二人世界結婚4週年 - 2010年10月11日 (附食譜)

五指毛桃粟米紅蘿蔔排骨湯; 香辣蕃茄汁雞柳; 銀芽鱔糊 & 蝦醬通菜

尋日(10月11日)係我 + Mr.T 結婚4週年~ 今年第一次週年正日無出街食飯......

唔慶祝嗎? 當然唔係!  只係99上星期去咗巴黎尋晚返來，今晚又臨時有事要即時飛返香港......所以老公尋晚要去接99機~

本來打算今晚出街食飯慶祝，不過尋晚99班機delay 咗，老公送完99返屋企，返到來已經2am!! 今朝見佢起身返工時好鬼辛苦......

反正6299都返哂香港，應該好多個weekend 都唔洗返去食飯，大把時間同老公二人世界啦! 咁等weekend 先去慶祝啦~

其實星期日(10月10日)老公同我去咗Hilton 食自助餐......

 頭盆又有我至愛既雞肝醬、魚子醬~ 今次仲有油浸鹹鯷魚! 正~~~~

 主菜有羊扒

 至正都係燒牛肉! 今次真係燒得啱哂我口味!! 中間粉紅部份加埋佢地好好味既gravy 簡直係人間美味!!!!!

 依碟係老公既!

今次竟然無咗我最鍾意既Crème Brulee......

 依個passion fruit pie 其實都唔錯，不過都係甜咗少少......我都係鍾意Crème Brulee 多d!

 依餐好好味 + 食得好開心!

老公屎都話依餐自助唔算慶祝結婚週年! 因為佢話一早已經唸好咗一個地方~ (我仲未知呀，佢話要保持神秘喎......)

 尋晚老公放工時送我一大札蘭花、玫瑰、菊花、香水白合混合體~

老公一返到來就摸住我個頭同我say sorry - 佢話結婚週年我都要煮飯覺得我好慘......

唔慘~ 唔慘~  我嫁咗比Mr.T 點會慘呢?

講返餐飯~~~

話咗要實行少餸制，但不知不覺又煮餸碟碟大大碟既三餸一湯......

上星期日返6299度食飯，99煲咗個湯有陣好特別既香味好好飲!

我隨口問句係咩湯來......

 99就比咗包五指毛桃我返屋企自己煲!

依包野好得意! 如果就咁乾聞只會聞到一陣類似木材既味道，一d都唔香;

 不過一落水煲湯滾起後，就會聞到好濃烈既香味!

初時我都唔為意似椰子味，99一講話似椰子味......係幾似喎!

見網上有人話直頭分唔出係椰子味定五指毛桃味 - 咁我又覺得太誇張! 我覺得我分得出喎!! 我覺得五指毛桃香好多~~~

 依個湯真係好好飲，我激推!

五指毛桃既好處功效，詳見食譜中~

 上次試過依包呃洋人牌子藍龍既蠔油方便醬料好好味! (網誌)

 於是今次試吓佢隻四川香辣蕃茄汁......

 用來炒雞柳!

不過好鬼失望!!!!!!!!!!!!  唔香又唔辣，聞落反而有種四川"麻"果種味道，但個人覺得唔多夾味，好怪~

而且個蕃茄汁我覺得唔好味，用返普通茄醬來煮蕃茄雞柳仲好!

 真係好鬼開心喺英國都食到我最愛既鱔糊!

開心加開心因為學識咗自己整!!

 多得中英行入貨，它來自越南~

喺香港唔洗自己整出街就有鱔糊食; 喺英國無黃鱔賣 - 咁我緊係未處理過黃鱔啦!!!!

 溶雪後見黃鱔原來仲有骨有腸!!!!! 開始有d驚......

雖然我第一次處理依條滑潺潺完全未劏肚，摸落都幾核突既黃鱔......不過其實黃鱔只得一條正骨，起肉竟然比我想像中容易好多喎~

 起到第二條已經開始掌握到竅門，可以起到成塊淨肉嘞!

 仲起得好乾淨架!

 不過同條雪藏黃鱔都經過咗一番搏鬥，睇吓戰況幾激烈!

(唔為意黃鱔原來仲有腸，一野剪落去整穿咗佢d腸，血濺上牆.......)

再加多個無影相既鬼鼠蝦醬通菜，依餐結婚週年飯雖然無出街食，但都食得好豐富啊!

 五指毛桃粟米紅蘿蔔排骨湯食譜click here~

 銀芽鱔糊食譜click here~

 蝦醬通菜食譜click here~