孖T跨年回"香"省親2010 - KTL Girls Gathering Part 2 (2011年1月7日)

由於Part 1 既gathering 時間唔多夠，傾得唔夠盡情既情況下結束......於是當晚飯局散既時候，即時定下日期決定要再聚一聚!  

多得偉大發明FB! 令我地一眾離校後多年無見既sis 有機會重聚......

 今次時間充裕下arrange 既KTL girls gathering，陣容好鼎盛啊~~~

正所謂"三個女人一個墟" - 依度9個女人再加1個男人(其中一位同學既老公)，足足3個墟有凸!!

咁大棚人，一般餐廳點會比妳地大班八婆嘈喧巴閉嘈足7粒鐘?

所以同學選咗位於佐敦既Voila Partyhouse，癲拿直落飲野......

 癲拿每枱一個燒烤爐，形式係任攞既自助式燒烤~

 依d唔係純食肆既地方，對食物唔可以有咩要求架嘞，不過有我鍾意既廚師腸 + 多春魚!

 一枱都係......真係好鬼污糟!!

時間飛逝......原來我地大家由中一相識，眨吓眼已過咗20年......

大家多年無見，不過再見返面一d都唔陌生!

除咗大家變得越來越索之外 ，基本上大家都無乜點變呢~

大家一見面就雞啄唔斷大談自己多年經歷 + 近況......

當中有人做咗師奶幾年 (e.g. 我); 有人新婚愉快; 有人享受緊拍拖生活; 有人事業有成.......

雖然大家各有不同生活圈子，多年來有不同經歷，不過大家都生活安好，開心健康，依點先係最重要啊!

 當年既中一光班......
大家太耐無見，邊傾邊影一大堆相......不過張張都差唔多!

 新婚既金童玉女，祝你地永遠幸福啊~~~~

7粒鐘話咁快就過，眨吓眼已經零晨3點幾......

大家仍然精力旺盛，其實唔想咁快散~

不過有人第二日仲要返工，有人book 咗晨早剪頭髮(我呀! )

有人決定第二日偷懶請假，最後留守到清晨5點幾......

入到lift 都要影，睇吓我地幾咁依依不捨!

各位sis 保重啊~ 要繼續開心繼續索下去!!

期待下次再同妳地相聚啊~~~~~

Love you all!