2010年6月21日星期一

週末周圍影影影 (2010年6月20日)

整個weekend 天氣極好!1775465355.gif image by veronica_tsim
雖然只得廿零度,不過有大太陽,加上一滴風都無,所以好鬼熱之餘,手腳都要搽哂防曬先敢出街!

天氣咁好,最好就係影花花嘞!

每次影咗d好靚既不知名野花,返到屋企查吓書上網做吓research,搵出花既名稱 + 習性......真係好有滿足感!  實在太好玩嘞~~~~

所以我要趁住依個天氣超好既夏天,盡量影多d花花靚相!!!!


尋日Father's Day 要返去6299度食lunch,不過我晨早就摷醒Mr.T陪我去"癲"!

 因為我今次最主要係影佢 - Common Poppy (野罌粟)~

 影野罌粟既地點係一條交通繁忙且雙線行車馬路,中間用作分隔來回兩線既窄長草坪!

依條長草坪一到咗春夏季就會生滿各種野花,council 會定期派人清理草坪上雜草,所以要影相就要快手!

平時來回兩線實在太多車太危險嘞! 所以老公禁止我平日一個人去影相,寧願趁星期日晨早無乜車,早d起身及實我任我影個夠~~~

 野罌粟係一種每年6月至8月盛開既野花,不過因為而家太多人用除草劑,令到野罌粟喺英國已經越來越少見......

 野罌粟疏疏落落夾雜在生滿白野菊既草坪上......

 因為顏色鮮艷,望落反而一枝獨秀好突出!

 靚還靚,但野罌粟含有生物鹼毒素!

一聽到"罌粟"2字,而且又係有毒既,好容易就會聯想到毒品鴉片......不過其實野罌粟 + 可以提煉毒品既鴉片罌粟係唔同架!

_342.gif image by veronica_tsim
 兩者最大分別就係 - 野罌粟花梗、花莖、花蕾上都被有細絨毛; 而鴉片罌粟就全棵光滑無毛既~


 野罌粟花蕾

雖然今次我主要係影野罌粟......

 不過其實馬路草坪上生得最多既係依種白色野菊 - Oxeye Daisy~

 Oxeye Daisy 中文名牛眼菊, 法國菊, 法蘭西菊或濱菊~

 超級粗生,成條草坪比佢地霸哂咁滯!!  而且春夏兩季經常見到生滿motorway 兩旁~

但當中都有少許"漏網之魚"攝到位......

 Rough Marsh Mallow  (Althaea Hirsuta)

Rough Marsh Mallow 每年6至7月開花; 粉紅色小花直徑只有約25mm,花莖被有細絨毛; 現屬英國稀少品種,集中生長南部Kent + Somerset~

 Cornflower (矢車菊)

Cornflower 係一種過往好常生長於農作物田既野花; 由於英國種植小麥、大麥、黑麥、燕麥等既田地,以前一律被稱為"corn fields",依種紫藍色野花亦因此而得名"Cornflower"~ 並非粟花既花啊!

隨住現代農業發展規模集約化,加上過份使用除草劑,cornflower 已經絕跡農作物田! 而且過去50年裡面,全英國cornflower 生長點由原本264個銳減至3個......依種咁靚既紫藍色野花已經快將頻臨絕種嘞!!


一早喺2條馬路中間挺而走險影完一大輪後,晏晝轉戰Glasgow Fort 隔離休憩處既人工湖影天鵝 + 鴨仔!

不過都有影花花......

 Meadow Cranesbill~ 有個唔多好聽既中文名叫做"草原老鸛草"......

名衰唔緊要,最緊要樣靚!!
yy7.gif image by veronica_tsim

 直徑3至3.5cm 紫藍色小花,每年6至8月開花~

 天氣大好,野鴨出哂來曬太陽唔再喱喺樹叢~~~~

 原來野鴨都幾大男人果喎!  e.g. 個男人行頭,2個女人一左一右跟尾...(大婆 + 二奶?? )

 野鴨媽媽帶住鴨仔們游水,一眼關七都不忘啤咗我一眼,好似同緊我講: 影咩呀影!!

 我記得舊年冬天前渣車經過,明明見到佢有個伴果喎!

 點解而家得返佢一個既呢?

 佢完全唔怕人架!

 不過我覺得佢一個孤零零好可憐......

搵日我要帶d野食去餵佢!!!
Smiling-Small.gif image by veronica_tsim


20 則留言:

  1. 嘩..........好靚呀 ......真是靚到HK 都抓不到.....
    [版主回覆06/22/2010 05:34:00]香港野花種類未必夠英國靚 + 多,不過香港都仲有好多好靚既地方既!
     
     

    回覆刪除
  2. 哈哈~~睇你既Blog唔單止好開心,仲學到好多野添啊 >3< D花真係好靚啊!! 完住唔似生係馬路邊 >< 呢排見到好多朋友去日本關西,都係周街有好多 Oxeye Daisy啊~ 真係好靚呢 香港要特登去公園或者行山先見到D咁靚既花花草草呢~!
    [版主回覆06/22/2010 05:33:00]香港地少人多污染又多,都無咩地方比花花生存咯......
     
