2010年3月19日星期五

Harry Brown - 2010年3月19日


(唔係Harry Porter 呀!!! )

Harry Brown 係一套低成本既英國戲,好詫異貴為金像獎最佳男主角 + 最佳男配角既Sir Michael Caine 會接拍一套咁既戲! 依個亦係我好奇想睇依套戲既其中一個原因~

戲係關於現今英國社會低下層既青少年問題~ e.g. 濫毒、肆意破壞、暴力......等等既社會問題! 

Sir Michael Caine 飾演一名退役老兵Harry Brown ,唯一既女兒年紀好小就死咗; 長期患病住院既老伴又剛去世......唯一既老朋友Leonard 被居住地方附近一班青少年童黨殺害~

另一方面警方對童黨暴力問題完全束手無策,而且因為缺少証據既情況下,警方對Leonard 既死不了了之~ 無親無故既Harry 忍無可忍,決定自己親手替天行道......

睇完戲真係覺得好心寒~~~~

因為戲裡面對現今英國社會青少年問題既描述係真既!

電視經常有得睇 - d"靚"仔飲醉酒或吸咗毒品high 哂,就算成大班差佬棟喺隔離,佢地都當差人無到自顧自集體毆鬥; 比差人用手扣押上警車,照樣大聲叫囂講用粗口鬧差人,甚至用玻璃樽掟差人; 佢地根本完全唔怕差人,對執法者毫無半點尊重,視法紀如無物......

(我相信又會有人覺得我喺度作大 + 唱衰英國......)

近幾年英國knife crime 越來越嚴重,連入戲院睇戲都會賣廣告呼籲青少年要三思 - 唔好一時衝動用刀傷害別人!

而事實上英國青少年問題並唔係一朝一夕變成咁既地步既!!

早十幾年我初來到英國時住喺親戚屋企,就曾經親眼目擊鄰居夫婦被十多個青少年圍毆,其中一個5呎都唔夠既"靚"仔隨身攞出把刀仔,插傷男鄰居既背! 仲要係當住男鄰居既大肚老婆面前......

除此之外亦聽過新聞 - 一個阿婆被幾個"靚"仔打劫時用刀插死~ 阿婆比"靚"仔打劫咗咩野呢 - 唔係錢喎~ 係幾個麵包!

究竟係邊個既錯而令到而家英國d"靚"仔無法無天?

喺英國政府 + 家長好容易就將茅頭指向學校~ 但喺依個下下講人權既社會之下,學校根本做唔到乜野! e.g. 罰佢地又唔work; 打又話唔可以體罰~ d"靚"仔連差人都唔驚,又點會怕學校呢?

好做唔做既英國政府又會做埋一d所謂人道,但實質浪費又無謂既小動作! e.g. 1993年英國經典James Bulger 童殺案,案中2名兇手當年只得10歲,殺害咗一個只得2歲既小朋友~ 手法殘忍,令人髮指!_097.gif image by veronica_tsim

但2名兇手於2001成年時被釋放,英國政府勞師動眾大費周章為2名兇手安排新身份 + 居住地點,亦唔准傳媒公開2名兇手既真正身份......

結果又點呢? 最近其中一名兇手Jon Venables,因為被發現電腦中存有小童被虐待既相片,所以再次被判入獄! 依d咁既人渣根本唔會珍惜社會比佢地既機會,當初英國政府既"仁慈"做法完全係多餘! 浪費人力物力!!

政府 + 學校都搞班"靚"仔唔掂,咁家長呢?

最近英國青少年流行一種叫做Mephedrone 既軟性藥物,由舊年11月至今,已有5宗同Mephedrone 有關既死亡個案,濫用Mephedrone 者年紀最細只得9歲......

而死者既家長們堅稱 - 死去既子女並非濫藥者! 佢地係正常,用功又關懷別人既青少年......O咀!!!_1271.gif image by veronica_tsim 咁既家長會教出一群點既青少年,可想而知~~~

英國政府、學校 + 家長全部都搞唔掂青少年問題,我完全唔介意若果現實生活中真係有一個Harry Brown 替天行道呀!_1303.gif image by veronica_tsim

(好睇! 不過係一套睇完令人感覺無奈既戲......)



