二人世界三餸一湯 - 2010年7月9日 (附食譜)

蕃茄銀芽肉碎湯; 香茅醬雞翼; 清蒸龍脷魚 & 蒜蓉白菜仔

最近少咗煮三餸一湯，一來忙，二來懶~ 就算煮都唔係好願煲湯......

尋晚又的起心肝煮餐飯，不過都係滾湯! 嘻嘻~~~~

本來係滾蕃茄銀芽豬潤既，不過我唔記得攞舊豬潤出來溶雪，唸住滾湯時舊豬潤仲硬過石頭!  好彩早幾日滾湯時仲有用剩半pack 免治豬肉， 咁就改滾蕃茄銀芽肉碎湯啦!

上次試過用扑友阿四寄比我既李錦記泰式香茅醬整豬扒，好好味!

 上星期去泗和行見到包類似既產品，於是買來試試比較吓~

 雖然包裝上有簡體字，但其實係泰國既出品!

 拆開面包裝，裡頭有另一獨立包裝既紅色醬汁~ (兩個包裝真係多鬼餘!! )

雖然包裝上有指示煮法，不過我就用自己方法 - 同上次用李錦記整豬扒既做法一樣!

 雞翼醃緊時有少少紅紅地，不過煮出來紅色無哂喎......

至於味道方面，依隻醬汁都唔錯! 但煮出來成品較乾身無汁，各有風味啦~ 不過比起李錦記既調味較淡，自行調味不妨可以重手少少!!

尋日Tesco 鮮魚檔dover sole 好鬼靚好鬼大條!!

好耐無食過龍脷嘞~~~~~ 睇見d魚咁新鮮都流哂口水.......

 買咗大條用來清蒸~

不過返到屋企先知原來條魚未打鱗!!!!

 話比大家知吖 - 用依種整蛋糕既矽膠刮來起魚鱗，起得又快又乾淨又企理架!

哇~~~~~~~ 條魚蒸出來真係好好好好食呀!!!!!

啖啖肉又新鮮，連最憎食有骨魚既老公都一路食一路讚!
(緊係啦 - 有我夾比佢嘛......)

 可惜裡面條魚春太細條......(我好鍾意食魚春架! )

雖然依條魚貴貴地要£7.90，不過真係好好食啊~~~~

一大條比我 + 老公食到乾乾淨淨得返棚骨!!

>>>>>>>>>>>>>>>>>>>>>>>>>>>>>>>>>>>>>>>>>>>>>

尋日我好早出街，午飯未食就去買餸......

 喺Tesco 見到依包叫做"Easy Thai" 既叮叮即食綠咖喱雞，唸起上星期叫中式外賣既綠咖喱好好味!!

 咁就買咗包返屋企叮，再煲d飯來做lunch 啦......

哇!!!!!! 好XYZ難食呀~~~~~~

好老實 - 我真係未食過咁難食既包裝 / 罐頭食品!!!!

雞肉都算多既~ 不過果兜灰灰綠綠既綠咖喱汁真係不知所謂 - 一兜完全無香味、好鬼甜、少少鹹 + 少少辣既汁...... 依包野絕對可以用"難食到嘔"來形容!!

本來我好鬼肚餓，而且平時lunch 我多數都會添飯~ 不過尋日我食咗兩啖飯，已經無比依兜野搞到無哂胃口!只係為咗唔想浪費，我先頂硬上食埋成碗飯，但兜野真係只食咗幾啖幾乎無掂過咁滯......
整到難食到咁都夠膽攞出來賣 + 嚇人......真係唔知醜!!

 蕃茄銀芽肉碎湯(參考食譜)click here~

 香茅醬雞翼(參考食譜)click here~

 清蒸龍脷食譜click here~