2009年4月17日星期五

V媽媽靚正餸2009 - 3月21日



菜乾湯; 鹹酸菜炒卥水豬腸; 蜆介鯪魚餅; 清蒸鮑魚仔; 豆醬蒸獅頭魚 & 蒸梅香鹹魚頭

 是晚有我既至愛 - 生猛鮑魚仔!


 其實我好鍾意食鮑魚仔裡面黑忟忟既腸......不過V媽媽唔比我食~ 今次仲醒到蒸前切走哂所有腸臟!!!


 好鬼靚靚金光閃閃既新鮮獅頭魚~ 依5條獅頭魚好鬼貴 - 要60幾蚊啊!!!!!!


 用豆醬蒸十分惹味!


 真係任何角度睇都令我流哂口水! 淨係望住張相都可以送飯~~~~


以前細個成日食獅頭魚,不過而家越來越少見 + 越來越貴!

 工作繁忙既V媽媽,緊係冇你咁好氣買新鮮豬腸返來慢慢卥啦~~~ 買現成卥水豬大腸返來炒,快靚正!

 V媽媽係用依隻泰國出產既鹹酸菜~ 炒出來脆卜卜! 秘訣係先沖水去除多餘鹹味,炒時加多少少糖~~~

 蜆介鯪魚餅其實並冇咩秘訣~ 因為重點係要有正既蜆介~ 不過鯪魚肉一定要搞至起膠,煎出來既鯪魚餅先彈牙有口感架!

 屋企附近啱啱開咗間華潤生活超市,同V媽媽八卦去及及,竟然有意外驚喜 - 5蚊雞一個大大靚靚梅香鹹魚頭! 喺個盒裡面包住都香氣撲鼻~~~ 未返到屋企已經流哂口水!

 洗淨鹹魚頭斬件,加薑蓉 + 油撈勻去蒸......

 淨係依味已經可以食兩大碗白飯嘞!!!!!!!





11 則留言:

  1. 個鹹魚係咪雪藏架? 我真係未見過喎.我見到碟鹹酸菜炒卥水豬腸真係 "嘩"咗出聲添, 睇見都咁嘅反應, 比我食到真係唔得了.正!正!正!
    [版主回覆04/17/2009 17:48:00]個鹹魚唔係雪藏架~ 同包裝咗既雞、肉、菜一齊放喺普通雪櫃,不過唔係成日有!
     
    依隻泰國鹹酸菜,用來炒野好正~~~~
     
     

    回覆刪除
  2. 睇左 v 媽媽 廚房咁多日, 我發現我樣樣餸 都鐘意食呀 ^^ 我諗我同你都係like 食 海鮮 同埋濃味 少少既野 ^^
    你媽媽 煮餸 係味好快手的 ? 日日都有咁多味 餸^^
    我都係住係旺角個頭, 但係我覺得花園街街市 d 野 又貴 又少choice, 不過都無法子^^
    [版主回覆04/17/2009 18:15:00]濃味就講唔上,不過我真係好鍾意食海鮮! 魚呀、貝類、甲殼類...總之係海鮮都啱!
     
    V媽媽好鬼犀利~ 佢煮餸真係好快! 預備餸菜又快...煮完野廚房仲好企理喎!!!!! 我有佢一成都好咯......
     
    原來妳住旺角果頭,唔怪之妳話喺新世紀撞見過我啦! V媽媽買少野 / 買蔬菜 / 懶時先會去花園街街市; 平時多數行遠少少去朗豪坊附近果個大街市買餸架! (唔知果個叫乜街市?) 果度買魚買海鮮就最正! 我好鍾意行果個街市,因為好多野睇好多野賣,而且V媽媽話果度d野平d~~~
     

    回覆刪除
  3. 你一家人都幾好嘢,三個人都可以吃咁多嘢,不過你媽媽真係好好嘢.又要工作又要同你周圍去食,又要煮.
    [版主回覆04/17/2009 18:53:00]V媽媽真係好勁! 我唔洗返工都冇佢咁勤力煮飯...... 不過佢話近年佢地開始食少d健康d~ 係 我返香港佢先煮咁多野陪我食架咋!
     
