2010年12月17日星期五

孖T回"香"省親2010 - 出發篇 (2010年11月29 + 30日)

返咗來差不多3星期,本來想襯返香港同Mr.T 去台灣或泰國玩幾日,不過一直都好鬼忙見依個見果個 ,期間屋企又有老人家冷親入咗醫院,唯有除消計劃!

周身唔得閒,依3星期都無乜時間上網.......

V媽媽事先向雀友講明 - 佢個寶貝女(即係我! ) + 佢個超寶貝女婿返咗來,所以雀局唔洗預佢!

不過Mr.T 星期二晚(12月14日)返咗英國,我由沙田搬返太子娘家陪V爸爸V媽媽~ 3星期無打過麻雀既V媽媽終於難忍手痕,今晚去咗打牌!

我終於可以盡情咁上返一晚網嘞!!

我一向有個怪癖 - 我鍾意順時間寫blog!

不過由於今次返香港既網誌已出咗打尖blog,但我又想記返低之前既野喎! 所以唯有破例一次玩玩時光倒流.......

 出發當日(11月29日)之前已經落咗幾日大雪,地上鋪滿厚厚積雪!

 渣車當然要特別小心特別慢,所以我地特別提早出門口!

一路渣車聽到收音機新聞報導話愛丁堡機場因為太大雪所以關閉,好多航班都受影響!

最憎飛機cancel 或delay! 真係好擔心連Glasgow 機場都會有咁既情況!!

好彩Glasgow 機場無事~~~~~~

 Check in + 入咗禁區後,就去 Frankie & Benny's 食個早餐暖暖肚~

 超奇怪既刀叉! 應該係因為已入禁區,防止有人收埋鋒利刀叉帶上飛機既保安問題!!

 餐廳大窗對正停機坪......

 遠處山頂全部都係雪雪雪........!!!

 停機坪 + 跑道剷咗一大堆雪啊!! 真係睇見都煩~~~~~~~

 假期都未正式開始,我地仍然喺Glasgow 機場,老公已經不停渣住電話交帶工事!

老公班staff 吼佢一放假就偷懶 -  賴大雪返唔到工,成11點幾銀行都唔開門!!

 飛機準時起飛!

 約7粒鐘後我地就到咗杜拜機場嘞!

 喺Glasgow 機場時因為落大雪,所以我著到成隻粽咁......

 不過到咗杜拜機場就好鬼熱!!

好彩我醒目 - 一早放定件短袖衫喺手提拉喼裡面!  去到杜拜機場即時有衫換!!

 因為喺杜拜機場要等6粒鐘先轉機去香港,所以有時間慢慢食咗餐好好味既晚餐!

 就係依間海鮮餐廳~

 餐廳裡面都好靚~

 我個Starter - Seafood Chowder~

 我既Fish Fried Rice~ (裡面有竟然有XO醬喎!!)

 老公既冬蔭海鮮湯~

 同埋海鮮炒飯~

依餐真係又平又好味!

可惜返英國果程唔夠時間食多餐......

 杜拜機場有個室內人工樹林好鬼靚!

 終於磨到轉機嘞!

又7粒鐘後 - 大約香港時間9pm 我地就到咗香港!

62 + 99渣車來接我地,點知阿62渣車行到半路喺青馬大橋爆呔........

青馬大橋職員喺CCTV見狀即時趕到幫手換呔,不過都搞咗成大半粒鐘!!

返到沙田放低行李,我 + 老公再飛的返去太子見V爸爸V媽媽,坐到2點幾就去食我地今次返到香港既第一餐正野............















 7仔叮叮點心!


 依個叮叮雞串燒好鬼鹹......

 依盒牛腩飯........唉~~~~~





21 則留言:

  1. 嘩 ! 你個傻瓜丫, 坐到凌晨 2 點去 seven 食叮叮 點心呀 !!
    [版主回覆12/18/2010 23:49:00]我 + 老公其實好鍾意食7仔點心架! 不過果晚揀正果d唔好味之嘛~
     
     

    回覆刪除
  2. Gaileは林家歐巴桑2010年12月17日 下午10:04

    正餐原來食7仔
     
    咁妳老公返返英國妳住返娘家係咪正好多呢??
    [版主回覆12/18/2010 23:48:00]其實我地好鍾意食7仔叮叮當宵夜架! 不過果晚揀正果d唔好食~
     
    當然係自己屋企最正啦!
     
