2011年3月23日星期三

二人世界又中又西 - 2011年3月21 - 23日 (附食譜)


2011年3月21日: 白酒鮮蜆大蝦意粉

自覺手術康復後都幾勤力煮飯~

不過唸唸吓 - 今年好似無乜煮過西式野喎!

早前同99佢地去街食飯(網誌),食咗一餐好把鬼既意大利野,心有不甘!!

既然出街食得唔過癮,咁就等我自己黎啦......

 老公食咗一啖即時話: 哇~ 妳依碟正幾多呀~ Paperinos 果碟真係好難食!!

2011年3月22日: 泗和行昆仲軒任食打邊爐

星期二晚有少少偷懶,唔想叫外賣但又唸唔到想食乜......

最後又去咗打邊爐!

 最近都幾常去昆仲軒打邊爐~ 每次每枱都會按人數送饅頭,佢地d饅頭真係好好食啊!

搞到我又心思思想試吓整饅頭嘞~~~~~


發現原來昆仲軒打邊爐有兩種牛肉,當然2隻都要試吓啦!

一種係普通打邊爐既肥牛;

 另一種原來係牛爽來喎!

早排返香港同blog 友去打邊爐,Fian 介紹我食牛爽一食鍾情!

估唔到返到來Glasgow 都可以食到香港既好味道啊!! 呵呵~~~~

其實我每次同Mr.T 去食任食打邊爐都好頂佢唔順!

因為食親打邊爐佢都會食到嗌"好飽"......

 但無論佢幾飽都好,佢都一定會去攞果咋賣相不佳既七彩甜品......

食完佢又一定會話: It wasn't really good!

之但係下一次再去既時候,佢依然會一路嗌飽一路食依咋七彩甜品!!_1282.gif image by veronica_tsim


2011年3月23日二餸一湯: 青紅蘿蔔煲鱆魚; 香茅醬豬扒 & 魚香茄子煲

 上星期有網友喺FB提起青紅蘿蔔湯,搞到我又想飲!

其實而家Glasgow 既中國超市一定買得到青蘿蔔......

 不過自從我由一位德國blog 友處得知依舊洋人超市經常買得到既Swede,可以用來代替中國青蘿蔔之後,我就無再買過中國青蘿蔔嘞!

依舊Swede 除咗比中國青蘿蔔平之外,味道同青蘿蔔完全無分別,而且煲出來既青紅蘿蔔湯更甜更好飲!!

食物櫃既汁醬調味料爆哂大棚! 要努力清吓貨嘞~

 用blog 友Mami 阿四送既李X記香茅醬整個快手豬扒!

Tesco d茄子好平~ 單買1隻要8XP; 不過一包3隻脹卜卜好靚只賣鎊幾銀,於是買咗一包;

硬櫃有半pack 之前滾湯用剩既免治豬肉......

 就來個魚香茄子煲啦!

自從我唔再用現成魚香茄子醬,改用V媽媽方法去煮魚香茄子後,老公每次都話仲好食過出街叫既!!

其實......我自己都覺得好好好好食啊! 哈哈~~~~~~

>>>>>>>>>>>>>>>>>>>>>>>>>>>>>>>>>>>>>>>>>>

唔知由幾時開始,每次食完飯我都一定會問Mr.T......

我: Honhon~ 依餐比幾多分呀?

老公: 10 million out of 10!
(Mr.T 每次都係咁答! 有時係20 million out of 10...完全唔make sense!! )

我: 你餐餐都係咁答! 咁鬼行貨......

老公: 咁餐餐都係咁正嘛! 妳唔覺得我餐餐都食得好開心咩??

其實......
就係因為老公餐餐都食得好開心,that's why I love to cook!



