2010年4月29日星期四

二人世界四餸一湯 - 2010年4月28日 (附食譜)



蓮藕章魚排骨湯; 梅菜蒸肉餅; 滷水豬雜; 酸齋 + 蒜蓉白菜仔

點解? 點解??140698393_c.gif image by veronica_tsim

點解肉餅一定要自己剁既先好食???

點解買現成搞好既免治豬肉來整會爭咁遠????

我 + 老公都好鍾意食梅菜蒸豬肉!  但以前試過偷懶用現成免治豬肉整出來好麻麻......明明V媽媽整得好好食架嘛~~~~ (咁V媽媽係自己剁既! )

總覺得自己剁肉餅好麻煩! 所以之後我就索性唔再整肉餅,就咁梅菜蒸肉片算嘞.....

直至上次整鹹魚肉餅煲仔飯第一次自己剁肉餅,原來真係好食咁多果喎!

 所以今次麻煩d都要自己剁! (心型肉餅呀! 哈哈~~~~ )

 今次用咗V媽媽之前寄比我既靚靚甜梅菜~ 果然好好味!!!!!

2008111213530154.gif image by veronica_tsim 我由細到大都好鍾意食酸齋!!!

早排見到有位網友好拿手整酸齋,搞到我都好想食!  可惜細問之下 - 發現整酸齋既主要材料炸麵筋,喺英國無得賣~~~~  雖然我真係好想食,不過依度無得賣都無計......

上星期比我無意中喺一個台灣素食網站發現自製炸麵筋既方法,我先知道原來麵筋都可以自己整! (新素時代網站)

 於是我就照版煮碗整咗一pat 炸麵筋......

 雖然成個過程有少少麻煩,不過我總算成功整咗一碟久違既味道出來!

連食肉怪獸老公都話依碟野好味!! 嘻嘻~~~

 星期一晚整咗大煲滷水豬雜......

 浸到第二朝星期二先切來做lunch!

 依大碟野老公完全唔吼! 得我一個人食就緊係一餐食唔哂啦!!

尋晚我氹老公試咗一塊豬心.....

我: 係咪好似牛肉咁呢?

老公: 唔係......

滷完豬雜剩返大煲滷水,只用一次好似好嘥料咁!  不過雪櫃又唔夠位擺咁大煲野......

 喺冰格摷咗一包牛肚 + 一包牛孖筋出來......

煲滷水索性再用多次 - 一於整完豬雜整牛雜!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>

Weekend 其實都整咗其他野食,不過無時間記低......

 湯種北海道牛奶吐司2個;

 老公千呼萬喚恨咗好耐既V記朱古力雪糕1大盒; (我環保! )

 蝦皮撈蝦子麵~ 簡單快手又好味!

 蓮藕章魚排骨湯食譜click here~

 梅菜蒸肉餅食譜click here~

 滷水豬雜食譜click here~

 酸齋食譜click here~

 湯種北海道牛奶吐司食譜click here~

 V記朱古力雪糕食譜click here~


17 則留言:

  1. Gaileは林家歐巴桑2010年4月29日 上午3:32

    我都唔知點解用手剁先好食,可能出面買既碎肉係用機攪,就咁攪下攪下攪到肉質變哂掛,同埋依邊搵唔到甜梅菜,所以我到而家都未整過一次梅菜肉餅(其實我好恨食)
    Mr.T唔食豬雜妳咪可以慢慢瘋享囉~
    而家先post個雪糕出黎,睇怕Mr.T食得差唔多嘞
    [版主回覆04/29/2010 19:47:00]真係唸極都唔明箇中道理.....  不過為咗好味,麻煩少少都無問題~
     
    哇~ 睇來妳果邊真係好多野都無得賣喎! 起碼我依邊間間中式超市都有梅菜賣,就算V媽媽唔寄比我都買到有得食~
     
    盒雪糕仲未食哂喎! weekend 熱返少少,我一整好雪糕都未雪得夠時間,老公就整咗一大碗~ 但星期一又涼返好多,凍到連老公咁鍾意食雪糕都唔想食住......
     
     

    回覆刪除
  2. 哈哈.... 豬心似牛肉?!   您老公唔吼, 咁您不如請我食豬腸啦!! 我好吼呀!! 其實自製既雪糕會唔會好似食mousse咁溜呀?
    [版主回覆04/29/2010 19:41:00]我想佢同我一齊enjoy 我鍾意食既野嘛!  不過佢始終都係唔鍾意.......
     
    自製雪糕 唔似 mousse 架! 但同普通朱古力雪糕一樣,不過仲更加好味!  (我老公話既! )
     
     

    回覆刪除
  3. 心型盤一買返黎就開光,好快手喎
     
    豬心點會似牛肉呀,妳真係擺明氹 Mr. T落嗒  
    [版主回覆04/29/2010 19:38:00]今次好快手呀呢?  太鍾意佢嘛~
     
    擺明氹佢落嗒架啦!  我見佢都鍾意雞心,咪想convince 埋佢鍾意豬心囉,點知佢都係唔受......
     
     

    回覆刪除
  4. 哈哈, 我都係梅菜肉餅最超級粉絲 !! 所以每星期都會叫k媽咪整至少一次比我帶lunch box ~~ 我食梅菜肉餅"令捨"開胃 食成大碗白飯  k
    [版主回覆04/29/2010 20:15:00]Katie 妳係咪用Mac 來留回應? 完全睇唔到妳個留言啊~
     
     

    回覆刪除
  5. 算啦, Mr. T唔食我就幫你食埋佢啦 ... 哈哈
    手剁既肉餅好食過攪爛既100倍, 我婆婆都係手剁架, 剁到手軟(因為我地人多又要帶飯), 我地食冬菇, 魷魚蒸多, 梅菜用嚟蒸魚 ... 手剁好味既原因應該係無攪爛哂d肉質, 攪爛一d質感都無, 可能連d肉汁都攪到無哂, 無口感, 無肉香味
    我都好想食一碗朱古力雪糕呀 ...
     