     

    回覆刪除
  3. 我覺得波仔記d叮叮飯都ok架
    [版主回覆12/18/2010 23:45:00]我未試過波仔喎......
     
     

    回覆刪除
  4. 哈哈哈哈哈哈﹐機場早餐果的刀叉笑死我喇~ 嘩﹐我試過有一次係德國冬天飛曼谷轉機返香港﹐ 我係曼谷等果兩個鐘頭內﹐差的熱瓜﹗ 你地去食7記﹐咁你媽咪佢地咪唔陪你地一齊去囉?
    [版主回覆12/18/2010 23:45:00]係呀~ 果兩隻刀叉個樣好低能!
     
    其實我娘家果頭好多野食架! V爸爸V媽媽都話陪我地落街食野,不過我地唔想佢地夜媽媽落街,而且我地都有少少攰,想快手食完返沙田,所以先去食7仔!
     
     

    回覆刪除
  5. 好cute 唷,咁食ge係唔係 bb 餐, 如果叫 塊 steak 咁點搞ccc
    [版主回覆12/18/2010 23:38:00]應該係佢地特登磨倔d刀叉既~
     
     

    回覆刪除
  6. 如果妳鍾意叮叮飯一定要食波仔既雞脾飯好正架
     
    [版主回覆12/19/2010 16:04:00]真係好似個個都讚波仔好味喎!
     
     

    回覆刪除
  7. 你很Lucky ,那么大雪都上到机。
    [版主回覆12/19/2010 16:04:00]我都覺得好好彩! 因為愛丁堡咁近Glasgow,愛丁堡機場都關咗.....
     
     

    回覆刪除
  8. 嘩.. 不經不覺原來你已經返左香港三星期囉... 今日我呢度好大雪呀, 全日都困左係屋企, 我老公個同事因為今日有突發事, 所以出左去做野, 點知回程時遇到世紀大塞車, 佢迫住將架公司車泊左係公路邊, 之後行路返屋企..(行左四粒鐘!!)
    點解你要係杜拜轉機? Sortland無直飛傢?
    [版主回覆12/19/2010 16:02:00]好彩老公返到Glasgow 停咗雪咋! 佢架車泊咗喺機場long stay car park 都仲撻得著!!
     
    Scotland 係無直航一定要轉機果喎! 第一次搭Emirates 幾好吖,行李有成30kg,又唔洗一次過初十幾粒鐘咁辛苦~
     
    </ color="#000000"

    回覆刪除
  9. 係囉!話咁快就巳經返咗去三個星期啦!好羨慕妳返hk過聖誕吖......不過唔緊要追睇妳個blog都可以感受吓嘅......返到去真係要盡情咁食食食吖.......什麼叮叮吖,街頭小食,車仔麵等等等.......統統都係美食呀!如果唔係返唻又要節食啦!!heehee!所从要盡情享受呀.....玩得開心啲啦!雖然Mr.T暫時陪唔到妳,不過唔緊要啦.....返娘家都係最最最舒服嘅,又可以陪多啲V媽V爸呢!!開心~~
    [版主回覆12/19/2010 15:58:00]係呀~ 好似乜都未開始做,咁就過咗3星期! 老公返咗去就要返工,留低我喺度風流快活.....老公真係陰公豬~~~
     
    不過我都好耐無同V爸爸V媽媽一齊過聖誕嘞! 最衰我2月頭有緊要事,如果唔係我過埋農曆年先返英國呀!!
     
     

    回覆刪除
  10. 嘻嘻!我都話係波仔飯最好食o架!
    [版主回覆12/19/2010 15:55:00]咁等我都試吓波仔先!
     
     

    回覆刪除
  11. 其實用膠刀义咪得囉,攞嚟攪
    [版主回覆12/19/2010 15:55:00]肥媽咪~ 膠刀叉唔環保喎!
     
     

    回覆刪除
  12. 呢次返港都好多事喎。。。
    [版主回覆12/19/2010 15:52:00]其實都無乜野,都係小事來啫~
     
     

    回覆刪除
  13. 吾經吾覺你哋返咗黎三個星期嘞....真係快樂不知時日過呀....
    [版主回覆12/19/2010 23:34:00]係囉~ 3個星期除咗飲飲食食,好似無做過乜野咁......
     
