2009年5月31日星期日

白白滑滑杏仁糊


最近天氣越來越熱,今個weekend 仲熱到痴哂肺!!!

除咗搞到我冇胃口食正餐之外,仲令我口味變到好怪異......繼上個weekend 食雪糕; 今個weekend 我竟然發神經想食杏仁糊!!! 當然係少甜果隻啦~~~~


1. 南杏仁150克; 北杏仁20克; 白米1/2杯; 冰糖140克~ (冰糖份量可隨自己口味增減!)

2. 南杏仁、 北杏仁和白米洗淨後,用清水浸約2小時後隔水備用。

 南杏仁宜選用較大粒的"龍皇杏"~ 杏仁香味較濃!

3. 南杏仁和北杏仁加入4杯水(1000毫升),用攪拌機打成杏仁漿; 白米加1/2杯水(125毫 升)打成米漿~


4. 將杏仁漿倒入煲內,加入冰糖和1杯水(250毫升)煮滾,加入適量米漿煮滾拌勻至稠。

5. 用筲簊隔去渣至幼滑即成。





13 則留言:

  1. 胃口變, 會唔會有喜................事呢!!!!!
    [版主回覆06/01/2009 17:21:00] 其實我打依篇野時都估到我話"口味變咗",會有人以為我有咗~  我忘記咗打多句......"唔係"!
     
     

    回覆刪除
  2. 我想學整合桃糊呀, 你識唔識整呀, 教我呀
    [版主回覆06/01/2009 17:19:00]sorry 啊~ 依個我冇打算整,因為我唔鍾意合桃......  不過我搵食譜時八卦睇過吓合桃露既食譜,大至上同杏仁糊差唔多,不過合桃要先白鑊焙香先加水打成漿~ 之後都係加米漿 + 冰糖煲滾囉~
     
     

    回覆刪除
  3.  妳真係好心機,妳老公好幸福呀﹗
    [版主回覆06/01/2009 17:13:00]哈哈~~~ 多謝!  不過杏仁糊得我一個食架咋! 我老公除咗馬拉糕之外,其他中式甜品全部都唔鍾意~~~
     
     

    回覆刪除
  4. Mee ...... MeeMoreMore2009年6月1日 上午2:00

    你果然係勁 .... 勁食 ....... 碗杏仁糊成盤上ar ~~~~~~~ 
    [版主回覆06/01/2009 17:12:00]哈哈~~~~ 唔係呀,係個矮身碗來架! 唔係好大隻架咋,尋日新買新屎坑即用......我zoom 得近妳咪以為係盤囉! (又幾似喎! 呵呵~~~ )
     
     

    回覆刪除
  5. 我好鍾意食呢個的^^
    [版主回覆06/01/2009 20:29:00]其實一向我對甜品都麻麻地~ 不過杏仁糊、椰汁西米露 +綠豆沙,依3樣係我比較鍾意既甜品!
     
     

    回覆刪除
  6. 你真係有心機自己整杏仁糊,我好懶都係沖杏仁相飲
    其實唔係個個都鍾意杏仁既味道,但我知養顏所以會飲
     
    [版主回覆06/02/2009 02:33:00]杏仁糊、西米露 + 綠豆沙係我少有比較鍾食既甜品~ 而我好鍾意杏仁既香味!  
     
    記得以前旺角街市有個推車仔糖水阿伯,佢果d杏仁糊真係好正!!!  我陪V媽媽去果度買餸,就算大熱天我都一定要飲一碗! (係熱架~) 我以前都試過買杏仁霜,不過我覺得陣味好假.......
     
     

    回覆刪除
  7. thx呀, 等我有機會都整下先得
    [版主回覆06/02/2009 17:47:00]唔洗客氣~ 祝妳成功啦!
     
     

    回覆刪除
  8. 你唔講真係唔知原來杏仁糊係用南北杏做架!
    我好唔鐘意食杏仁糊架, 記得讀幼稚園時, 成日飯後糖水係杏仁糊, 我食極都食唔到, 老師話唔食曬佢唔盡出去公園玩, 但真係太難食, 我就自己坐咗係到對住碗杏仁糊無得出去玩喇, 有次有個女同學偷偷地想幫我食咗佢, 點知俾miss發現, 唔俾佢幫我食, 仲攪到要見家長, 亞媽話老師以為我反叛所以唔肯食杏仁糊, 啲老師都無腦, 唔鐘意食就唔鐘意食架啦, 又以為人地反叛, 之後我亞媽同老師講我係好唔鐘意食, 至此我就唔洗再食杏仁糊喇!
    [版主回覆06/02/2009 18:07:00]我反而幾鍾意食杏仁糊喎! 又香滑又養顏~~~    幼稚園果d唔慌係好野啦~ 佢地點會咁好心機自己磨杏仁煲杏仁糊? 十成十係杏仁霜來! 我都好唔鍾意杏仁霜.....
     
    哈哈~~~~ 我幼稚園時都好似妳咁架!!  我最記得茶點時我最憎就係食一條條白色果隻香蕉糕~  於是我唸咗一個方法 - 扮唔小心跌咗條香蕉糕落地!  我仲以為自己好醒咁就唔洗食,點知老師比過另外一條我.......
     
     
     

    回覆刪除
  9. 唔知點解, 我由到大食 杏仁糖 or 杏仁糊 我都想 , 但我食杏仁嘅果仁又唔會抗拒架喎, 我都覺得自己好奇怪
    [版主回覆06/03/2009 17:05:00]妳講果種係大杏仁,同南、北杏唔同架! 大杏仁只用來做西式食品e.g. 蛋糕or 沙律~~~
     
    可能妳唔鍾意陣味啩?? 不過我覺得好香!  但杏仁糖我都唔食~ 有一隻叫做Amaretto 既法國杏仁餅,多數用來伴茶 + 做糕點,我都好鍾意食! 好香好好味~~~
     
     

    回覆刪除
  10. 印象中你好少係BLOG到有糖水架喎....你都吾中意食糖水既....杏仁糊我又係好中意...正...
    [版主回覆06/06/2009 19:32:00]哈哈~~~~ 唔係"少有",係直頭未試過! 完全"處女登場"呀~~~  
     
    我唔係唔鍾意食糖水,而係唔鍾意大部份甜味既食物! 不過有時唔太甜既少少我都會鍾意架~
     
     
     

    回覆刪除
  11. 妳有冇D方法可以將D冰糖整細舊D呀?我買到D好大舊既,用hammer 整到碎鬼晒!
    [版主回覆07/31/2010 18:02:00]我先用三文治袋入住冰糖,再用厚布包住,用菜刀刀背剁幾下就整到細塊架嘞!
     
     

    回覆刪除
  12. Thanks 師傅,好掂呀。
    [版主回覆08/01/2010 20:35:00]掂就好嘞!
     
     

    回覆刪除

Related Posts Plugin for WordPress, Blogger...