    [版主回覆04/30/2010 00:00:00]唔明點解咁多男人唔食內臟既呢?
     
    手剁同機搞真係無得比! 而且我一唸起街市果部碎肉機,我就覺得反胃.....
     
    哈哈~~~ 我老公好鍾意食雪糕,但佢好多時食完雪糕都會肚疴~ 不過唯獨食我整既雪糕就無事!
     
     

    回覆刪除
  6. 酸 齋我勁鍾意食呀~~~我平時出街成日都買架,好好味呀!!
    [版主回覆04/29/2010 23:54:00]我以前喺香港時成日去齋舖買5蚊酸齋就咁篤住來食架!
     
     
     
     

    回覆刪除
  7. 炸麵筋都識, 你真係布0野難倒你
    [版主回覆04/30/2010 16:56:00]我鍾意食但依度無得賣嘛! 我都係上網學架咋~
     
     

    回覆刪除
  8. 您個blog D食譜好掂啊,勁呀,我要好好學習一吓先得,您好有心機!
    [版主回覆04/30/2010 16:55:00]多謝讚賞~ 我唔勁,只係熟能生巧啫! 我整到既野,人人都整到~
     
     

    回覆刪除
  9. 我呢邊的豬肉﹐唔知點解半肥瘦超多筋﹐ 攪到我要買全瘦肉﹗的鬼佬見肥就唔食﹐ 見唔到肥就係咁食(即係快餐)﹗ 有一次我話我好鐘意食ROAST PORK﹐ 個德國女仔竟然即刻係我面前做左個嘔既表情﹗ 我即刻覺得佢做咩咁冇品?﹗ 就算我以前講英文﹐ 屋企人都唔鐘意我講個PUKE字﹐ 佢地話一係THROW UP一係VOMIT﹗ 呢個女仔竟然仲整埋個嘔樣加聲出黎﹌ 佢自己日日食PIZZA同KEBAB又好冇肥咩?﹗ 的肥佢睇唔到之嘛﹌ 噢﹗蝦子麵我都覺得超方便又好味﹗ 放湯又得﹐撈又得﹌ 不過我食完好快又肚餓﹌
    [版主回覆05/02/2010 05:57:00]買豬腩肉會唔會好d呀?
     
    德國人唔食roast pork 既咩?  我蜜月時去意大利,食過一間主打燒大舊肉既德國餐廳喎!
     
    係囉~ 我都覺得食完蝦子麵好快又會肚餓返......
     
     

    回覆刪除
  10. 真係乜菜都俾妳煮混????
    [版主回覆05/02/2010 05:54:00]緊係未啦!
     
     

    回覆刪除
  11. 你今次整的餸好岩我口味, 特別是酸齋, 我這兒也很難買到, 我又唔識整, 都係返香港時食過夠.
    [版主回覆05/02/2010 05:53:00]蘇格蘭都係買唔到整酸齋既炸麵筋架!
     
    我post 咗酸齋食譜,裡面有示範點整炸麵筋,妳都可以照做,咁咪唔洗返香港先有得食囉!
     
     

    回覆刪除
  12. 整咁多野開一食會都得 lu~~碟梅菜蒸肉餅係咪特別好食
    [版主回覆05/02/2010 05:51:00]唔係一次過食哂架嘛!
     
    自己剁肉餅係特別好食架~
     
     

    回覆刪除
  13. 我見我呀ba平時買會叫個相熟o既豬肉叔唔好搞咁爛! 之後返屋企就自己再剁... 好似話咁樣d肉會好d!!
    [版主回覆05/02/2010 05:50:00]點解會好d呢? 我唔明白箇中原理 ,但我個人經驗自己剁的確係好食好多!!
     
     
     
     

    回覆刪除
  14. 真係唔明整梅菜蒸肉餅, 點解自己剁真係好味好多
    [版主回覆05/03/2010 06:47:00]或者好似樓上位網友講既原理啩!!?!?
     
     

    回覆刪除
  15. 因為機器搞係用死力 , 影響肉質 !!! 自己剁就唔係用死力ga ma~應該咁樣講會o岩d !!
    [版主回覆05/03/2010 06:45:00]都有咁既可能......
     
     

    回覆刪除
  16. 自己做酸齋 ~ 你真係好叻啊!
    我都係由細到大都好鍾意食酸齋(同埋所有酸酸甜甜的野). 細個爸爸買一盒齋滷味來加餸, 我會要求多一點酸齋. 然後未開得飯時, 我已經係咁偷食d酸齋.
    [版主回覆05/04/2010 20:03:00]我好鍾意食依個架! 但我依度無炸麵筋賣嘛,所以咪要自己搓囉~
     
    哈哈~~~ 妳細個時咁為食既!  咁妳有無比妳爸爸鬧呀?
     
     

    回覆刪除
  17. 無鬧我啊! 可能佢地已經慣晒我的為食.
    我細個的時候連雪櫃的蝦米都拎/偷來食架.
    [版主回覆05/05/2010 18:10:00]蝦米 + 江瑤柱我都偷食過!  就咁食真係好鮮味~
     
     

    回覆刪除

Related Posts Plugin for WordPress, Blogger...