住我就好迷茫唔知點算好就問D地勤。。。原來係行左或者右都OK, 不過行右(路牌係講轉機)係快D。。。我真係勁爆lol~
    [版主回覆03/05/2011 03:27:00]點解妳覺得佢呃妳呀?  我仍然唔係好明......
     
     

    回覆刪除
  31. 唔好意思呀~ 我諗我講野講得實在好唔清楚。。。 因為MR T 可以帶37KG 野 再加上係個次之前都帶過43KG野,咁如果真係基於HK機場安全理由的話, 應該係個個人都唔可以架!  所以我咪係到諗上次個FINNAIR STAFF係咪睇人而定!我被呃左無得帶埋個D野黎UK~
    [版主回覆03/05/2011 20:23:00]哦~ 佢地唔係呃妳! 每間航空公司規矩未必一樣嘛,而且佢地比唔比妳超重係好睇check in 果個人架!
     
    好似我咁多年來返親英國每次都係超重,大部份check in 哥哥都會放我一馬,不過都試過幾次比人罰錢 - 但check in 果個全部都係女人!
     
    間間airline 都係睇check in 時妳好唔好彩! 如果下次check in 果個人一磅都唔比妳超,妳唔好同人拗添呀!
     
     

    回覆刪除
  32. "割膠墊板",我地通常買呢啲墊板放係office用黎墊枱
    [版主回覆03/05/2011 20:15:00]哦~ 果塊! 我喺旺角創興廣場分店買架!
     
    依間分店我去咗好多次,但我只見過粉紅色一次,綠色就大把,另外好似仲有一隻粉藍色架~
     
     

    回覆刪除
  33. 如果唔係你介紹啲用具,有啲我都唔知點用 : P
    原來有咁多得意既用具.等我得閒都去行下十蚊店先^^
    [版主回覆03/05/2011 20:08:00]10蚊店真係好好行! 每次去都好有尋寶感覺~
     
     

    回覆刪除
  34. 嘩,真係好多野BOR~咁味會超重囉?!
    高跟鞋羹~幾得意WOO!買左咁多野,要等閒整下啦WOO~
     
    係味$10個???
    [版主回覆03/05/2011 20:07:00]依度只係廚房既收穫來咋! 我另外仲有好多書、衫褲鞋襪 + 其他立雜玩具......我 + 老公都超哂重!
     
    其實我每次返完香港行李都係超重,有時好彩check in 哥哥好人就放我一馬; 不過check in 係女人我就無咁好彩嘞,所以都比人罰過幾次錢~
     
    高跟鞋量閉羹我都係第一次見咋! 我都唔知99喺邊度買~
     
    係呀~ 心型碗喺Jusco 10蚊店買,10蚊個咋!
     
     

    回覆刪除
  35. 您知嘛, 睇完您BLOG, 我都走去買左包乾螺頭返來呀
    [版主回覆03/05/2011 20:01:00]乾螺頭煲湯好鮮甜架!
     
    煲完飲湯時沾豉油來食仲好好味呢~
     
     

    回覆刪除
  36. 但十元店有很多東西eg食物是$12,都不是十元的。有時感覺不太抵!
    [版主回覆03/05/2011 21:29:00]係呀~ 十蚊店所有食物都係賣$12架! 而且 其實有部份非食物其他貨品都唔係$10架~
     
    不過我唔會覺得唔抵~ 好似朱古力筆咁,我見有d烘焙店賣$10一枝,不過質素無10蚊店果d咁好,我寧願買$12一枝!
     
     

    回覆刪除
  37. 隻綠茶粉幾香而且你有機,我會用嚟整紅豆緣茶蛋卷,而台灣果隻麵粉有中,高筋,我已MARK低係個SHOPPING LIST,等你下次返香港時送俾你作見面禮。
    [版主回覆03/06/2011 00:47:00]係呀~ 等我搵日沖來飲吓先! (我好鍾意飲用綠茶粉沖既綠茶架! 即係好似元氣食壽司咁飲法~ )
     
    先多謝choi yee~  不過其實係因為英國無低筋麵粉賣,我先會返香港買低筋麵粉帶過來架咋! (英國人整蛋糕用自發粉!) 不過中筋 + 高筋麵粉英國周圍都買得到,而且好多質素都好好!
     
     

    回覆刪除
  38. 係呢?我想請教您?您煲乾螺頭係咪唔駛出水(老闆娘咁教)?
    [版主回覆03/07/2011 17:56:00]我好似焗花膠筒咁焗水 - 即煲滾水後熄火,放乾螺頭入去,然後蓋蓋焗過夜~ (唔洗加薑蔥!)
     
    不過我之前有另一隻螺頭就咁用熱水浸2、3粒鐘就煲得,不過果隻螺頭無咁好食! 我唔知妳係邊種螺,所以妳最好跟老闆娘教妳方法~
     
     

    回覆刪除
  39. Where is the 街邊檔 your mom bought the 英式茶杯組? I want to buy one set too!

    回覆刪除
  40. 好佩服你地,你地2個人點帶晒返英國?請問++埋埋幾重?
    [版主回覆04/02/2011 22:22:00]我地今次搭Emirates,每人有30kg~ 我老公先返英國,佢個喼37kg; 我個35kg,2個都過到骨無罰錢! (其實上面第一段都講咗!)
     
     

    回覆刪除

Related Posts Plugin for WordPress, Blogger...