7 則留言:

  1. 你冇作大呀﹗ 我呢邊又有失業人整果十二歲細路女﹗ 佢仲夠膽整個細路成粒鐘﹖﹗我真係覺得冇天理架﹖﹗ 好彩個女仔形容得好﹐所以即刻括到過衰人咋﹌
    [版主回覆03/20/2010 07:17:00]果句唔係寫比妳依種正常人睇架嘛!
     
    係比果d唔順超又要入來睇,睇完又要話我"吹水作大,我寫既野嚇親唔係住英國既人; 但住英國既人就知我作大blah blah blah" 果d鬼鼠八婆睇架~
     
    依單野係啱啱既事呀? 果個失業人幾歲? 依d正人渣!!!
     
     

    回覆刪除
  2. 個衰人二十歲咋﹗佢跟蹤個女仔返屋企咁整佢呀﹗ 個女仔十一歲咋﹗ 不過我覺得就算個受害人幾歲都唔值得俾人咁傷害丫 ﹌
    [版主回覆03/21/2010 05:12:00]果咋失業電車男真係......啱啱香港又拉咗一件 - 廿幾歲無業,喺forum 度又話要強姦女學生,又話要炸曾煲呔屋企! sick!!
     
     

    回覆刪除
  3. 唉依家D青少年問題...都唔係淨係英國架喇...好多地方都有...香港都唔少...真係...都唔知點算...
    [版主回覆03/21/2010 05:09:00]而家d靚仔都唔知食咩大架? 我個年代比父母打 + 大吓話搵差人拉已經好鬼驚,但而家d靚仔完全唔怕差佬.......不過我始終未見過香港有靚仔比差人拉時,仲會用粗口鬧返差人轉頭囉~
     
     

    回覆刪除
  4. 我同你感受一樣﹐所以都唔知好唔好在英國生細路﹐好驚佢地學到壞晒。
    之前睇完你寫LOVELY BONES部電影﹐即刻找黎睇﹐噫﹐OK喎。我都會找找呢套HARRY BROWN
    [版主回覆03/22/2010 06:58:00]生小朋友唔係問題,最大問題其實係父母自己本身! 邊度都會有壞人,邊度都會有機會學壞,但做父母就係教小朋友最大責任果個! 唔可以旨意哂學校 + 政府!
     
     

    回覆刪除
  5. 我係唔住英國既人,aiya,比妳嚇親添
     
    依家香港啲靚仔咪又係好得人驚,幾歲就吸毒,之前我媽咪話有個我唔記得係8歲定9歲已經販毒,以前我地十幾歲仲追緊卡通片呀 ~~~
    [版主回覆03/25/2010 20:00:00]嚇鬼死妳~~~~~~~~~
     
    所以我話而家d靚仔都唔知係食咩大? 天不怕地不怕......反而係大人怕咗佢地!
     
     

    回覆刪除
  6. 嘩 !  嚇C人囉 , 咁都有既 , 半夜破壞人地架車 , 一定心裡唔平衡 , 乜英國治安咁差比香港還勁 . 好驚 .
    [版主回覆04/13/2010 19:44:00]英國青少年問題係好嚴重! 但我唔會認為英國治安比香港差好多~ 始終英國比香港大好多! 治安好唔好 + 犯罪率高低,都係計返比例既! 地大又人多既地方,罪案當然都較多! 而且半夜破壞人地架車,香港都有唔少~
     
     
     
     

    回覆刪除
  7. 係呀...我尋晚上網睇新聞先睇到有單~ 話個男仔比D街童兜把鋤插落條頸度... 變o左植物人... 好好彩後尾個男仔mami幫佢拔喉唔想佢再受苦o個陣個男仔奇蹟地醒返~ 但係佢都已經行唔到路 , 視力同說話能力都完全減低晒...好慘~
    [版主回覆04/14/2010 01:00:00]英國knife crime 真係好嚴重.......
     
     

    回覆刪除

Related Posts Plugin for WordPress, Blogger...