Pikachu & Raichu

一直養緊2條金魚仔~ 早排其中1條死咗，上個weekend 去咗pet shop 睇吓有無啱心水補返條......結果係無!

不過pet shop 另一角落既兔仔 + 倉鼠，令我唸返起以前養過既2隻可愛倉鼠 - Pikachu + Raichu~

 左邊細細粒 + 鬼鬼鼠鼠既係Pikachu; 而右邊肥嘟嘟 + 矇盛盛既就係Raichu~

心水清or 有養倉鼠經驗既網友，應該會發現 - Pikachu + Raichu 係唔同品種倉鼠!

先講Pikachu......

 Pikachu 係Roborovskis hamster，即俗稱"小露寶"~

"小露寶"屬於迷你倉鼠，而且仲係眾多迷你倉鼠之中，體型最細少既品種!

多年前有一日我決定要養寵物，因為當時仲讀緊書租緊屋住，所以最好養一d唔阻訂 + 易打理既小動物......

寵物店裡面雖然有好多唔同品種既倉鼠，但我即時被一隻體型如一隻鴿蛋大小，眼仔碌碌既小露寶吸引住!

而且當時展示小露寶既籠裡面，只得佢一個孤零零， 一副可憐兮兮既衰樣.....於是我決定要佢，佢就成為咗Pikachu 嘞!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

約一個星期後我覺得得Pikachu 一個好慘.......

於是再去pet shop 想幫佢搵個伴!

但今次pet shop 無小露寶~ 不過我又好心急，於是我揀咗另一品種 (唔知咩種!)既迷你倉鼠，記得果隻個樣好型 - 有一對如紅寶石般既紅眼睛~ 不過.....

當我返到屋企將紅眼睛放入籠裡面，Pikachu 向紅眼睛示好.....突然紅眼睛發癲追住Pikachu 來打!!! 同時仲發出好得人驚既叫聲~~~~

嚇到我即時將紅眼睛退回pet shop......

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

經過紅眼睛一役，我唔敢再貿貿然隨便幫Pikachu 搵新朋友~ 不過我每次去pet shop 買野，都會順便留意吓有無小露寶新貨~ 但果排唔知做乜好鬼耐都無貨?

直至果一日我如常去pet shop 買倉鼠用品.......

依日都係無小露寶! 不過其中一個籠裡面有數隻BB Winter White (小紫王)，而果幾隻BB 裡面，有一隻體型比其他特別細小!

於是我唸: 依隻同Pikachu 差唔多咁細粒，而且個樣又咁鬼傻，睇佢個款應該唔識蝦人~ 可能會work 喎! 最多唔work 時再退返來pet shop 囉......

 就係咁......依隻當日好鬼細粒，個樣又傻既Winter White BB，就成為咗後來肥嘟嘟，但個樣仍然好傻既Raichu 嘞!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

其實我睇過書話 - 唔同品種既倉鼠性格 + 生活習性都唔同，所以唔應該將唔同品種倉鼠養埋一齊!

事實上Pikachu + Raichu 既品性亦非常唔同......

小露寶天生好奇八卦神經質~ 又要八但少少風吹草動就即時怕死亂跑! (有時風無吹草無動，佢都會突然發神經亂跑......)

 而且佢地跑得好快，所以唔可以用正常方法來抱佢! 唯有咁樣來同佢影合照......

Pikachu 又特別曳 + 蠱惑 - 我養咗佢接近2年裡面，佢喺籠裡面偷走出來超過10次!!!

因為佢細粒又跑得快，每次佢偷走出來，我都要反轉間房先捉得返佢!

原來小露寶體型太細小，所以並唔適合用鐵籠來飼養，因為只要佢地搵到一個位成功偷走過一次，佢地會記得既~ 之後次次都會用返同樣方法偷走!!

所以養小露寶一定要用膠箱形倉鼠籠!

Raichu 性格同Pikachu 就完全相反嘞! Raichu 好乖好溫馴 (可能因為佢蠢...); 動作亦無Pikachu 咁快~ (可能因為佢肥 + 鈍......)

Raichu 仲係一個好model - 佢動作無咁快，所以幫佢影相容易好多!

 仲會乖乖比你抱，定定望住鏡頭比你影! (我影相時合埋咗雙眼呀......)

雖然Pikachu + Raichu 完全唔同品種 ，性格特質亦完全相反......不過出乎意料之外佢地非常get on!!!

我仲記得當日帶Raichu 返屋企一放佢入籠，Pikachu 即時走埋去Raichu 度不停索油

，聞勻哂Raichu 全身~ 但Raichu 又唔太抗拒，只係好似有少少頂唔順Pikachu 咁熱情!

由果一日開始......

 佢地一齊食野......

 一齊玩......

 一齊瞓覺......

 甚至一齊發吽逗! so sweet~~~~~~

養咗佢地快2年後突然有一日，我發現Raichu 開始老，身體越來越虛弱......終於一個傍晚佢喺我手心慢慢合上眼去咗彩虹橋; 而3個月後既一日我放學返到屋企，發現Pikachu 去咗同Raichu 會合.......

我當然2次都喪喊啦~~~ 老公為咗安撫我，陪我偷偷地做咗一件可能會比人捉既事 .......2次!

我地2次都買咗食物膠盒，裡面放滿Pikachu + Raichu 鍾意既食物 + 玩具，喺Duck Bay Restaurant 附近既休憩處掘咗2個窿.......將佢地葬埋一齊喺Loch Lomond 湖邊!

 為咗紀念Pikachu + Raichu，有一年我返香港時，用依張佢地最靚既合照，訂造咗依個手挽袋~  (我仲記得影完依張相後，Pikachu 即以高速快閃!!!)

>>>>>>>>>>>>>>>>>>>>>>>>>>>>>>>>>>>>>>>>>>>>>>>

Pikachu + Raichu 之後，我都養過幾次倉鼠，不過硬係覺得唔夠Pikachu + Raichu 可愛，後來慢慢我就意興闌珊唔再養~~~

但weekend 去完pet shop 之後，加上最近喺YouTube 睇到好多屬於人地既可愛寵物......我又開始心思思想再養小動物!