2011年3月14日星期一

進補宵夜 (2011年3月11日 + 12日)

之前有blog 友提醒我 - 手術後唔好即時進補! 
要過一段時間,等身體稍為康復,到時再慢慢補都未遲~

手術後至今已經個幾月,上星期五傷口又終於開始甩線,應該係時候可以補返吓嘞......

星期五晚(3月11日)99打電話過來,佢煲咗燕窩煲老雞,叫老公過去攞返屋企比我食!

 臨瞓前食咗一大碗當宵夜;
仲有剩一碗我就唸住同外賣佬Mr.T一齊分甘同味啦......
點知有人好串咁話: 我都唔鍾意燕窩!

咁留返第二朝早我做早餐囉!

之前比護士抽咗咁鬼多血......

 星期六晚(3月12日)我整咗盅"當歸紅棗燉牛腱"來補補血!

今次係我第二次整當歸紅棗燉牛腱......

我終於整到100%V媽媽整既味道嘞!

不過今次大意唔記得將牛腱先汆水 ,所以今次燉出來湯好濁唔夠清啊......

返香港時買既廿蚊燉盅開光嘞!

反正老公唔食依個,一盅for 我自己一個人啱啱好!

依個燉盅好洗好用,20蚊真係抵到爛!!


 當歸紅棗燉牛腱食譜click here~




22 則留言:

  1. 女人唔補好易老架...雖然我都唔食燕窩...但紅棗燉牛腱唔錯哦...
    [版主回覆03/14/2011 22:33:00]個燉牛腱有當歸架!  如果就咁用紅棗燉我唸可能無咩味.....
     
     
     
     

    回覆刪除
  2. 好浪漫咁想到MR T個句: 我都唔鍾意燕窩! 係想留番俾你..哈哈哈哈
    [版主回覆03/16/2011 01:21:00]哈哈~~~ 佢都會留比我而唔食既,不過佢真係唔鍾意燕窩......
     
     

    回覆刪除
  3. 試下鮮奶煲雞吖,都好夠味架!仲好補tim 呀!
    [版主回覆03/16/2011 01:20:00]好呀~ 搵次試吓煲依個先!
     
     

    回覆刪除
  4. 傷口開始脫線太好了
    真的要好好補一下
    那燉盅真的蠻不錯
    除了便宜以外比傳統那些漂亮多了
    gd taste
    [版主回覆03/16/2011 01:19:00]尋晚沖涼連最後條線都甩埋咯!  手術後我足足輕咗10磅,而家慢慢補返吓養返好身子~
     
     
     
     

    回覆刪除
  5. 燉牛腱 真係好多年都冇食過 因為冇亞媽煲 自己又唔識
    [版主回覆03/16/2011 01:13:00]燉野仲易過煲喎! 塞哂d野入去隔水燉之嘛~
     
     

    回覆刪除
  6. 人家唔鍾意燕窩! 係想你食多 D 咋! 仲話人家串! 都唔明人家心意!
    [版主回覆03/16/2011 01:12:00]哈哈~~~ 第二樣我唔敢講,不過Mr.T 真係唔鍾意燕窩呢!
     
     

    回覆刪除
  7. 剛剛才發現了mr. t的blog呀
    他畫的圖畫都很有風格很漂亮耶
    support
    [版主回覆03/16/2011 01:11:00]哈哈~~~~ 我幫佢賣咗廣告好2、3個星期架嘞,妳而家先發現到?
     
    代Mr.T 多謝妳! 佢幫好多佢既網友畫FB大頭相架~
     
     

    回覆刪除
  8. Gaileは林家歐巴桑2011年3月14日 下午5:30

    原來有多一碗燕窩剩呀?早知果朝早話食一碗啦
     
    睇黎個燉盅會出現一段時間,20蚊真係值回票價啦
    [版主回覆03/16/2011 01:10:00]係呀~ 老公攞咗一大兜返來嘛!
     
    真係好鬼鍾意依個燉盅! 又平又好用,顏色花紋又OK~
     
     

    回覆刪除
  9. 燕窩燉老雞我都鍾意食喎,我又燉下先
    [版主回覆03/16/2011 01:08:00]個燕窩老雞我99好似係煲唔係燉架......
     
     

    回覆刪除
  10. I like both .
    [版主回覆03/16/2011 01:07:00]me too~ gimme5!
     
     

    回覆刪除
  11. 妳好呀! 看妳Blog已一段日子了 , 但因我對開Blog寫Blog都好陌生 , 所以一直都未能留意給妳呢! 希望我可以好好學習, 快些可以跟妳分享生活的點滴!也很喜歡妳的Blog.
    [版主回覆03/16/2011 01:04:00]妳好呀SzeWan~ 歡迎妳啊! 
     
