孖T翻啅意大利。羅馬2010 - 旅行團一定唔會帶你去既Quinto Quarto餐廳

第三天 - 2010年2月6日 (Part 2)

是日閒逛完羅馬市名勝後，我地就返去較早前既Testaccio 區食內臟晚餐!

根據旅遊資料所講 - Testaccio 區喺1891年開咗一個歐洲最大 + 最有規模既屠宰場~ 當時屠宰出來既肉類產品會分為5類，分別供應比羅馬市不同階級:

第1類: 屬最高級 + 品質最好既肉，只供應比皇室人員享用;

第2類: 品質次一等既肉類，供應比當時政府 + 教會神職人員;

第3類: 品質再次一等，供應比當時上流社會貴族及有錢人;

第4類: 其實到咗依一類，牛牛 + 豬豬食得落肚既肉應該所餘無幾...依類會供應比當時既軍隊伙食;

第5類: 依類屬無人吼既蘿底橙，即我地而家稱為"下欄野"既頭頭尾尾 + 內臟! e.g. 頭, 尾, 心, 肺, 腸, 手腳.......等等~ 而依類就係供應比當時既平民嘞!  依類屠宰產品，有部份仲會當做糧金用來出糧比屠宰場既工人!

屠宰場由十九世紀一直運作至1975年正式關閉~ 不過因為依段歷史，深遠影響咗羅馬人既飲食習慣，形成咗依種當地人稱為"Quinto Quarto"內臟料理! (Quinto Quarto 係"Fifth Quarter"既意思~)

依段為食歷史除咗讓我認識"Quinto Quarto"料理既來源之外，仲可以睇得到當時社會階級權力分佈~ 係今次旅程另一個令我留下好深印象既回憶!

 依間就係我地是晚開餐既餐廳 - Da Oio A Casa Mia~

網上旅遊資料好多食過Quinto Quarto 料理既遊客，都係推介Da Oio A Casa Mia!

 餐廳門口貼滿一大堆涵頭，睇來真係好堅喎! 佢地應該無介紹錯~

不過意大利人生活習慣真係好laid back!  我地去到餐廳門口時已經7點幾，見到餐廳裡面著哂燈，但唔見裡面有人 + 門鎖咗!!!

於是我叫老公試吓禁門鐘......好彩有人來應門! 佢地即時比我地入去~

 餐廳裝潢好有傳統意大利feel - 尤其係圓拱形既門口!

 雖然舊時代內臟屬無人吼既下欄野，但時至今日演變出來既Quinto Quarto 料理價錢並唔算平!

 一個頭盆要14 euros~  (幾個euros 既頭盆並唔係內臟! 只係火腿或芝士.....)

我要咗第一個頭盆 - Antipasto alla Romana~ 係一個冷盆來!

分別有脷(唔知咩脷...), 筋(唔知咩筋!!! ) + 一種好似花生既豆類! (好有可能真係花生! 不過餐牌話係beans......)
淋上一種微酸既香草汁，超級好食 + 開胃!!!!!初時我以為塊脷先係主角，但其實果咋好似啫喱既筋先最正! 彈牙有咬頭得來，味道好鮮美~~~

大家會唔會覺得奇怪 - Mr.T唔食內臟果喎! 咁佢食乜呢?

老公既頭盆要咗個Minestra d' Arzilla con Broccoli - 蔬菜魚湯是也! (除咗內臟之外，餐廳都有"正常"食物供應架!! )
睇個湯既顏色......就知道好好好正啦!煲到爛哂既魚肉，加埋蔬菜碎 + 意粉條......一入口果陣魚香充滿整個口腔~~~~

依一小兜魚湯簡直充滿魚既精華!!!! 我唸自家好難煮到依種味道......老公好慷慨分咗大半比我~ 

 頭盆唔平; 主菜當然都唔會平啦!

本來主菜我好想試吓尾二果個"Coratella" - 有心, 肝, 胰臟, 雅枝竹 + 洋蔥~
不過問過佢地 - 係羊既內臟來! 我怕羊騷味太勁.......

所以都係要咗個穩陣又有傳統羅馬菜特色既Trippa alla Romana~

茄汁炆既牛肚，上面灑上大量芝士粉，上菜時已一陣香味攻過來~~~~~  牛肚咁食法真係第一次!

牛肚炆得淋得來又不失口感~ 汁既味道亦好香濃~ 雖然都係好味，但並無我預期中咁好! 可能我唔習慣依種食法?!!? 又或者我仍然留戀之前太好味既頭盆!?!??

 陪食既老公主菜點咗Pollo alla Cacciatora - 地道羅馬式燒雞~

個汁真係無得頂!!!! 用來點麵包真係一流!!!

雖然係雞胸部份，但雞炆得軟滑充滿肉汁! 仲有少少類似中國鹹雞既味道~ 正!!

飯後光顧吓佢地個洗手間，洗手既水喉係腳踏出水果喎! 大鄉理既我覺得好得意~~~~

羅馬人好似習慣幾晏食晚餐......我 + 老公係是晚第一對入座既客人，當時已經7點幾~ 我地一路食野一路不停有客人入門，當我地食完主菜，成間餐廳已經坐滿哂客人!

Da Oio A Casa Mia 地址: Via Galvani, 43/45, Rione Testaccio, Roma

("mai di domenica" = 星期日唔開! )

Testaccio 區日頭非常平靜，並唔係旺區~ 不過一入夜依區會另有一番面貌 - 因為依區而家變咗night life 地區，酒吧、disco 林立，夜晚比日頭人流旺盛!

不過果頭橫街左穿右插，就算日頭都好容易迷路~ 而且夜晚亦無乜街燈，街道一片漆黑......無地圖喺身或單身一個人的話，並唔建議喺果頭亂闖!!!
餐廳咭片上"Vera cucina romana" 係正宗羅馬菜既意思~

依種咁有羅馬地道特色既餐廳，跟旅行團係一定無可能試得到!  個人認為就算唔食內臟，有機會到羅馬既話都應該試一試體驗一下! 意大利並唔止得pizza + pasta 架嘛......

Quinto Quarto 料理對鍾意食內臟既我直頭係正中下懷!  唔同既烹調方法除咗好味之外，仲令我好有新鮮感~ 係今次旅行一個美味難忘既經驗!

除咗美味之外，仲令我對意大利菜有一個新體會 - 地道意大利菜唔似得法國菜咁精緻，並唔太注重presentation (幾乎完全無presentation 可言!! ); 

而且烹調方法粗枝大葉無任何"懶靚"造作既技巧，反而將重點更集中喺食物味道本身，煮出來既菜感覺好hearty! 完全志在好味道 + 大家食得開心~ 意大利人出街食飯氣氛好熱鬧架!
Coratella~ 你要等我呀! 下次我會做好心理準備返來食你架!!!