蕃茄銀芽肉碎湯 & 鹹魚雞粒炒飯
本來依餐係唸住食右上角"今晚食乜鬼?"個menu既!
不過想去煲湯時先發現，之前果晚既蕃茄湯仲有剩夠2個人喎! 咁不如煮餐簡單少少，飲埋剩返既湯啦......
之前果晚食咗魚香茄子，仍然好想食梅香鹹魚!
不如整個鹹魚雞粒炒飯啦......不過無隔夜冷飯喎......
咁即刻煲啦~~
只要有齊哂材料，依個飯好快手搞掂架咋!
經過連續2晚既梅香鹹魚攻勢，我終於成功令老公開始接受鹹魚嘞!
平時去泗和行飲茶時叫個鹹魚肉餅飯，佢掂都唔掂 - 連肉餅都唔食喎!!
但依餐炒咗一大砵飯，當我第一碗炒飯只食咗一半時，已經見老公"不"緊第二碗! 仲要慌死蝕底咁款，一路"不"一路壓實d飯大大碗果隻!
當時我心唸: 喂~ 我未添飯架!! 留返d比我好喎!!! 
我: 好唔好食呀?
老公: 好正呀!!!!!!! (講時一路點頭一路"不"飯入口......
)
我: 鹹魚喎~~~~~~~ 鹹魚你都覺得好正? 你食唔食到鹹魚味先??
老公: 食到呀! 好鹹呀~ 不過撈埋d飯就啱啱好!
我: 咁如果我下次整鹹魚雞粒豆腐，你會唔會食?
老公: 會呀!飯後老公攤喺梳化........
老公: 哎吔~~~~ 我好飽呀!! 哎吔~~~~ 我: 你真係覺得個炒飯好味?
老公: 我覺得唔好味都唔會食咁多食到咁飽啦!! 點解妳不停問?? 
我: 咁你一向至憎鹹魚架嘛!! 
老公: 係囉! 我咁憎鹹魚，妳都整得咁好味! 我Honhon 真係好叻呀~~~好~ 下次我要挑戰令老公接受蝦膏!!
蕃茄銀芽肉碎湯(參考食譜)click here~ 鹹魚雞粒炒飯食譜click here~
妳咪咁長氣係咁問佢好唔好食啦, 一路"不"一路壓實d飯...Mr.T都盡在不言中
回覆刪除[版主回覆05/14/2010 20:44:00]問清楚好d! 而家証實咗佢已經初步接受咗鹹魚，咁我可以開始 逐步逐步將鹹魚越來越重手嘛!
yummy yummy
回覆刪除[版主回覆05/14/2010 20:41:00]Thank you~
我都想食鹹魚呀﹗不過我係呢度好似冇見過﹌ 哈哈哈 ﹗原來你老公本來唔食鹹魚架?﹗ 咁咪蝦醬都唔食囉? 你明知你老公唔食鹹魚你都要叫鹹魚肉餅 ﹌ 哈哈哈 ﹗你望住你老公添飯仲留意佢壓實的飯﹌ 哈哈哈哈哈哈 ﹗原來真係唔食蝦醬架﹌
回覆刪除[版主回覆05/15/2010 01:47:00]妳試吓d亞超搵唔搵到啦! 我果隻係泰國野來架，好似樽腐乳咁 (不過係膠樽!)，有油浸住既，超梅香啊~~~~
係呀~ 蝦膏鹹魚我老公一向至憎! 試過佢喺雪櫃摷到我盒蝦膏，佢話好臭 + 叫我快d揼咗佢.......我下次就係要挑戰佢蝦膏炒飯!
去飲茶果個鹹魚肉餅飯好正架! 咁佢唔食我要食嘛~
你d鹹魚攻勢好勁呀 你老公都不得不愛上
回覆刪除[版主回覆05/15/2010 01:42:00]雖則我老公係竹升，但其實我覺得有好多野佢根本唔係唔鍾意食，只係99從來無整過，佢無機會試先話唔鍾意!
岩的, 係時候教下你老公, 咩叫中國傳統飲食.........
回覆刪除[版主回覆05/15/2010 01:52:00]我一路都有教佢啦~ 淨係內臟我都不知又呃又氹昆咗佢食幾多次! 早排去羅馬旅行時，先叫做有少少成績令佢鍾意食雞肝~
係呀 ! 唔知點解d外國人唔鍾意食 內臟, 如果佢地去大陸旅行, 見到d人食牛什, 豬腸.......... 實嚇死佢地............ 不過,你好似 整過 滷水豬雜 煲, 老公真係唔食 ? 甘咪一個人食晒.........
回覆刪除[版主回覆05/15/2010 02:16:00]唔係架~ 其實歐洲好多地方都有食內臟習慣架! 尤其法國 + 意大利; 英國又有kidney pie + stew; 蘇格蘭又有血腸, haggis......其實都好有食內臟文化架! 只係好多人硬係未試過就話核突 (好似我老公依種人!)
豬雜暫時仲未令到老公鍾意呀! 試過喺台灣買咗串麻辣豬腰，我呃佢話係豬肉....點知佢食完就知我呃佢嘞! 所以係呀 - 煲滷水豬雜我一個人食哂呀!
哈哈, 真係好有成功感 !! 可以令到老公仔鐘意食一樣野 支持你下次試下 蝦醬 ^^ k
回覆刪除[版主回覆05/16/2010 14:58:00]哈哈~~~~ 成功感都係其次，最好就係而家少咗樣佢完全唔食既野，煮野時要就住佢口味都可以就少d!
下次整蝦醬蒸豬肉俾妳老公食
回覆刪除[版主回覆05/18/2010 07:02:00]依個對佢來講可能勁得滯，我唸都係由蝦膏炒飯入手好少少!
Hey Mrs. T, haven't left you a message for a long time... I admire your effort in getting your hubby to try things he didn't like... my boyfriend doesn't like ANY seafood... he wouldn't try any even if I force feed him!
回覆刪除[版主回覆05/18/2010 07:01:00]your BF doesnt like seafood? such a shame!
well i always try my best to convince Mr.T to try something i like~ even if i fail, i would still cook them for myself!
我自己就好鍾意鹹魚同蝦醬嘞! 但我Honey話 D 蝦醬 好臭呀! 激死!
回覆刪除希望你挑戰成功啦~
[版主回覆05/18/2010 06:58:00]唉~ 試過老公喺雪櫃摷到我包馬拉盞，佢大叫: HonHon~ 咩來架? 好臭呀!!!!! 係咪變壞咗? 快d揼咗佢啦!
所以蝦膏會係比鹹魚更有挑戰性既challenge!
咸魚都OK,我鍾意蒸"立"腸呀~~
回覆刪除[版主回覆05/18/2010 06:56:00]腊腸我由細到大都唔鍾意! 我鍾意潤腸~