計一計原來已經有年幾無去過依間我超愛既小店咯喎......
係呀~ 蘇格蘭有台灣野食架!
蚵仔煎、臭豆腐、豬血糕、五更腸旺......依d材料比較刁轉，又唔多啱洋人口味既食物就緊係無啦......
雖然只係一d比較大路既台灣食物e.g. 牛肉麵、滷肉飯、鹽酥雞、珍珠奶茶......不過絕對係正宗口味架!
我 + 老公一向好鍾意台灣又好鍾意食台灣野!
(之前我地去完台灣返來後， Mr.T用台北街景整咗依幅野......)
約3年前朋友告知愛丁堡有依間小店，第一次幫襯已經即時愛上咗!
而且多年來水準維持一樣好，去過咁多次都非常滿意! 
尋日去愛丁堡行街，再次重訪依間久違既台式小店，水準同樣一d都無退步到! 我 + 老公邊食邊讚好味 - 可能咁耐無去過，覺得仲加好味~~~~~~
喺蘇格蘭真係非常難得啊!!
超多牛肉; 個湯同牛肉麵既湯底係一樣既 - 同我喺台灣食到既比較，有過之而無不及! 又香又濃仲有少少辣......真係好飲到呢!!!!!!!!!!
無錯 - 正確來講依間小店其實係台式fusion! 雖然係fusion，但台式既食物都係好正宗既!
不過就算好似依碗唔係台灣野既冬蔭雞湯，一樣好味到想"瀨"乾淨個碗底!!
因為即叫即蒸，所以叫依個就要等，不過等耐少少都係值得既!
因為每粒都皮薄餡靚，而且充滿湯汁~ 絕非中式超市急凍貨色!!
依個炸雞飯由第一次開始已經食上癮!
其實每次再去Meadowood時都想試吓其他新野，不過每次一見到餐牌上果幅炸雞飯相，我就欲罷不能都係要點返依個炸雞飯......
所以 - 我要試吓自己整依個炸鹽酥雞!!!!
平時老公去親Meadowood 都會點牛肉麵~ 不過今次佢就點咗依個有炸菜既豬肉飯餐，個汁辣辣地，撈飯真係一流!
不過稍嫌肉少咗d喎......
仲有果3條春卷......所有飯餐都係配春卷或炒雜菜任擇其一既~ 初時我以為春卷有可能係超市現成急凍貨色，所以先選炒雜菜;
點知老公比咗1條我食之後，我先知原來條春卷係咁好好好食既!!!! 下次我一定會選春卷!!!!!!!
仲有不得不提佢果壺烏龍茶 - 一飲就可以肯定唔係中式超市貨色~ 飲完真係齒頰留香!!
尋日渣緊去愛丁堡時，一路上內心不停掙扎: 究竟去Meadowood食台灣野好吖? 定去食日本野好呢??
好肚餓呀 !
回覆刪除[版主回覆06/07/2010 17:06:00]我頭先打緊依篇野望到相都好肚餓.......
台灣小食一向都超正, 我至愛就是蚵仔煎啦.....
回覆刪除[版主回覆06/07/2010 17:06:00]依間野好多洋人幫襯，無蚵仔煎架!
台灣小食正到痺呀!
回覆刪除[版主回覆06/07/2010 17:05:00]依間無乜小食，全部餐來架!
琴日老公朋友先請我地食左兩盒臭豆腐,嘩...好味到呢,依家都想食
回覆刪除幅相影左"箂爾福"...下次黎一定要影"Family Mart"喎,事關我老公喺"全家"總公司做
d食物賣相真係唔錯...黎唔到台灣,食到d正宗台灣小食都好好呀!!
[版主回覆06/07/2010 17:11:00]張相好似唔係我地影架! 好似係老公網上搵架~
依間野係個英國男人開 - d野係佢煮既; 而且去咁多次佢都一定喺度~ 我見店間中裡面有個講台式普通話既中年女人 + 2個mix 既teenager 女仔，我估應該係個英國男人娶咗個台灣女人，開咗依間小店~
樣樣都好掂咁，我最鐘意係鹽酥雞，每次食都知勁熱氣，但次次都會食唔停，死就死啦 等住睇你教整里個呀
回覆刪除[版主回覆06/08/2010 21:20:00]依間小店雖然細，但真係樣樣都好掂!
等weekend 我去逛逛中式超市，買齊材料我就開工~
鹽酥雞真係好正
回覆刪除算係咁啦, 蘇格蘭lee間台灣野算好好
仲有, 大腸麵, 鴨肉扁, 魷魚x (我唔識寫), 魯肉飯, 蚵仔煎 ...
我上次去台灣, 肥左4磅返嚟
[版主回覆06/08/2010 21:19:00]魷魚羹呀! 我都超愛鴨肉扁呀!
我 + 老公去親台灣晚晚蒲夜市食食食，食到擺檔d人都認得我地!
我想飲果碗牛肉湯
回覆刪除[版主回覆06/08/2010 21:16:00]碗牛肉湯緊係正啦!
嘩﹗我有次係法蘭克福食點心﹐ 佢差唔多全部都用中式超市急凍貨色﹗ 我心諗﹐咁我自己係屋企蒸都得啦﹗ 今次你老公個餐岩我胃口的啵﹌
回覆刪除[版主回覆06/08/2010 21:16:00]咁我依邊d酒樓既點心都ok既~ 咁耐以來只試過一間飲夜茶既酒樓比我發現用急凍野! 可能因為咁所以執咗........
妳咪睇個炸雞其貌不揚呀! 我第一次食時見佢咁既樣都好失望，但試過妳就知道係好野啦!!
果到D餃子同埋 春卷 是人手包啊，我在那裏打了一年工，都未吃厭.....
回覆刪除[版主回覆06/09/2010 23:13:00]我一食就知唔係超市貨色! 唔怪之咁好味啦~~~~
其實佢d野唁差, 不過上菜好慢, 以前讀書果時, 一個星期去2, 3次而家一年都唔知有冇2,3 次.
回覆刪除我有幾個frd 都幚過佢做part time, 而家好似係andrew(老闆) 一手一腳同老婆(TW人)一齊做. PS 下次留意下佢地囡囡, mix 得幾靚ga...
[版主回覆06/09/2010 23:13:00]我多數星期日晏晝去，唔太多客人，頂龍2、3枱，所以等上菜唔算太耐~
以前見過佢2個女幾次，不過今次去唔見喎!
回覆刪除睇見呢幅圖, 真係知道妳地好開心同興奮, Mr.T 仲不停打自己心口
[版主回覆06/09/2010 23:08:00]哈哈~~~ 係喎~ 佢幾似打自己心口喎!
台灣野真係好好味,去左2次台灣,次次都要食到飽曬就肯返酒店訓覺,西門町,士林夜市<===好鍾意呀!!!!
回覆刪除[版主回覆06/09/2010 23:06:00]台灣周圍都有好野食，點止西門町 + 士林呀?
有台灣野食又幾好喎，個牛肉湯睇落真係好得，睇到我流口水添
回覆刪除[版主回覆06/10/2010 18:53:00]依間野真係好好食! 咁多年來都仍然係咁好食~ 而且價錢又唔貴~ 可惜喺愛丁堡，而且好奇怪星期六竟然唔開門........