     

    回覆刪除
  4. 我又係好鍾意食鮑魚內臟,仲有帶子,東風螺果d都好正,不過我老公唔比我食,見我食就比佢鬧架喇, 佢都唔識食既~~
    個咸魚頭好正呀,都唔識原來可以咁蒸佢添,下次d咸魚頭唔洗"side"哂喇,
    [版主回覆04/18/2009 00:51:00]哈哈~~~~ 冇錯! 帶子紅色果舊野; 東風螺裡面漩渦果條尾......全部都好正! 食得唔好嘥嘛~~~~
     
    唔係種種鹹魚頭咁整都好味架,一定要係大個既梅香膠魚頭先得架! 依個頭好鬼勁,斬埋有一大碟~~~
     
     

    回覆刪除
  5. 口水流到一地lu~~~ 點解我住個度無咁多平lan正既食物?!
    頭先突然靈機一動, 轉safari去睇個演變過程, 竟然得左......  都唔知係internet explorer問題, 定係yahoo...... 我到依家仲未edit到我個blog!!!
    [版主回覆04/18/2009 00:48:00]依餐唔平架! 靚正就係~~~
     
    我點都會覺得係Yahoo 問題囉! 我都係用IE,又唔見我睇第二個網會有問題? 係Yahoo HK先成日有咁多問題! 今朝打緊篇食野blog 加相加來加去,張相都係只係load 得一半,火都來埋!!!!!
     
     

    回覆刪除
  6. 鮮鮑魚仔連殼燉湯是好有益 , 好滋陰的 !
    獅頭魚出名貴架 , 你仲要咁大條 , 我上次買了5條 , $5/両呀 , 都係要$60蚊呀 .....
    [版主回覆04/18/2009 05:28:00]係呀? 不過V媽媽冇試過用鮮鮑仔煲湯~
     
    係囉~ 都唔知點解而家d獅頭魚咁鬼貴? 我唸我細個果陣係完全唔貴既,因為細個時時都有得食!
     
     

    回覆刪除
  7. 講樣野你知,我有時會鬼鬼鼠鼠hou老公唔覺就偷食............d內臟架喇,
    我識有個朋友,佢食東風螺,食尾唔食肉架,佢話d肉唔好食喎,
    [版主回覆04/18/2009 05:38:00]咁V媽媽都淨係唔比我食鮑魚腸啫~ 東風螺果d都可以!
     
    妳朋友好古怪~ 雖然我覺得尾好食,不過我覺得肉同樣好味!
     
     

    回覆刪除
  8. 點解唔比你食腸呢?
    [版主回覆04/19/2009 02:19:00]d腸膽固醇好勁嘛~
     
     

    回覆刪除
  9. 乜獅子頭好好食架, 不過咁細條會唔會好多骨架? 蜆介係咩嚟架?
    [版主回覆04/19/2009 02:22:00]我 + V媽媽都覺得獅子魚好正! 不過好貴 + 好少有得賣~
     
    蜆介係一種用酒浸醃既蜆肉(生既蜆肉!),好香好鮮味! 不過好似蝦醬咁,未必個個人都鍾意架!
     

    回覆刪除
  10. 有鹹魚真係可以食到兩碗飯呢~~
    [版主回覆04/19/2009 02:26:00]一定要梅香喎~~~
     
     

    回覆刪除
  11. 嗚..下次你番香港帶埋我去你到痴餐好嗎?
    我又好想食=___="
    [版主回覆04/22/2009 03:58:00]哈哈~~~~ V媽媽知道妳地咁讚佢實好開心!
     
     

    回覆刪除

Related Posts Plugin for WordPress, Blogger...