2010年7月24日星期六

不再小的小表妹 (2010年7月24日)

V表妹星期一(7月19日)跟隨遊學團來英,今日(7月24日)來Glasgow 一日遊,我 + 老公趁住V表妹自由活動時間同佢見面~

年多前喺香港見V表妹,當時佢仲係肥嘟嘟,比我矮一大節 + 仲未帶眼鏡......

 今日再次見佢,佢已經同我差唔多高 + 變成一個200度近視既少女~ 佢離遠走埋來時我幾乎完全唔認得佢!

今日遊學團喺Glasgow 自由活動時間只有2小時,所以我 + 老公帶V表妹喺Glasgow City Centre 周圍閒逛~


 剛好今個weekend Glasgow City Centre 有Italian & French Market~

我地就去咗Market 逛逛......



 V表妹一場來到,當然要比佢試試蘇格蘭獨有,但好鬼難飲既汽水Irn-Bru 啦!

(V表妹都話: 真係好難飲喎! 哈哈~~~ )

V表妹話英國d野好難食!  而且Host Family 日日都係炸魚薯條、腸仔薯條......(真係陰公! )

最衰自由活動時間咁短啦! 如果唔係我會帶V表妹返屋企,煮餐好既比佢食~


V表妹唔適應蘇格蘭忽冷忽熱既天氣,一來到就皮膚敏感,塊面乾燥甩皮兼紅卜卜,而且又帶唔夠衫,於是我地帶佢去買藥膏 + 外套長褲~

買完衫老公排隊比錢時,個傻妹竟然細細聲同我講: 表姐~ 我自己有錢呀!

我送咗一set 2個銀包仔形既潤唇膏比佢,佢又同我講: 多謝表姐~ 不如我地分一人一個吖?

我聽到真係覺得好窩心~~~~_1302.gif image by veronica_tsim

時間真係過得好快......

 記得當年我來蘇格蘭後1個月V表妹先出世,每次我放假返香港時,佢都"表姐~ 表姐~"咁......

 眨吓眼V表妹暑假後就升中四嘞! 佢真係大個咗好多,而且又斯文又乖又生性~

 短短2小時V表妹就要歸隊嘞! 我依個無鬼用既表姐依依不捨眼濕濕.......203508489.gif image by veronica_tsim


希望V表妹喺蘇格蘭遊學玩得開心啦! 我好快又會見到佢嘞~~~~




21 則留言:

  1. 表妹仔只係得2個鐘自由時間 ....  不過唔緊要啦 你地好快又會見過  我諗你地支 汽水Irn-Bru都幾難飲 連表妹仔都話難飲 哈哈 k
    [版主回覆07/25/2010 16:56:00]如果下次佢自己再來蘇格蘭的話,我一定要親手煮餐好既飯比佢食!
     
    果枝汽水Irn-Bru 我之前介紹過: http://hk.myblog.yahoo.com/veronicams_tsim/article?mid=26172
     
    我自己都覺得好難飲! 但喺蘇格蘭土生土長既人 - 好似我老公,大部份都對依枝野好瘋狂.....
     
     

    回覆刪除
  2. Gaileは林家歐巴桑2010年7月25日 上午12:22

    兩個鐘真係少左d喎,比我都唔捨得啦!!V表妹個樣睇落都係乖巧型...同以前比,都冇乜點變,一樣咁青春無敵!!而家佢咁高大就唔會再有人話妳地似兩母女嘞
    [版主回覆07/25/2010 16:52:00]始終佢地係來遊學,好多時日頭先要喺學校上堂,自由時間唔多~
     
    哈哈~~~ 我唸而家話比人知V表係我妹妹都有人信呀! 我 + V表妹本身都生得比較細粒,我見好多遊學團既同學仔都高過我!  老公話我混入遊學團裡面,同果班同學仔差唔多樣~
     
     
     

    回覆刪除
  3. 你地2個宜家冇咁似樣喇
    不過V表妹真係大個左好多好多呀~!!!
    個樣好清純呢~~~
    見地你地2個都黑色頭髮得好靚..
    搞到我好有衝動想染番黑D頭髮呀~!!
    [版主回覆07/25/2010 16:47:00]上次見佢佢仲係肥妹仔,而且游水曬到黑忟忟; 今次見佢又高又瘦~ 真係女大十八變!
     
    唔興玩金毛強好耐咯~ 正正經經黑髮好d~
     
     

    回覆刪除
  4. 妳表妹好 斯文乖乖 女
    [版主回覆07/25/2010 16:43:00]係呀~ 想當年我F2、F3已經好鬼貪靚又開始學人化妝......但V表妹而家仲係咁清純,好可愛好得人鍾意!
     
     

    回覆刪除
  5. 點解妳個樣越來越~靚o架!
    亞表妹大過咗好多,而妳就一D都冇變!
    [版主回覆07/25/2010 17:29:00]我由細到大V媽媽都成日話我好醜樣 ,而家比我靚返少少夠本都得啩?
     
    V表妹真係女大十八變,唔再係細個時古靈精怪既樣~ 不過一樣咁可愛咁得人鍾意!
     
     

    回覆刪除
  6. 時間真係過得好快,轉吓眼你表妹長大咗囉,但你一樣咁青春喎
    [版主回覆07/26/2010 19:50:00]嘻嘻~~~~ 而家話比人聽我同表妹係姐妹都應該有人信!
     
     

    回覆刪除
  7. V表妹好熟口面呀,好似係唔知邊度見過咁既~~~不過V表妹真係好斯文好乖呀!!
    [版主回覆07/26/2010 19:47:00]係? 真係咁熟面口?? 咁妳唸唔唸到喺邊度見過佢呀?
     
