2009年7月13日星期一

二人BBQ@ Millport - 2009年7月12日

早2星期我同朋友們去Millport BBQ,老公未去過Millport,所以其實佢都好想去,可惜果日佢有緊要工事,唔請得假...... 

見星期六好好天,老公又啱啱換咗新公司車......於是我就同老公提議星期日去Millport 再BBQ + 遊新車河!  本來唸過叫埋其他朋友一齊去,不過一來係即興,二來過去幾個weekend 都係一大班人陪太62太99飲茶,好少時間二人世界咁過weekend.....

坐言起行即時去買食物燒烤叉...醃好哂食物搞掂好哂所有野準備星期日一早出發......點知星期六晚突然落好鬼大雨!!! 朋友仲來電話我知 - 天氣預測星期日全日落大雨~~~ 心唸可能去唔成,食物可能要塞哂入焗爐......

不過星期日一早起身,雖然天陰陰,但雨停咗 + 地下係乾喎......即管博一博啦!!! 即時出發~~~~ 渣車去Largs 沿途又開始落微微雨......中途都有唸過 - 不如轉頭返屋企啦! 但老公話去到Largs 睇吓情況點先算.....好彩冇放棄咋!!!!

因為到咗Largs 雨已經完全停哂; 搭船過到Millport 時,天氣開始好轉仲出小太陽呢! 朋友來電問我情況如何 - 佢話Glasgow 落好勁雨啊!! 呵呵呵~~~ 我地真係好lucky!

好鬼肚餓~~~ 第一時間搵地方起爐......

 上次同朋友BBQ既位置已一早比人霸咗,所以要搵過第二處~ 不過依度更好 - 可以完全二人世界!

以為已經準備好哂所有野,不過我地帶去既迷你燒烤爐完全唔掂! 而最主要......我地唔記得買炭精!!!!!
 搞咗成大半個鐘都"透"唔著個爐! 最後要落沙灘搬石頭起爐......仲要燒咗老公gym bag 裡面一件T shirt (Asda 平野~),搞咗一大輪先透得著個爐!!!


 原來老公未試過依種渣住燒烤叉既港式BBQ! 佢以前玩BBQ,係西式食物放喺爐上燒果種......所以佢好興奮一人渣3枝叉~~~~

 睇吓佢幾咁enjoy!

 雖然得我地兩丁友,不過我都準備咗幾多食物......

 有BBQ主角雞翼; 黑椒豬柳 (見屋企有幾舊雞上脾,順手放埋入去醃~) 平時去BBQ都係人地付責醃食物既~ 今次第一次自己醃BBQ食物,估唔到咁好味喎!

仲有大蝦; 鮮露筍; 多春魚; courgette (類似翠玉瓜); 竹筒魚蛋 + 白魚蛋 (搞咗咁耐太肚餓,一開爐就食鬼哂d白魚蛋!)

 鮮露筍 + courgette 用鍚紙包住來燒,熟後加"美極"來食好正架~~~ Thumbs Up



 不過老公最鍾意既都係黑椒豬柳!

 我要飲茶,所以帶埋大壺綠茶!

 我享用緊食物時,就用"懶人燒烤法" - 用石頭頂住燒叉繼續燒其他食物~~ (咁辛苦先"透"得著個爐,緊要爭取時間啦!!!)

只食剩幾隻雞翼,其他食物清哂~~ 上次同朋友來冇機會周圍睇吓成個島......今次飲飽食醉 + 清理現場後,就起程遊車河環島一周!

 由我地到咗Millport 一直冇落過雨,而且天氣越來越好!

 Millport 真係一個幾細既島~ 環島全程只係15miles! 我先前以為Millport 係一個冇人住既島嶼,不過原來喺我地燒烤地方既另一邊係有民居既~~~~

 突然遠處見樹叢有個頭!

 即時落車望清楚,個樣其實幾creepy.......

玩足一日好鬼攰~~~ 好感謝天公造美,令我 + 老公有愉快既一天! 老公已愛上BBQ~ 唔知依個夏天仲有冇機會BBQ呢???



 

沒有留言:

發佈留言

Related Posts Plugin for WordPress, Blogger...