     

    回覆刪除
  3. 妳影既花花相好靚
    咁靚既花睇到個人都開心d呢~~
    [版主回覆06/22/2010 05:31:00]多謝Andrea!
    不過d野花好靚我先影到靚既花花相啫~
     
     
     
     

    回覆刪除
  4. 你都研究左好多花種習性 野罌粟花蕾垂低頭幾得意咁....
    [版主回覆06/22/2010 05:30:00]我好鍾意野花嘛! 對於自己鍾意既野我好有興趣知多d架~
     
     

    回覆刪除
  5. WA。。。您一年後咁都認得個隻白鴨。。。好厲害呀!!  您咁講, 我都覺得佢好可憐呀。。佢個樣都好似唔好開心咁呀!!您記得要帶埋野食去探佢呀! 以前我BF 同佢D FD SUMMER 都有去餵鴨仔。。。不過我就唔夠膽餵! 我太驚除人以外既動物啦~ 
    [版主回覆06/22/2010 05:29:00]哈哈~~~ 果隻唔係白鴨來架,係天鵝呀!  我唔係認得佢,只係果個人工湖之前一直都有2隻天鵝架嘛! 天鵝搵到自己另一半後,一生一世都會一齊架~ 所以我好奇怪點解得返佢一個囉?
     
    我都覺得佢個樣好似好唔開心~ 我一定會返去餵佢,因為我住得都幾近!
     
     

    回覆刪除
  6. VERY NICE
    [版主回覆06/24/2010 00:43:00]Thank you!
     
     

    回覆刪除
  7. d 花花好靚
    香港係郊外都係見樹個d 多,好少遍地都係花…
    同埋好想知係點上網search 架?我次次都影左相唔知點搵佢係乜…
    [版主回覆06/24/2010 00:41:00]我買咗2本野花圖鑑,所以影完相後,我會先查圖鑑搵出名稱,然後先再上網搵多d有關既資料囉!
     
    我比幾個有關花野生生態資料庫網址妳吖~ 希望妳會有用啦:
     
    - http://web.igarden.com.tw/magazine/
     
    - http://www.hkwildlife.net/index.php
     
    - http://www.floral.com.tw/
     
     

    回覆刪除
  8. 妳諗住帶d咩去餵隻天鵝 ??
     
    [版主回覆06/24/2010 00:34:00]蛋糕或者麵包啦!
     
     

    回覆刪除
  9. 呢幾日無煮飯呀??
    [版主回覆06/24/2010 00:33:00]依幾日熱到無咩胃口,連煮都唔多想煮.......  不過尋晚煮咗麵啊~~~
     
     

    回覆刪除
  10. 哈哈,在你的blog,我学会了buttercup, 在送女儿上学的路途中有好多这些野花,于是就对她这就是buttercup 啦。女儿:你怎么知道的??我:是有一个朋友說的。
    [版主回覆06/24/2010 00:33:00]係呀~ 咁妳囡囡鍾唔鍾意buttercup 呢?
     
     

    回覆刪除
  11. 感覺好似會落雪的地方, 夏天的野花特別靚.....等我再抓抓HK 可以影到邊D 靚靚花花先
    [版主回覆06/24/2010 00:32:00]咦......我又無咁唸過,不過妳一提到又好似真係喎!
     
     

    回覆刪除
  12. 好多靚花呀~><
    不過原來罌粟都有分唔同既類別呀...唔怪之得呢D罌粟可以咁大條道理留係比人睇得到既地方啦!
     
     
     
    [版主回覆06/24/2010 00:31:00]係架~ 依種同製造毒品果種罌粟唔同架!
     
     

    回覆刪除
  13. 嘩, 真係好靚呀, 我最鍾意係嗰啲白色野菊花!  :p
    [版主回覆06/24/2010 00:30:00]牛眼菊依度一到夏天周圍都見到~
     
     

    回覆刪除
  14. 濃情朱古力碰上士多啤梨2010年6月22日 上午12:10

    D 花好靚呀..香港真係好少機會見到呢D花..
    [版主回覆06/24/2010 00:29:00]香港地少人多,污染又嚴重~ 不過而家好多人用除草劑,英國好多野花都越來越少嘞......
     
     

    回覆刪除
  15. ... keep sharing with us.... ....Have a nice and relax day!
       ......................................................  
    [版主回覆06/24/2010 00:28:00]Thanks for visiting~
     
     

    回覆刪除
  16. Gaileは林家歐巴桑2010年6月22日 上午2:51

    妳又知果隻係鴨公??唔俾佢係女架...一女帶住兩隻"小白臉"
    我都鐘意佢
    [版主回覆06/24/2010 00:28:00]緊係唔比佢係女啦~ 因為果隻係綠頭鴨來架!  雄性頭 + 頸都係深綠色 (張相陽光問題望落係黑色!); 雌性呢就好似後面跟住果2隻咁既樣~
     
    我都好鍾意依張相架!
     
     

    回覆刪除
  17. 影得好靚靚呀 ^^ k
    [版主回覆06/24/2010 00:25:00]Thanks Katie~
     
     

    回覆刪除
  18. d野罌粟係條交通繁忙的馬路上都可以生長得甘靚........
    [版主回覆06/24/2010 00:25:00]而家好多人用除草劑,野罌粟已經越來越少見嘞!
     
     

    回覆刪除
  19. 我呢度的天鵝都唔怕人架﹗ 散步時唔讓人添架﹗
    [版主回覆06/24/2010 00:24:00]依度有好多天鵝唔怕人仲好鬼惡架!!!! 有時會追住人問人攞野食架.......
     
     

    回覆刪除
  20. 今日我行返屋企時﹐仲見到佢地係條河度唔俾的船泊位﹗
    [版主回覆06/25/2010 18:00:00]連船都唔怕??? 德國d天鵝咁鬼惡......
     
     

    回覆刪除

Related Posts Plugin for WordPress, Blogger...