2010年4月9日星期五

高木直子圖文系列


之前有網友叫我講吓"一個人住第9年"既內容......

其實作為高木直子既fan,我一早都想講吓點解我咁鍾意睇高木直子既書~ 目前為止高木直子作品系列總共出版咗12本中譯本 - 我已經全部有齊哂 + 睇哂!

高木直子既圖文書內容係用漫畫加文字既形式,以佢自己第一身經歷為本道出單身日常生活趣事、旅遊見聞、童年回憶...都幾似睇緊人地個blog 架! 哈哈~~~  

其實第一次接觸高木直子既書係"一個人上東京"~ 當時只係睇咗YesAsia 既新書簡介好似幾得意,所以隨意買來揭揭~
2008111213530154.gif image by veronica_tsim點知書到咗後一睇就即時愛上咗!

即時拿拿淋一口氣買埋高木直子當時其他2本已出版既中譯本1775465334.gif image by veronica_tsim- "150cm Life", "一個人住第5年"~

_342.gif image by veronica_tsim 從此我經常留意住高木直子作品既出版日期,幾乎每次佢一出新書,我都會即時買!

雖然我第一本高木直子係"一個人上東京",但其實依本係高木直子第3本出版既中譯本作品!
(2005年5月出版)


"一個人上東京"內容係講述作者自己為咗追求自己理想 - 成為自由插畫家~ 毅然決定由家鄉三重縣隻身去東京尋找機會實現夢想! 書中描述作者面對一個人新生活既興奮又徬徨,一方面對未來充滿希望,但同時又感到不安; 偶爾又會思鄉掛念三重縣既家人......

"一個人上東京"令我睇得好投入! 唸起當日自己都係隻身由香港來蘇格蘭讀書,連寄住既親戚見都未見過~ 果種不安完全感同身受.......


"150cm Life 系列"

- "150cm Life" (2004年6月出版)

- "150cm Life 2" (2006年1月出版)

- "150cm Life 3" (2007年3月出版)


講述高木直子身高只有150cm,喺日常生活上帶來既好處 + 不便所發生既趣事~

我無佢咁矮......所以我無乜共鳴!  不過我都好enjoy~~~


 "一個人去旅行系列"

- "一個人去旅行" (2007年10月出版)

- "一個人去旅行2年級生" (2009年10月出版)


講述高木直子一個人獨自到日本各地旅行既所見所聞 + 地方美食~ 雖然唔係我自己親身去旅行,但我睇得好鬼開心~~~_343.gif image by veronica_tsim


"一個人泡澡"係高木直子書中,唯一一本我未試過重睇既! 可以話係我最唔鍾意既作品~
(2006年10月出版)


內容係作者親身嘗試各種功效既浸浴方法 + 浴後感 - 個人覺得只係一本有漫畫公仔既女性護膚保養心得書!


(2006年5月出版)


高木直子各種生活經驗既第一次回憶 + 當時既感覺~ e.g. 第一次食麥當勞, 第一次幫襯迴轉壽司店, 第一次蕩失路......
"一個人的第一次"內容非常有趣~ 同時令我唸返起自己好多個第一次啊!


(2008年10月出版)


"一個人漂泊的日子"內容緊接"一個人上東京"後,高木直子初到東京尚未成為插畫家之前,為咗應付高消費既東京生活重擔,一邊做短期打工,一邊習畫 + 繼續尋找機會實現夢想既經歷 + 心路歷程~
雖然佢喺書中描述既生活頗可憐,但佢用輕鬆搞笑既手法表達出來~ 非常可愛既一本小書!


(2009年4月出版)


"我的30分媽媽"係作者以佢媽媽做主角既生活趣事 + 童年回憶~ 內容非常搞笑得來仲好溫馨~~~


"一個人住"系列~

- "一個人住第5年" (2004年12月出版)
高木直子到東京一個人生活咗5年後,將一個人住第1年 + 第5年來作一個對比 - 睇吓有咩轉變; 除咗已適應咗一個人生活外,仲累積咗好多一個人住既日常生活小心得e.g. 一個人煮食, 超市購物慳錢大法~
書中仲道出好多一個人住既好處 + 辛酸~ e.g. 病咗時要一個人去睇醫生 + 無人照顧果種淒涼慘況......

- "一個人住第9年" (2009年12月出版)
顧名思義係高木直子一個人住第9年既生活啦!


同"一個人住第5年"比較,我有理由相信高木直子已經實現咗佢既夢想嘞!

e.g. 由之前住既無間隔狹窄小套房,搬到有一廳一房、獨立廚房 + 浴室既單位; 由之前無多餘錢訂報紙,到而家可以個個月訂報; 由之前好又一餐,醜又一餐,到而家開始講究煮食材料......佢既一個人生活明顯改善咗好多 + 豪咗好多!

(唔出奇吖~ 據我所知高木直子部份作品已經被翻譯成韓文、泰文、台灣繁體中譯本 + 大陸簡體中譯本~ 齋收版權都收到手軟啦! )
"一個人住第X年"係我個人最最鍾意既高木直子作品!Smiling-Small.gif image by veronica_tsim


因為我當年都係一個人來英讀書~ 後來從親戚處自己搬出來,一個人住咗一段長時間,所以睇高木直子依2本書時特別有共鳴!_1344.gif image by veronica_tsim


尤其當睇到佢講述自己行勻幾間超級市場格價時,我即時好有同感: 哈哈~~~~ 我都係咁架!

睇完"一個人住第9年"後知道高木直子喺東京既一個人生活比以前大大改善,雖然我並唔認識高木直子本人,但我心裡面好戥佢高興啊~~~


睇高木直子既書除咗好enjoy 有共鳴之外,仲會勾起自己好多未婚之前既回憶~ 只要佢一日有新作,我都一定會支持到底架! _2264.gif image by veronica_tsim

現時高木直子尚有5本作品仲未被譯成中文版~ (最衰我自己又唔識日文啦! ) 希望台灣大田出版可以快手d譯埋依幾本啦!



沒有留言:

發佈留言

Related Posts Plugin for WordPress, Blogger...