2011年1月15日星期六

太陽手 (2011年1月15日)

果真係人離"香"賤......

 喺香港返來第4日(即星期四)就賴野病鬼咗!
其實一日最衰都係Mr.T!

Mr.T自己一個返英國時我已叫佢自己要小心身體唔好冷親 - 佢一病親我就十次著咗十次都會比佢傳染賴野!!

點知我喺香港最後一個星期同佢傾長途電話時聽到佢咳到九彩,我返到來佢都仲未好返......

喺香港時V爸爸V媽媽輪流感冒,我都幸保無事; 但竟然比Mr.T打爛我齋砵!!!

反反覆覆咁退吓燒吓五顏六色咁病咗兩日,今日叫做精神返少少......

不過就咳到扒咗喺度!!

返來幾日一直都無煮過飯......

 今年第一次入廚竟然係煲止咳湯 - 龍脷葉羅漢果蘋果煲瘦肉~

 本來廿四孝V媽媽特別買咗老公至愛既長洲偉記極品炸魚皮~

不過當V媽媽知道老公咳到甩肺後,千叮萬囑叫我等佢好返先好比佢食!

頭兩日返到來我仲未賴野,為咗"鼓勵"老公快d好返,我好串咁喺老公面前一路食炸魚皮,一路同佢講......

: Honhon~ 你係咪好想食呢? 想食就快d好返啦! 如果唔係比我食哂架嘞!!

所以我懷疑老公因此懷恨在心,特登傳染埋我!!

當然......星期四朝早果2隻啱啱炸起既麥麥炸薯餅都要負少少責任既!

幾鬼靈"ken"呀 - 朝早食咗果2隻炸薯餅加個早晨全餐,晏晝喉嚨已經腫鬼咗,跟住就開始發燒嘞!!
唔舒服個人特別唔好老皮! 老公就繼續發揮佢既爛gag 皇精神......

我一發燒,個身 + 雙手(手掌)就會好熱好熱~

雙掌熱到好唔舒服 ,要成日用凍既濕毛巾抹手為雙掌降溫.....

老公: 咦~ Honhon~~ 妳而家去搓麵包咁咪啱哂囉!

我: 點解呀?

老公: 我睇"日式麵包王"話搓麵包要搓得好,就要有一對太陽手~ 太陽手好少有架! 恭喜妳!!



沒有留言:

發佈留言

Related Posts Plugin for WordPress, Blogger...