2010年6月2日星期三

China Buffet Palace (2010年5月30日)

上星期頭見屋企附近大街有2個相連舖位裝修緊，叫做China Buffet Palace~ 連續幾日經過都見裝修無乜進展，仲以為有排先開張......

 星期日(5月30日)返6299度lunch，返屋企時再經過舖位，已經見China Buffet Palace 做緊生意!

果日喺6299度食飯時有少少胃痛所以食得唔多; 到咗傍晚胃痛完全好返哂就覺得好鬼肚餓，所以近近地去試吓依間新開張既中式自助餐~

China Buffet Palace 既裝修，可以話係暫時我見過最靚裝修既中式自助餐廳!

 餐廳以黑色為主，配上水晶燈、trendy 大鏡、蠋台等擺設......

 由於相連2個舖位，餐廳空間寬闊，坐得好舒服~

靚就幾靚嘞~ 不過我覺得似一間trendy bar 多過中式自助餐廳!

一向我地都好少幫襯中式自助餐廳~ 因為印象中都係唔好食，只係呃外國人既貨色......

China Buffet Palace 除咗有2個著西裝既經理物體係中國人之外，侍應清一色都係外國人 - 好明顯係主要做外國人生意!

連裡面既客人都全部係外國人 - 除咗我 + 老公之外!

唔知會唔會因為我地係餐廳裡面唯一2個中國客人......

 我 + 老公被安排坐喺水吧前既枱 - 客人攞野食必經之路 - 好讓外國客人覺得"中國人都來食野，依間餐廳好正宗!".....之類??

 攞食物既地方同餐廳面積唔成比例! 食物選擇不多~

- 最奇怪係頭盆 + 主菜放埋一齊並無特別分開;

- 食物架全部都好低，好鬼憎熱盆食物架上既燈蓋，啱啱好頂住我個頭!  叫我點攞野食?

- 再加上盛食物既器皿太深，好難睇到仲有幾多食物喺器皿裡面......

都唔知邊個選一個咁低能既食物架????

食完返到屋企，所有衫都一陣雜水味! 全部要攞去洗!!!

 食物水準非常麻麻，只係一般中式自助餐廳既貨色 - 即係呃外國人既貨色!

唯一我會讚既係個炒麵~ 炒得好乾身好香，依個最好食!!

Overall 已經好麻麻，竟然仲要無中國茶供應!! 中國餐廳無中國茶真係第一次見，對我來講係死罪!!!_1296.gif image by veronica_tsim

當日餐廳極其量只有一半入座率，侍應人手就算坐滿都一定係夠既~ 不過就唔知點解侍應們好似打仗咁款，穿梭廚房、餐廳 + 枱與枱之間忙過不停! 但又唔多見佢地實際上忙d乜??
我不禁喺度唸: 坐唔滿你地已經手忙腳亂，若坐滿既話你地點算呢???_1282.gif image by veronica_tsim

 well 始終China Buffet Palace 係新開張，可能仲未熟習架步......

或者等一晚我好懶唔想煮飯又唸唔到食乜既時候，我會比多一次機會佢，睇吓有無改進!

 每張枱上有一張生力啤既廣告，依part 教外國人講廣東話，好鬼搞笑!!!  
發佈者： 於
標籤：

12 則留言:

  1. Mui2010年6月2日 上午6:11

    我地里邊既buffet餐館都唔會有茶飲，當然啦，細town仔，d buffet係呃鬼佬食個d，邊度會有點心師傅
    [版主回覆06/03/2010 05:27:00]我所講既中國茶， 唔係 指點心呀! 要食中式點心就去大間酒樓啦，點會去呃洋人既中式自助餐廳架?
     
    係佢地問我飲乜，我話要chinese tea，佢地話無~ 我真係第一次食中式自助餐話無中國茶飲喎!
     
     

    回覆刪除
  2. Catherine2010年6月2日 上午6:36

    咩係雜水味 ?? 油煙味 ???
    講真, 睇個賣相就相當唔好食bor ........
    [版主回覆06/03/2010 05:17:00]係呃洋人食物既味道，留喺衫上面果陣除真係好作嘔架........
     
    依間真係唔係好掂呀! 而且價錢又比一般中式自助餐貴!
     