     

    回覆刪除
  14. 果然醒呀! 識得帶定衫係杜拜着!
    [版主回覆12/19/2010 23:33:00]雖然杜拜機場有冷氣,不過都係好熱~
     
     

    回覆刪除
  15. 做乜要食叮叮既?
    [版主回覆12/20/2010 11:53:00]我地好鍾意食7仔叮叮架! 加上果晚探完V爸爸V媽媽又夜,想食完拿拿聲返沙田沖涼瞓覺囉!
     
    不過果晚唔好彩揀正唔好食既叮叮......
     
     

    回覆刪除
  16. 你老公今次和你返香港,都係拿大假?其實他都好錫你,我而家要急於出去,這篇日誌我未看,再回來留言給你
    [版主回覆12/20/2010 11:55:00]係呀~ 我老公一年有7星期有薪假架! 不過佢工事好忙,所以通常7星期係請唔哂既.....
     
    其實婚後我返親香港佢都會陪我架~ 但舊年V嫲嫲仙遊事出突然,佢工事上真係行唔開我先自己返之嘛!
     
     

    回覆刪除
  17. Mr.T班staff咁都得既?   唔經唔覺妳返咗黎3星期 
    [版主回覆12/21/2010 00:10:00]咁果日的確係有大雪,我地唔知老公office 果邊情況係點......大風雪海陸空交通癱瘓,佢d staff 真係有可能返唔到工既! 不過就唔知有無咁啱撞正老公第一日放假囉......
     
     

    回覆刪除
  18. 好彩你地唔係呢幾日番黎者...
    [版主回覆12/25/2010 01:04:00]係呀~ 我地好好彩! 返來香港 + 老公返英國都無cancel 又無delay!
     
     

    回覆刪除
  19. 你好,想問下你搭 Emirates ok嗎? 因為我summer會去uk,想book呀~ 仲有,想問埋你到杜拜機場個時係幾點? 如果我半夜到,仲有冇shop行同食野呀? (因為我帶住2個小朋友,所以想問清楚少少) thx thx ^o^
    [版主回覆04/20/2011 06:28:00]我地今次第一次搭Emirates,好滿意啊! 行李有成30kg 呢~
     
    由英國去杜拜7粒鐘左右啦! 幾點到杜拜要視乎妳book 幾點機果喎~ 我地今次好似杜拜時間零晨1點幾到,我地問過餐廳女侍應,佢地話杜拜機場餐廳 + 店都係24小時架~
     
     

    回覆刪除
  20. many thx  我睇返都係半夜到 杜 拜 ,太好了,佢地24小時營業,咁我就可以俾d小朋友行下lu。(不過冇你等咁耐,我去uk等2-3hrs,返hk就等3.5hrs  ) 每人有30kg?不過我估我用唔晒,因為我帶2個小朋友,一個人攞唔到太多野。(不過可以推介俾妹妹,下次返hk多個choice,因為佢地返黎次次都好似走難咁返去@斗)
    [版主回覆04/20/2011 08:52:00]我地轉機等得耐因為機票係我地自己上網book既,果時英國落緊大雪,我地怕英國去杜拜果程會delay,影響到去香港果程,所以我地特登轉機時間長d,萬一第一程真係delay,都有機會catch up 到下一程嘛~
     
    妳唔好以為30kg 好多呀! 就算妳無我買野買得咁勁,都好快夠quota 架! 我 + 老公返英國時,我地2個都超哂磅呀!
     
     

    回覆刪除
  21. hehe,你返hk shopping shop得咁開心就緊係30kg都唔夠啦。 我妹次次都cny先返,次次都delay.... 試過一次係ncl就delay咗半日,去到london 送機尾,airline安排咗另一班機,不過要係bankok轉多次機,我妹夫話no,寧願等2日個班機返hk。 (不過個晚佢地要瞓機場,我妹同佢地講數,話要去酒店過夜,因為佢自己一個帶2個小朋友,如果係機場過夜好危險)
    [版主回覆04/21/2011 05:53:00]香港有太多野英國無得賣; 又或者英國賣得比香港貴好多,所以我每次返香港都會盡情咁買,所以每一次都會過磅! 老公同我一齊返去就好d,因為佢可以幫我分擔吓d磅數~ 但有時都買到要返英國前打箱寄架......
     
     

    回覆刪除

Related Posts Plugin for WordPress, Blogger...