四人飯局@泗和昆仲軒 (2010年5月27日)

朋友星期三晚來電約星期四晚食飯，好耐無見過依2位朋友，就煮少晚啦!

約咗喺昆仲軒本來食任食打邊爐~ 點知去到先知因為而家夏天，佢地暫時唔再做打邊爐! 9月左右任食打邊爐先會回歸~

無打邊爐食，又廢事渣去第二度，咁叫小菜食飯啦......

4個人6碟餸都係由我發版既!

因為餐牌竟然無英文! 而除咗我之外，老公 + 2位朋友都唔識睇中文......

點咗個4人套餐......

 套餐菜乾例湯一煲

d湯煲到白哂哂，望落好似好出味好濃......但查實味道淡茂茂如水!

咁多料去煲都無味? 係咪對咗好多水呢??

 套餐包1碟雙拼，揀咗燒鴨拼燒肉~

不過鴨太鬼肥; 燒肉皮唔脆又乾爭爭......唉!

4人套餐另外喺指定餐牌任點3款小菜......

 椒鹽豬扒

依張相唔係食剩先影果喎! 一上菜已經係咁架嘞!!

得果幾塊仔都唔知點解要用咁大隻碟??

依個味道唔錯~ 不過得d屎既份量，每人分得幾多塊呢可??

 時菜炒蝦餅

依個普普通通.......不過又係咁 - 咁大隻碟裝得半碟餸!!!

好似比人偷食咗另外半碟咁.......好心一係用細隻d碟啦~

 煎釀三寶

依個份量最正常! 不過依度既煎釀三寶同香港既三寶非常唔同......

第一 - 無紅腸~ (我喺英國都未見過紅腸!)，取而代之變成茄子、青椒 + 苦瓜依個組合;

第二 - 無鯪魚肉~ 所以用蝦膠代替......

材料全部改頭換面，基本上整味餸已經失哂真，無哂原本炸到香口又熱氣既神韻!

仲有咪睇佢有個汁好似好入味咁款，其實個汁有或無都無乜分別......

 4人套餐回贈蘇格蘭膏蟹1隻，用來薑蔥炒~

唔好食囉~ 炒得唔夠乾身仲有大pat 汁喺底，完全無鑊氣果隻!! 我屋企無火煮食自己炒龍蝦，好食過佢多多聲啦!!!

 老公要食呃外國人既中式牛柳，所以另外點咗1碟~

依個好唔好食呢?

我唔知呀!  一路食飯一路傾計，到我想夾依味餸時，已經比人食鬼哂!!! 我一舊都無食過喎.......

 飯後甜品 (未影相已比人劫咗1粒心心!) 無食~ 所以唔知咩味!

其實仲有個飯後糖水 - 紅豆沙~

不過果個所謂紅豆沙真係核突到我連相都唔想影!  

大家有無見過啡色兼似水咁稀既紅豆沙?

果窩野十足十肚仔扭計時開完大咁款......


成餐飯只可以用淡茂茂 + 唔好食來形容!

平時昆仲軒飲茶點心咁好食; 之前又去過昆仲軒幾次食晚飯，真係估唔到尋晚依餐咁唔掂......

 睇我咁既樣就知依餐唔好食啦!

上星期日喺Chinatown 飲咗一餐我 + 老公都覺得有史以來最難頂既中國茶;

連一向飲中國茶非常好食既昆仲軒，尋晚餐飯又唔掂......

所以我好有理由相信今時今日喺Glasgow 最好食既中菜係......

我屋企! 即係我煮果d!!

我都自覺好大口氣~ 不過依啖大口氣好有可能係事實......