    其實Yahoo Blog 唔難用,只要妳試咗第一步,keep 住寫,好快就會上手架嘞~ 雖然我寫blog 唔係好叻,不過已經寫咗3年,好多function 都略知一二,如果妳問題隨時都可以留言,睇吓我幫唔幫到妳~
     
     

    回覆刪除
  12. 哈哈...咁啱我都有呢套燉盅呀! 我用佢來燉燕窩, 真係幾好用 !
    [版主回覆03/16/2011 01:00:00]係? 一模一樣架? 我喺深水涉貨尾舖仔買架咋~ 我貪佢矮身 + 個花清清地,仲有就係好鬼平!
     
     

    回覆刪除
  13. D人話進補係早餐時段好D WOR, 會吸收得好D架!
    祝你傷口快快復完 !
    [版主回覆03/16/2011 00:39:00]係呀~ V媽媽都係咁講! 所以佢成日半夜先燉燕窩for 第二朝食~ 不過我習慣唔食早餐架!
     
    thanks Au C9~ 表面傷口已經好返哂! 不過仲要等多2個月裡面傷口先完全好返!
     
     

    回覆刪除
  14. 當歸紅棗燉牛腱睇個名都知好補血
    [版主回覆03/16/2011 00:37:00]除咗補血之外,仲好香好好味架!
     
     

    回覆刪除
  15. 其實,MR.T特登唔食,留返俾你食咋?!
    [版主回覆03/16/2011 00:35:00]雖然平時我鍾意食既野,佢會特登唔食留返比我食......不過我知道佢真係唔鍾意食燕窩! 因為我叫佢考一啖佢都唔肯!!
     
     

    回覆刪除
  16. 真係要好好補番啦  唔係 MR T 同 V媽 V爸(仲有你d Fans) 都唔放過你架  ..
    [版主回覆03/16/2011 00:28:00]係呀~ 而家逐步慢慢補返吓!  
     
    哈哈~~~ 我依度無fans 架,blog 友就有好多~
     
     

    回覆刪除
  17. 情若無花不結果2011年3月15日 上午9:13

    大家減少去日本的網頁, 因海底電纜斷了, 日本部分網絡變得很慢 請把頻寬留給日本市民使用! 他們需要收到自己國家的最新資訊!! 拜託各位傳下去, 多一秒的時間, 可以救出一更多生命 !
    [版主回覆03/16/2011 00:26:00]支持! (最衰依度唔係FB,如果唔係比個"讚好"妳呢~)
     
     
     
     

    回覆刪除
  18. 2煲都係補野喎~~正呀 最衰自己d 感冒唔清, 我見你個當歸燉牛腱都好想飲呀
    [版主回覆03/16/2011 22:24:00]當歸燉牛腱真係好正! 不過我都只係間唔中先食吓,一年2、3次左右啦~
     
     

    回覆刪除
  19. 係? 一模一樣架?
    係呀一模一樣架 !
    不過我係幾年前買落架, 果時好似賣十零蚊咋
    [版主回覆03/16/2011 22:22:00]幾年間只漲價咗幾蚊雞,仍然抵到爛啊!
     
     

    回覆刪除
  20. 阿 V , 真係要補好身體先靚女架 !
    [版主回覆03/16/2011 22:21:00]唔係只為咗靚既! 身體唔好都唔慌靚得去邊啦~ 身體緊要過靚樣!!
     
     

    回覆刪除
  21. 提子乾唔知點解咁重酒味,濃郁到不得了,甚至有點蓋過了蘋果的味道。 麥穀好有咬口,加上鬆餅的麥味,鬆軟,有甜甜酸酸果味。
    [版主回覆03/16/2011 22:19:00]請問妳係咪搞錯咗回應錯咗blog 友?
     
     
     

    回覆刪除
  22. 咦?你呢個燉盅,我都有個一模一樣喎!我仲係一大一細添!
    大嘅就燉兩三個人嘅湯,細嘅就燉一人湯,好似你呢款湯,老公唔啱飲,咁我就用個細嘅燉俾自己飲囉!
    好使好用,我記得買時都係好平,不過太耐喇,已經唔記得幾錢了!
    [版主回覆03/16/2011 23:07:00]咦....原來咁多人有依個燉盅架! 我個係今次返香港時喺深水埗既意外收穫來: http://hk.myblog.yahoo.com/veronicams_tsim/article?mid=61184  
     
    20蚊真係好抵! 我個應該係細size,因為啱啱好夠我一個人飲! 我只見到依個size,無見到有大d啊~
     
     

    回覆刪除

Related Posts Plugin for WordPress, Blogger...