     

    回覆刪除
  3. katie2010年6月2日 上午7:16

    哈哈 你煮仲好味過佢地啦 !! k
    [版主回覆06/03/2010 05:15:00]要好食過佢地完全零難度.......
     
     

    回覆刪除
  4. 安靜人2010年6月2日 上午8:16

    印象中唐餐 or 廣東菜始終都是HK最O.K. (可能我食慣啦), 但好似我D飯桶, 長時間無飯食, 就唔理邊到, 唐人街, 似華人的亞洲人小店, town 仔的溫州人, 最後就算連濕泣泣好似唔熟的意大利飯都要殺啦
    我最欣賞是那張教講廣東話廣告, 是非常有趣
    [版主回覆06/03/2010 05:15:00]香港既中國菜當然係最好啦! 而且選擇又多~ 不過其實依度都有好好食，好多廚師都係香港移民來! 只係佢地成日都會轉人手，所以水準唔穩定~
     
     

    回覆刪除
  5. Gaileは林家歐巴桑2010年6月2日 下午6:09

    "妳很美.我很帥"煲冬瓜都出現埋
    點解個食物區細成咁架,好似去名店入左個VIP房睇貴野咁
    [版主回覆06/04/2010 22:06:00]係囉~ 其他全部廣東話，無啦啦整句普通話出來.....搲頭!
     
     

    回覆刪除
  6. mami阿四2010年6月2日 下午7:02

    裝修真係幾潮喎，不過唔好食咩都假，裝修又唔食得既
    [版主回覆06/04/2010 22:05:00]我直頭覺得依間野嘥咗個裝修......   好有虛有其表feel~
     
     
     
     

    回覆刪除
  7. Cooking2010年6月2日 下午7:25

    係好好好耐係頭幾次去旅行時都仲會跟團, 而當中就係食依啲呃鬼佬既中國餐喇, 大佬呀, 呃鬼佬就話仲得啫, 咁有咩理由要帶我地香港人去食至得架 ... 所以之後每次自己去旅行時都甚少會去食中國餐喇
     
    [版主回覆06/04/2010 22:04:00]旅行團會食中式自助餐咁奇怪?  一般都係中國餐館坐低有set menu 果喎.......
     
    我 唔會 話外國完全無好食既中國菜! 只係比較罕有~
     
     

    回覆刪除
  8. jerry2010年6月3日 上午12:46

    所有衫都一陣雜水味! 雜水味是甚麼?請指教.
    [版主回覆06/04/2010 22:01:00]依度外賣店有一味叫做chop suey - 即"炒雜碎"，有菜有肉! 不過依味其實都係用來呃洋人既~ 由chop suey 演變出來 一個非常唔禮貌既方法去稱呼做中式外賣店 + 餐館既廚師 - "雜水佬"~ (讀出來係"水"既音!) 所以"雜水味"可以係廚房味，或者呃洋人既食物味~
     
     

    回覆刪除
  9. MuiMuimui2010年6月3日 下午12:27

    外國既中式自助餐通常都係唔岩中國人食既﹌
    [版主回覆06/04/2010 21:54:00]其實都有好食架! 愛丁堡有一間好正，竟然有燒鴨 + 雲吞!
     
     

    回覆刪除
  10. Prime2010年6月3日 下午1:36

    睇啲食物都一般咁，都係呃鬼佬貨式，係咪呀??
    [版主回覆06/04/2010 21:53:00]中方自助餐都係呃洋人多架啦! 除咗個炒麵好好食，其他都好麻麻~
     
     

    回覆刪除
  11. 菲仔2010年6月3日 下午6:09

    我估妳煮仲好味過佢
    [版主回覆06/04/2010 21:52:00]我認架! 我認我煮得好食過佢......好多!
     
     

    回覆刪除
  12. Kelly Chan2010年6月4日 上午6:10

    得咁少野食,仲要唔好食,下次咪鬼去,費事阻住個肚食好野MA,HEHE!!
    [版主回覆06/04/2010 21:51:00]咁又唔止我攞果碟咁少野食，而且人地新開張嘛~
     
     

    回覆刪除

訂閱： 發佈留言 (Atom)
Related Posts Plugin for WordPress, Blogger...