 白酒鮮蜆大蝦意粉食譜click here~

 青紅蘿蔔煲鱆魚食譜click here~

 簡易泰式香茅醬豬扒食譜click here~

 魚香茄子(V媽媽做法酒樓味道版)click here~




16 則留言:

  1. SWEET 到爆 ,仲爆過你個醬料櫃 不過,都係因為另一半食得開心又滿足,至有推動力鞭策我去煮餸呢
    [版主回覆03/24/2011 21:12:00]雖然話另一半唔食自己都要食......不過一路食飯一路有人讚自己來"送飯",餐飯都特別好味架!
     
     

    回覆刪除
  2. You and your honey are sweet couple.
    [版主回覆03/24/2011 21:08:00]Thanks Dai Fa Tung! (but Mr.T is sweeter than me~  )
     
     

    回覆刪除
  3. 絕對認同, 食嗰個食得開心, 煮嗰個就最滿意!
    我成日都想煮魚香茄子, 但怕油膩無煮過...要跟V媽學下嘢先得...
    [版主回覆03/24/2011 21:08:00]間中我無乜胃口,煮完唔想食,但見老公食得津津有味,一路食一路讚,我都覺得煮完一大輪好值架!
     
    V媽媽依個方法煮魚香茄子完全係出街食既味道! 不過因為茄子係油炸,所以煮出來係油膩果喎!  (如果用水煮茄子,效果出來會好水架!!)
     
     

    回覆刪除
  4. Gaileは林家歐巴桑2011年3月23日 下午11:48

    妳煲湯個煲影到蓋喎,勁
    其實我喺食邊超市有見到好似swede咁架,不過我又唔肯定係咪同一樣野黎既,問d人完全雞同鴨講,佢地話好補 搞到我都唔敢買,買咗唔一樣又唔知點煮咪屎....
     
    妳老公比好高分妳呀,對佢黎講係好make sense架...好過我問我老公啦,佢次次都唔會比滿分我架,最高得9分,果一份永遠係"有進步空間"
    [版主回覆03/24/2011 20:53:00]妖~ 人地個煲蓋咁啱放喺隔離嘛!
     
    妳果邊係咪無中國青蘿蔔賣架? 如果無的話,有依舊swede 就煲到青紅蘿蔔湯架嘞! 唔知中文叫做乜,不過google 話叫瑞典蕪菁喎~ 好補? 我又唔覺喎,飲完湯都無流鼻血! 當歸夠補啦,台灣人咪成日食!
     
    哈哈~~~~ 妳老公口不對心! 佢可能怕妳囂呀!!
     
     

    回覆刪除
  5. 我好鍾意食魚香茄子, 我一定會試v媽媽教o既煮法整先得!!
    [版主回覆03/24/2011 20:45:00]V媽媽依個煮法真係好正! 完全係出街食飯咁既味道!! 用魚香茄子醬煮出來完全係兩回事~
     
     

    回覆刪除
  6. 你煮的 香茅醬豬扒好像好“正”,是不是辣的呀!!
    每餐吃完,我都会问我老 公“我这餐煮的什么是最好吃的??”哈哈.....mmmm我们都需要些奖励。
     
    [版主回覆03/24/2011 20:43:00]個香茅豬扒醬唔辣架!  好香香茅味~ 不過英國無依隻醬賣,係一位香港blog 友寄比我既!
     
    哈哈~~~~ 我問親Mr.T 邊味餸最好食,佢只會答我味味都咁好食! 其實唔問佢,我都見到佢食得津津有味,不過承機想佢開口讚我啫!
     
     

    回覆刪除
  7. 自己整 好過出去食好多啦 起碼都會岩自己口味呢 你個意粉睇相我都流晒口水啦 你餐餐都咁用心去煮 你老公緊係比滿分啦
    [版主回覆03/24/2011 20:39:00]之前果間把鬼意大利野,唔關啱唔啱自己口味事,因為果間野根本就唔好食!
     
