2010年7月26日星期一

水尾收穫

周圍都大減價咗一段時間,之前連續好幾個weekend 都有事忙,無時間好好地行街......

好多店都已經減完價,不過尚有少量店舖進一步減完再減,所以我趁住剛過既weekend 作最後努力來個水尾衝刺!

見到Swarovski 仲減緊價,入去打個白鴿轉~ 不過減價既都係大大抽款式誇張既首飾......

 減價野睇唔上眼,反而對依枝無減價既bling bling 水晶原子筆一見鍾情!

 裡面既水晶粒郁得架! 仲有一個水晶心心吊咀,又bling 又classy~ love it!

Lakeland 仲減緊價~ 雖然我成日去Lakeland 買野,但一直覺得Lakeland 正價貨品幾貴!

 不過一減起價上來又可以好抵果喎!

 依個車輪包模真係best buy,我及咗佢好耐架嘞!

唔知係咪物以罕為貴?  可能英國人少自己整車輪包,咁耐以來除咗Lakeland 有售依個Mermaid 牌之外,我未見過其他店有車輪包模賣!

依個模質料手工都好靚,但未減價前竟然要£21.99!! 雖然有幾次我忍唔住放咗入購物籃,不過就算個模質素好都實在太貴嘞,最終都係買唔落手攞返出來.......

今次一減就減到£9.99!! 緊係機不可失啦~ 好開心咁平買到個咁靚既模!!

 依套整果醬時專用既果醬樽處理組,原價£6.99,而家減到£1.99!

依套野都幾無聊 - 只係用來handle 經高溫消毒過既果醬樽以免燙手,其實依套野真係可有可無~

 不過其實我想要既係裡面依個食物夾!

我喺超市買過依種食物夾,不過煎煎吓扒會突然成個散哂~ 依個成個都係金屬,手柄包膠,一定唔會散! £1.99淨係買依個夾都抵~

 磁性水松木煲墊 - 原價£6.99 減到£3.99~ 用來墊cast iron 煲啱哂!

其他好多廚具屋企已經有,所以我都覺得收穫都算唔錯架嘞!!

另外我喺French Market & Italian Market 都有少少收穫架......

 French Market 買既Dried French Lavender,好香~ 好香~~

 Italian Market 買既完顆新鮮黑松露,又係好香~ 好好香~~~

依顆係我買時既一千零一顆,大過一粒大荔枝少少咁啦!

油浸黑松露或松露醬,同新鮮貨比起上來,香味實在差太太太遠嘞~~~ 新鮮貨贏足幾條街!!  不過唔可以久放,我要快手煮咗佢至得!!!



20 則留言:

  1. 您呢個車輪模真係好抵呀! 減咁多! 同埋睇得出佢個質地好好! 應該好易甩! 同埋我覺得呢個係arm arm 好一份! 嘻嘻~  我都會買到自己心頭好仲要係平野會爆開心架! p.s. 唔知我係咪第一呢?!
    [版主回覆07/26/2010 21:13:00]應該係不沾易脫模既,不過個扣好實,我香雞手好難開...... 而家減到£9.99 就幾合理~ 之前£21.99 又離譜啦!!!
     
    一眼睇哂係妳第一啦!
     
     

    回覆刪除
  2. 我依家試整方包.... 咁我係用大陸買左個d 平平模 (質地同幫您買個個車輪模咁).... 我唔可以成個好靚個甩出黎! D皮會一忽有一忽無咁喎~ 唔係係咪關個模質地唔好 or 我搽唔夠多油係個模到呢 您有無用過大陸個個車輪模呀? 係咪都係好難甩呀?
    [版主回覆07/27/2010 05:28:00]我唸可能兩樣都有少少關係啦! 不過我唸應該都係搽油問題關係大d~ 妳下次試吓搽油搽均勻少少,麵包出爐後唔好太心急脫模,攤一陣先,睇吓會唔會好d~
     
    果個模我仲未用過呀!  因為我發現我之前唸住合埋既方法唔係好work........
     
     

    回覆刪除
  3. 嘩... 實在太抵喇....
    [版主回覆07/27/2010 05:25:00]減咗就抵咯~ 唔減價好多時唔捨得買......
     
     

    回覆刪除
  4. 英國d野正價無樣平,減價就幾抵,邊個會買正價愛呢?
    [版主回覆07/27/2010 05:25:00]係呀~ 不過好多時我想要既野都未必有得減......
     
     

    回覆刪除
  5. 個車輪包模比我都會買, 正價都心思思喎 , 何況而家平了咁多, 低於半價呀 .
    [版主回覆07/27/2010 05:24:00]個模果日我買時見到有2個,我今個weekend 再去睇吓仲有無吖,有的話我買一個比妳~  
     
     

    回覆刪除
  6. 你支筆好靚呀﹗你果邊的Swarovski店有冇好多華人呀?
    [版主回覆07/27/2010 05:23:00]我好鍾意枝筆架! 我一見到即時雙眼發光; 老公見我雙眼發光就即時比錢~
     
    好多華人? 妳指店員定係顧客?? 店員清一色洋人來架,顧客就一般啦,Glasgow 本身都幾多華人~
     
     

    回覆刪除
  7. 又有好多新玩意啵
    [版主回覆07/27/2010 05:20:00]少少啦~ 因為廚房好多用具都已經有,都無咩特別要買咯!
     