    今次見佢真係大個咗好多,又斯文淡定又有禮貌,好得人鍾意~~~
     
     

    回覆刪除
  8. 時光飛逝,你咁快就過咗Glasgow十幾年了!還記得當日送你機前,去你屋企...
    [版主回覆07/26/2010 19:44:00]係呀~ 真係眨吓眼話咁快就十幾年嘞.....
     
    我都仲記得果晚自己著緊咩衫上飛機; 仲係用緊舊機場~ 我仲記得分咗幾架的士去機場........
     

    回覆刪除
  9. Irn-Bru   咁大整蠱呀  小表妹都係靚女一名,而且仲好斯文清純添 
    [版主回覆07/26/2010 19:41:00]Irn-Bru 蘇格蘭獨有風味嘛!  
     
    小表妹五官係幾精緻架~ 不過而家佢仲有少少baby fat,而且佢年紀仲細,唔好咁快開始打扮~ 清清純純咁仲加得人鍾意!
     
     

    回覆刪除
  10. 好鬼難飲既汽水Irn-Bru....又有幾先...我真係想試下....
    [版主回覆07/26/2010 19:38:00]等我返來時整枝過妳啦! 包妳飲完以後見到依枝野都想嘔!
     
     

    回覆刪除
  11. 嘩...你張舊張果秋手圈...係咪灰色鐵鐵地橡筋呀?
    如果係, 我都有呀...當時好鬼與架.... whahahahaa
     
     
    [版主回覆07/26/2010 19:37:00]係呀~ 就係果d嘞! 哈哈~~~~  原來亞兔妳都係果個年代!
     
     

    回覆刪除
  12. 咁感性~
    [版主回覆07/26/2010 19:35:00]可能我自己係獨女無兄弟姐妹啦,所以我好鍚我表妹架!
     
     

    回覆刪除
  13. 真係女大十八變
    [版主回覆07/26/2010 19:35:00]係呀~ 上次見佢仲係矮得得肥嘟嘟; 今次見佢已經高高瘦瘦~ 可能下次再見佢又唔同另外一個樣......
     
     

    回覆刪除
  14. 妳早年個樣有D似湯寶如,真係越來越靚喎!
    [版主回覆07/26/2010 19:33:00]哈哈~~~ 妳已經唔係第一個覺得果時剪短髮既我似湯寶如,果時好多朋友都話似! 不過我自己覺得除咗頭髮似之外,個樣根本唔似~
     
     

    回覆刪除
  15. 濃情朱古力碰上士多啤梨2010年7月26日 上午12:21

    你表妹真係好乖女好聽話呢...
    [版主回覆07/26/2010 19:31:00]佢真係好乖好生性,比小時候更加得人鍾意~
     
     

    回覆刪除
  16. 我兩個表妹跟我爸媽黎睇我畢業,上星期都去左scotland啊~不過我地只係去左Edinburgh and Loch Ness (+ the highlands)...真係好靚丫!!!!搞到我家姐話想係scotland定居haha~~
    [版主回覆07/26/2010 19:30:00]蘇格蘭好多地方風景都好靚,不過多數係山卡啦既地區,渡假就好,要我住喺郊區咪搞,我一定要住市區! 妳姐姐少見依d風景先會咁唸啫~
     
     

    回覆刪除
  17. She is a nice and kind sweet heart. When will she be back to HK? Maybe you can go to meet her in airport.
    [版主回覆07/26/2010 21:10:00]she's such a sweet heart! no need to meet her at the airport la, she's got her own friends. plus i will be going back to HK very soon~

    回覆刪除
  18. 哈哈.....俾你發現左呢個天大既秘密 tim :P
    不過你個樣後生過我好多....唔似果個年代呀...
    [版主回覆07/27/2010 05:49:00]唓~ 年齡有咩咁秘密啫?  
     
     
     
     

    回覆刪除
  19. 這兩小時真係好珍貴 , 難得她咁遠來到呀 , 你睇番v表妹細個幅相, 係咪覺得時間過得太快呀...
    [版主回覆07/27/2010 05:47:00]係呀~ 真係眨吓眼佢就咁大個,佢幾大我就來咗英國幾耐.....見到佢大個咗咁多又咁乖,我真係好開心~~~
     
     

    回覆刪除
  20. 係呀,當時仲係用緊啟德機場的!我記得你的行李多到嚇死人,要求咗BA加大你的行李重量都仲超標好多,最後唯有“執”番起一D唔等用的,下次返黎再攞!另外,我還記得auntie好唔捨得你...喊到眼腫腫...
    [版主回覆08/01/2010 20:32:00]哈哈~~~~ 妳仲記得多過我!  果時第一次過來,佢地盡量都會比多d磅數既~
     
    其實當時我都係死頂架咋! 上到飛機架機行緊出跑道時,我已經喊到收唔到聲嘞!  
     
     

    回覆刪除
  21. 知你啦!其實你喺機場都有同你阿媽相擁而哭ga~ 攪到我都差D忍唔住喊埋一份! 梗係記得啦!因為送咁多次機係得你呢一次咁touching...想喊chi ma!  同埋唔知你記唔記得呢?因為行李問題,你爸爸同媽媽在機場頂了幾句嘴 ...雖然,佢地平時都好似係咁(好似係你講的),所以都真係幾深刻ga!
    [版主回覆08/02/2010 04:20:00]哈哈~~~~ 我而家次次返完香港返來時都仲係咁架!
     
    我記得~ 因為我細叔喺海關度做,我媽咪唔知喺邊度聽返來話可以有大d allowance~ 咁佢 一早叫咗我爹哋通知細叔,但佢無.......所以過磅時我媽咪咪唔老黎囉!  係架~ 佢地平時一向都係咁,若有一日佢地唔頂咀我反而仲驚~~~
     
     

    回覆刪除

Related Posts Plugin for WordPress, Blogger...