     

    回覆刪除
  8. 你 o個 邊有"任食 打邊爐"? 真係正呀! 我呢度乜都冇! 最近都要 30 分鐘車程呀! (來回就要個幾鐘!!)
    [版主回覆03/24/2011 20:36:00]係呀~ 依邊任食打邊爐有咗好耐啦! 以我所知最少有3間,不過泗和行昆仲軒我地去得最多~
     
     

    回覆刪除
  9. 哈哈,我也剛剛食完饅頭,又炸又唔炸!
    [版主回覆03/24/2011 22:50:00]我地唔係特登去食饅頭,只係依間任食打邊爐每枱都會送一籠饅頭啫~
     
     

    回覆刪除
  10. 可以煮野俾自己心愛既人食,而佢又食得開心係一件幸福既事
    [版主回覆03/24/2011 22:49:00]其實只要煮出來有人欣賞 - 心愛既人又好,屋企人又好、朋友都好,我都會好開心架!
     
     

    回覆刪除
  11. Hello Mrs. T, I quite often read your blog, and the foods that you cook are really nice. I would like to ask where can you get Swede from? is it from normal supermarket? P.S.: I'm studying in Nottingham now. Thanks! Queenie
    [版主回覆03/25/2011 19:47:00]Hello Queenie welcome to my blog~
     
    yes you can get swede from almost all supermarkets e.g. Asda, Tesco, Waitrose etc. they're a lot cheaper than chinese green turnips~
     
     

    回覆刪除
  12. 《Ka MaN 日記》2011年3月24日 下午4:08

    白酒鮮蜆大蝦意粉好味吖... 個樣仲靚過好多出去食嗰...
    等我都試下煮先...不過可能會係無蜆...因為呢排都無咩大鮮蜆賣..!!
    我向 melb 都係見過幾次有中國青蘿蔔賣...不過就又貴又唔靚(好幼+好唔新鮮)..我係之前睇過你 post 話 swede 係似地中國青蘿蔔..我就買黎煲湯...試過之後真係好香同好甜架 d 湯... 而家朋友仔成日都話要飲呢個湯..!!
    你見 Mr T 食得開心..你煮得辛苦都會覺得開心同值得...同個心都會好甜啦...!!
     
    [版主回覆03/25/2011 19:43:00]Thanks Ka Man! 蜆其實唔需要好大隻,普通炒蜆咁既size 就足架嘞~
     
    我來咗蘇格蘭咁耐一直都有青蘿蔔賣(成日都有!),不過有時都好唔新鮮! 而家轉用swede 來煲湯仲好,又平又新鮮又好味!
     
    哈哈~~~ 其實我太鍾意煮野食,完全唔覺得辛苦!
     
     

    回覆刪除
  13. 出面 d 意大利野得個名 , 又點及得上阿 V 既手勢呢 ?
    [版主回覆03/25/2011 19:33:00]哈哈~~~ Eddy 兄你又知?  
     
    唔係出面所有既意大利野都唔得既,係依間Paperino's 唔得啫!
     
     

    回覆刪除
  14. V女多羨慕妳有個欣賞妳廚藝的老公呢! 我都會像妳一樣問身邊人這餐飯好食嗎? 但每次都只會聽到淡淡言的一句 "幾啦" ! 有時都會有挫敗感呢 ! 每餐飯我真的用心去煮嘛 ! 可是......!
    [版主回覆03/25/2011 19:30:00]唔好有挫敗感,  每個人性格唔同嘛! 好多男人都係口硬心軟既 - 喺佢地口中"幾啦",其實佢地可能已經覺得好好食,只係性格唔同唔鍾意讚人!
     
     

    回覆刪除
  15. 哈....好彩我今晚食飽晒先黎探你
    [版主回覆03/26/2011 20:49:00]哈哈~~~ 咁睇完有無飽到想嘔既感覺呀?
     
     

    回覆刪除
  16. KwokMan kuen eunice2011年3月26日 上午7:13

    跟你個食譜煮下意粉先
    [版主回覆03/28/2011 01:05:00]依個煮法又快手又好食! 快d試吓啦~
     
     

    回覆刪除

Related Posts Plugin for WordPress, Blogger...