     

    回覆刪除
  8. thx.....  仲有一個問題呀。。。。咁係咪都要倒扣呀?
    [版主回覆07/27/2010 05:40:00]未聽過麵包要倒扣喎! 戚風就要~ 我整麵包無倒扣架!
     
     

    回覆刪除
  9. 個食物夾我買左呀,因為我男友買左個豆泥oven, 得個盤,無個盤抽送...所以我係hk買囉 ! hk$7.9, 我話 $10以內我先會買架咋 !
    [版主回覆07/27/2010 19:10:00]依種食物夾其實間間超市都有得賣,而且好平,不過超市果d全部都係膠柄 + 手工好差!
     
    我之前喺依間lakeland 買過一個同上面個一模一樣既鐵柄包膠食物夾,後來用耐咗表層脫落生锈比我揼咗~ 不過之後就買唔返依種夾!
     
    今次依盒果醬組包埋個夾,雖然其他用具可有可無,不過我整果醬時都用得著~
     
     

    回覆刪除
  10. 喂....唔好客氣啦, 香港都有車輪包模 , 都唔貴架, 唔好浪費錢呀 , 又要買又要郵費呀 , 你的心意我收到哂啦....
    [版主回覆07/27/2010 19:05:00]妳都唔好客氣啦!  記憶中車輪包模香港都好似要200幾蚊~ 我依個而家半價,加埋郵費我唸仲平過喺香港買!
     
    不過要weekend 睇吓賣哂未先~ 佢地d貨多數減完就斷尾架嘞.......
     
     

    回覆刪除
  11. 好期待你的... 黑松露...唔豬你會點整....
    [版主回覆07/27/2010 19:02:00]今晚食! 但仲唸緊點整......
     
     

    回覆刪除
  12. 果然收獲豐富 !!!!!!!
    k
    [版主回覆07/27/2010 19:01:00]咁又唔算收穫豐富~ 因為好多廚房用具我已經有咯!
     
     

    回覆刪除
  13. bling bling 水晶原子筆好靚呀!
    [版主回覆07/28/2010 19:27:00]係呀~ 所以我對佢一見鍾情囉!
     
     

    回覆刪除
  14. £9.99 要過百港元,都係好貴
    [版主回覆07/28/2010 19:27:00]不過依種車輪包模,香港都要成200幾蚊喎! 所以算平架嘞~
     
     

    回覆刪除
  15. 乾黑松露點整好架..我超愛嗰味架....
    [版主回覆07/28/2010 19:26:00]粒黑松露係新鮮架! 唔係乾來~  
     
    話時話我好似無見過黑松露乾喎!  一般都係松露醬或油浸原粒黑松露~
     
     

    回覆刪除
  16. Swarovski原子筆好靚喎,我未係香港見過喎,新野黎既? 啲野特價起上黎就係半價都唔止    粒黑讚石    諗住點整呀 
    [版主回覆07/28/2010 19:24:00]我唔知枝筆係咪新野呢? 我都好耐無去過Swarovski 嘞,枝筆我都係第一次見~
     
    粒黑鑽整咗嘞 - 黑松露龍蝦汁海鮮意大利飯: http://hk.myblog.yahoo.com/veronicams_tsim/article?mid=44313
     
     

    回覆刪除
  17. 我呢邊的Swarovski店好多係果的華人客﹐ 全部遊客﹐超級大陸FEEL~
    [版主回覆07/28/2010 19:22:00]係呀? 我去親都無點留意其他客人....
     
     

    回覆刪除
  18. Gaileは林家歐巴桑2010年7月27日 下午6:39

    我上次都見到Swarovski支筆幾靚,不過我果兩支MONBLANC擺喺度幾年都冇用,最後都係冇買,唔想佢同果兩支同一命運...
    粒黑鑽松露應該唔平喎,咁大粒...等妳既鑽石級食物出爐
    [版主回覆07/28/2010 19:21:00]有時鍾意既野可以純擁有架嘛! 唔一定要有用架~  我大把手袋,唔通我一次過帶哂佢地出街咩?
     
    粒黑松露整咗嘞!
     
     

    回覆刪除
  19. 支筆真係好特別同靚
    [版主回覆07/28/2010 19:18:00]係呀~ 所以我對佢一見鍾情囉!
     
     

    回覆刪除
  20. I love this pen, I saw it in Cathay Pacific in-flight shopping last mth but flight attendants said it's out of stock for long~~
    Btw, it's my first time to leave message and i love reading your blog.  Take care.
    [版主回覆07/29/2010 20:16:00]Hello and welcome tigerbobo!  im glad that you like my blog~
     
    yeah the pen is very nice and i love it! it was love at first sight~
     
     

    回覆刪除

Related Posts Plugin for WordPress, Blogger...