孖T回"香"省親2010 - 翠華餓鬼早餐 + 超驚喜灣仔書展 (2010年12月4日)

以前暑假返香港時一定會去香港書展~ 但近年絶少summer 返香港，已經好多年無去過香港書展嘞......

今次返香港之前得息12月香港會有2個冬季書展，我點可以錯過呢?

第一個就係12月4日至5日既"灣仔書展 - 閱讀在銅鑼灣"~

不過行書展前先要填滿我個黑洞!

地點: 佐敦翠華

 我 + Mr.T 兩丁友霸佔一張6人枱，點滿一枱食物!

除咗一人一份早餐之外，仲有......

 我恨食咗好耐既廚師腸煎雙蛋~

 又係我既淨魚蛋走片~

 豬扒皇老公要既豬扒包~

 老公至愛炸魚皮~

食完野我地就過海去銅鑼灣行街頭書展......

 可能時間尚早唔算太多人，完全唔迫行得好舒服!

書展不大，而家有好多幼稚園程度既兒童書，不過都行咗個零鐘頭~

之前睇新聞又話有"100蚊1袋書"既優惠，不過完全無發現!

 但我都好有收穫喎!!

 至筍係依2本!

書展前幾日我行書店見到依2本書已經想買，不過原價無折，所以我忍手 + 心想: 可能過幾日灣仔書展會有喎!

點知真係有喎!!

左邊果本"消失中的香港"有8折; 右邊果本"創意黏土手作遊蹤"仲加抵 - 半價!

哇哈哈~~~~~

 圖解DSLR 攝影技巧教學~

右邊果本雖然係簡體字，不過d公仔幾可愛!

 即將喺聖誕當日上映既宮崎駿編劇新作"借東西の小矮人–亞莉亞蒂"故事好似好有趣!

 關於日本人生活習慣既圖文書~

估唔到是日最大驚喜 + 收穫並唔係書展既戰利品喎!

行完書展我見Sogo 後門對面有間細細既樓上書店 - 銅鑼灣書店~ 反正都係買書mood，就順便上去及及啦!

書店好細 + 好窄......

 上到去唔夠半分鐘即時比我發現寶物 - 父與子全集~

超級興奮 + 忍住細聲尖叫，叫老公埋來睇.......

老公: 咦~ 竟然比妳喺依度搵到喎!

Vater und Sohn (父與子)係德國著名漫畫大師E. O. Plauen，於1934 - 1939年間既作品，當時喺德國"柏林畫報"連續發表咗3年，大受歡迎~

不過1944年3月E. O. Plauen 被納粹黨拘捕，被判絞刑前喺監獄中自殺，享年41歲。

Vater und Sohn 係一套集溫情、幽默，老少咸宜於一身既經典漫畫，內容有少少似我地既港產王司馬作品"牛仔"~ (或者應該話"牛仔"似"Vater und Sohn"先啱!!)

不過我個人覺得Vater und Sohn 比"牛仔"更有想像力，更加天馬行空!

80年代後期Vater und Sohn 全集曾經被翻譯成多國語言，小妹童年都有一套! (所以我知道Vater und Sohn 係好野來!) 不過隨住時光既流逝，我果套已經一早唔知去咗邊......

事有湊巧......我幾個月前仲喺英國時，好想要返一整套Vater und Sohn! 不停發癲上網 + 去書店搵，但可惜得到既答案係 - Vater und Sohn 全集已經絕版......

估唔到竟然比我喺一間小書店搵到! 真係超級開心 + 驚喜!!!! 

全套4本只售$59~ 有童真 + 有興趣既網友，可以去銅鑼灣書店睇睇~

依套書已經係1996年7月第二版，今次我一定要好好保存!!!!

(期待ing 23號既大眾書局冬季書展! )