黑鑽石炒滑蛋配北海道牛奶吐司

做乜改個懶靚既名叫"黑鑽石炒滑蛋"?

一，因為黑松露一向被喻為"黑鑽石";

二，依個炒滑蛋除咗用咗黑松露醬之外，仲用咗原粒黑松露!

做法:

1. 雞蛋4隻用叉輕輕打勻。( 要輕手!!!! 否則蛋質感會變老~)

 2. 用小火於鑊中燒熔牛油1小塊。(因為小火不易燶鑊，所以不需要加橄欖油!)

 3. 待牛油完全熔化後加入蛋液，和牛油拌勻。

4. Keep 住小火，一邊煮一邊用木匙輕輕拌勻蛋液至creamy 狀，大約需時3-4分鐘。

5. 加入黑松露醬1小匙，和忌廉 (single cream) 或淡奶2湯匙，輕輕拌勻繼續煮約1分鐘，用磨碎黑胡椒和海鹽調味後熄火。

6. 將原粒黑松露切薄片，略略切碎灑下鑊略炒一會後，灑在炒蛋上即成。

7. 配上北海道牛奶吐司同食 - 北海道牛奶吐司(湯種)食譜click here~

一直都好懷疑 - 黑松露係咪真係值得咁貴既價錢呢? (e.g. 1kg約1萬港幣)

好食確係好食~ 但我個人覺得又未至於好食到值1萬港幣1kg!

既然好食既程度並非驚為天人，咁咁貴一定係因為罕有產量少啦!

我曾經喺法國凡爾賽 (Versailles)一個室內菜市場裡面，見過一位菜販既攤檔上有5、6粒，粒粒如乒乓大小既黑松露，好隨便求其咁放埋一邊......

我咁大個女第一次見到咁多咁大粒既黑松露 (我指見實物呀!  賭王唔知用幾多百萬投返來上哂報紙果咋相唔算數!)，因為菜販擺得咁求其，令我好意外 + 少見多怪地向老公不停: OMG! OMG!!

菜販既反應係 - 無反應!  我唸佢都睇死我地唔會買，唔洗點理我地~ 不過有幾粒"黑鑽石"喺度喎，佢唔驚我地偷咩??

我睇菜販個樣...佢真係一d都唔驚喎~ 甚至係一d都唔care! 因為當我 + 老公仍然企喺檔前，牛咁眼望住果幾粒黑鑽石喺度OMG! OMG!! 既時候，依位菜販施施然拎轉身背向我地做自己野......

不禁令我懷疑 - 黑松露本身是否真係咁矜貴? 還是只係"物離鄉貴"??

依粒其貌不揚黑忟忟，且帶些少臭腳味既菇仔，離開原產地去到外國變咗天價，都有人肯比多多錢買......

唔知d松露商人會唔會揞住半邊咀笑 ，覺得買既人好戇居呢?

姑勿論係咪值得都好，黑松露價位的確係唔平!

 所以早幾日我無意中網上睇到依份"華星冰室"既黑松露炒蛋多士之後......

我個心不停喺度問: 堅定流呀? 35蚊佢地點回本呀?? 

要我整到好似華星依份咁既樣，用黑橄欖就差唔多......