飲飽食醉@倫敦2010 - Day 1 日本Dinner 篇 (2010年10月29日)

續Day 1......
食完lunch 後行咗一陣街就去酒店check in，酒店房張床大大張又白雪雪，搞到我有少少眼瞓，所以補咗一粒鐘beauty sleep 先再出街......

首個目標地點 - 位於Mayfair 既Marc by Marc Jacobs~ 可惜入到店唔夠10分鐘，實Q告知仲有5分鐘就關門......

咁我就當機立斷 - 決定即時走人唔睇，第二日先再去過!

搭車去咗第2個目標地點 - 位於Soho 附近既Centre Point Food Store~

 Centre Point Food Store 係一間專賣韓國食品既小型超市!
其實超市裡面有好多野我都想買! 不過我緊記就來返香港要克制克制再克制......

加上外面突然落狗屎，唔想攞住太多野去食飯!

 所以只買咗4樣野: 湯麵湯底, 人參雞鍋配料, 即食栗子 + 叮叮韓式柴魚湯飯~
買完野見對面街一連有3間韓國餐廳，竟然落咁大雨3間都排哂長龍等位排到出門口!!

都係時候dinner 嘞~ 見佢地咁好生意，我又想食韓國野!  不過咁鬼大雨加上3間都咁鬼爆，都係算嘞......

搭車返去Piccadilly Circus 搵食，突然見到Piccadilly Circus 最旺既馬路中心有大班踩單車既人大聲叫囂!

 成條馬路塞住哂完全唔郁得......

 佢地仲一齊舉起成架單車大叫口號!
不過太嘈聽唔到佢地嗌乜! 只係大約聽到

"Our Street! 乜乜乜........"

 場面好虛冚架!!
睇咗一陣知道原來係一班習慣踩單車代步既人，

要求踩單車既人喺馬路上有多d權益!

八完一輪開始夜夜地，dinner 越來越少選擇，行行吓又行咗返去Soho 果頭......

 見有間日式小餐廳"Ten Ten Tei"仲開緊門，就入去試吓啦!

 裡面格局好有居酒屋既味道!
連老闆侍應都清一色係日本人，唔係聽得好清楚佢地講既英文......

 佢地d"理想之夫婦"茶杯好得意! 類似"健康十訓"果隻~
哈~ 唔知我同老公符合到幾多"理想之夫婦"既條件呢? 

最衰我唔識日文啦!!

  開餐~~~~~~~~~~~~

 由於lunch 果餐老公個Katsu Don 太好食，所以今餐我又要點一個!
我依份係加大portion~ 飯餐包碗味噌湯，估唔到小店依碗湯竟然比Toku 既仲加好飲!

 老公就要咗NabeYaki Udon~ (佢地d烏冬麵又幼又滑又彈牙! 正~~~)

 另外要咗Yakitori;

 同埋Gyoza 兩份分~

好彩我地入得去快，因為我地落完order 後無耐，老闆就將門口個牌轉做"Closed"!

之前果晚老公渣咗成晚車幾乎完全無瞓過 ，於是食完飯我地就返酒店休息嘞!

(不過睇完Desperate Housewives 先瞓! )

 幾乎行足一日，2隻腳都磨損哂!

>>>>>>>>>>>>>>>>>>>>>>>>>>>>>>>>>>>>>>>>

咪以為我淨係掛住食喎! 其實依幾日我運動量大咗好多架 - 除咗行路行得多，我仲行咗好多樓梯!! 

好似Covent Garden Underground Station 成日上落都好鬼多人等lift......

 所以我寧願行樓梯當做吓運動!

 依條樓梯足足有193級.....由樓下行到樓上都幾係野架!!!

>>>>>>>>>>>>>>>>>>>>>>>>>>>>>>>>>>>>>>>>

到達倫敦當日喺酒店睇電視新聞得知，East Midlands Airport 一架UPS 貨機收到一個由Yemen 寄去Chicago 既包裹，裡面載有爆炸品，懷疑同恐怖襲擊有關!

事有湊巧，同一日我地途經Aldgate 火車站轉車時......

 喺火車站入口見到有個架擺放咗鮮花;

 八卦既我行近一睇原來係一個紀念碑......
紀念2005年7月7日倫敦恐怖襲擊爆炸案中，
喺依個火車站Aldgate 遇難喪生既7位死難者~

(每次聽到有關恐怖襲擊既新聞真係頂住條氣!! 好心班人啦成日走去炸依樣炸果樣有破壞無建設! 無第二d better things 好做咩?)