一條冷返香港食食食2009 - 立雜零咀
喺香港除咗正餐之外，正餐與正餐之間，我仲會食好多好多立立雜雜野......
Part 1 - 街邊野
好鍾意食台灣夜市裡面既麵線 
，不過而家唔需要去台灣，喺香港都可以食到嘞!
弼街開咗間阿升麵線.....
我要咗個大腸麵線多莞茜 + 加辣! 辣到噴火~~~~ 不過真係好好食!!! 加埋莞茜又好香~~~ 我覺得仲好食過台灣既!
除咗試咗新野麵線之外，當然仲有我既心水例牌街邊美食......
牛雜永遠都係我首選!
食街邊野又點少得"街霸" - 魚肉釀乜乜呢? 個人心水係尖椒、茄子 + 紅腸~ 至於豆腐卜只係掹車邊......
炸豬大腸~ 要落好多辣醬喎!
一食入口已知道粉多過咩既街邊燒賣! 雖然明知唔係真材實料，但唔知點解硬係覺得好好味!!?!?
我屋企附近有一檔推車仔賣烚蛋、炒栗子、炒銀杏，我成日經過都會幫襯~~~
V媽媽成日唔比我食鵪鶉蛋! 所以我要吼V媽媽唔同我一齊時，我先可以偷偷地買 + 偷偷地食!
第一次試炒銀杏(即白果)!
估唔到就咁炒熟既銀杏係咁好食! 不過我覺得都幾貴 - 依幾粒野要$10啊~~~~
Part 2 - 買返屋企慢慢歎......
有日同V媽媽行Sogo 超市，佢地既急凍蜜糖燒火雞脾減價，於是買咗3隻返屋企! 我開咗一隻來做下午茶 - 就咁用刀切肉即食! 不過隻野唔多夠味 
......於是另外2隻比咗人~~~
某日下午茶 - 雜錦壽司 + 三文魚刺身各1盒~ 依餐夾埋都只係$50!
三文魚刺身非常新鮮! 靚到吖~~~
我好鍾意食聖安娜既蛋撻! 整半打返屋企......
再加盒原味卷蛋!
雖然我唔鍾意食甜野，不過其實係有例外既 - 只要原味 / 牛油味，極其量芝士味~ 其他味道就免嘞! 我最愛既首選原味莎莉蛋糕~ 仲有嘉頓小牛蛋 / 芝士味雪芳蛋糕!
由細到大都愛莎莉蛋糕! 我一次過會食2/3盒~~~ 
我細個時好鍾意食依隻真魷味魷魚波波，可以話係童年回憶! 但我而家仍然鍾意食，尤其睇電視時發口痕!
有時我既立雜零食可能係我從未試過既新野，令我好奇買來試試! 不過唔係次次試新野都係好味既......
望落好似幾好味既日本九州燒餅~ 不過味道只係麻麻地......
之前有網友話我知 - 北海道牛奶非常香濃可口~ 不過因為英國冇北海道牛奶賣，所以一直未有機會試! 今次終於有機會嘞~ 好鬼細包，但好鬼貴!
不過味道......真係把鬼呀!!!! 我完全唔覺得香濃可口喎! 我覺得根本同一般維記、牛奶公司既紙包牛奶冇乜分別~ 同英國既Jersey milk 比的話，唔該行埋一邊!!!
嘩~我好耐無掃過街喇,因為香港區無乜地方可以咁樣掃街,係都都要去到旺角
回覆刪除[版主回覆04/28/2009 15:48:00]銅鑼灣咪有一檔囉!
炒銀杏真係未試過...有機會我都想試吓....
回覆刪除岩晒你啦...返黎香港可以食到咁多街邊美食...今次返黎有冇食到牛鞭呀?
[版主回覆04/28/2009 15:50:00]炒銀杏幾好食架! 甘甘地煙煙靱靱咁~~~~
冇食到呀! 老公冇返去，冇人陪我食......本來有網友話陪我食，不過又約唔到時間見面! 唯有等下次囉~~~
唉...見到你d野食, 成日都想食... 雖然我係hk, 不過我好少食e d野。。。 因為我好易腸胃炎。。。 昨晚收工， 同同事去食ｓｕｓｈｉ。。。 今朝一起身就肚痛啦－＿＿－＂
回覆刪除[版主回覆04/28/2009 15:54:00]我返到香港又係好易腸胃炎架!
返10次有7、8次會賴野......
可能香港天氣太熱嘞!
喂~ 妳做迪迪尼要小心啊~~~
豬流感來勢凶凶...妳果度咁多遊客，
要小心啊~~~
我會小心d ga啦...多謝關心^^" 我個到成日見咁多人, 都幾危險... 唯有自己keep好d身體啦^^"
回覆刪除[版主回覆04/28/2009 19:14:00]總之多人既地方就高危啦!
我地依度都有2個人中咗招呀......
祝大家都身體健康呀!
真魷味魷魚波波呀!
回覆刪除[版主回覆04/29/2009 05:03:00]咦~ 魷魚波波妳都啱呀?
街邊燒賣呀!每次見到啲blog友post佢張相我都會流晒口水超想食 我試過有次返香港三個禮拜食咗15串!!!
回覆刪除[版主回覆04/29/2009 15:38:00]3星期15串......即妳平均每星期5串，當妳禮拜六、日"休息"......咁即係約1日串! 街邊燒賣咁好食~ 依個數目都好合理!
除咗街邊燒賣之外，我仲好鍾意食7仔叮叮魚肉燒賣架! 同老公一齊返香港時，我地成日半夜出去7仔食宵夜~ 不過 酒樓真果d燒賣我又唔多鍾意喎......
我好鐘意食麵線架, 不過係hk未食過, 由細到大都係亞媽煮俾我食, 因亞媽係福建人, 豬潤瘦肉麵線食極都唔厭。
回覆刪除[版主回覆04/29/2009 15:44:00]原來妳都鍾意食麵線~ 我有部份朋友話似鼻涕...所以唔鍾意食! 咁妳去台灣時咪勁食囉?? 我去台灣時日日都要整碗架!
妳媽媽咁叻識煮麵線架~ 妳咁鍾意食，妳可以叫妳媽媽教妳整!
我覺得香港依間阿升麵線，唔知係咪加咗香港人口味? 還是係台灣正宗呢? 因為我覺得阿升好食過台灣既好多!!
你真係好食得喎, 你就好啦, 食極都咁瘦...
回覆刪除[版主回覆04/29/2009 15:48:00]好多人就咁睇我外表，話完全估唔到我係咁大食! 連我老公初初拍拖時都話 - 如果唔係親眼見過我食野，打死佢都唔信我可以食咁多! 不過老公話我怪~ 佢話我係佢識得唯一一個女人唔食朱古力 + 雪糕!
我都識整豬潤麵線, 好易咋嘛, 醃好啲豬潤瘦肉再加薑一齊煲啲麵線己經好好味, 因為我鐘意食好鬼lam, 所以麵線係咁煲都唔怕, 唔似公仔麵要計時, 我亞媽都話好多人唔鐘意麵線一劈劈。我都知台灣好興食麵線, 不過我未去過台灣, 所以未食過, 由於由細到大都係食屋企整個啲, 所以好想試下街外整會唔會仲好食。
回覆刪除我又係好大食架, 我鐘意同啲一樣大食嘅人去食野, 叫到成枱都係就最開心喇, 唔好見我宜家咁鬼肥, 其實我未生bb時都ok瘦架!
[版主回覆04/30/2009 19:01:00]照妳講法咁睇，妳整既麵線應該同台灣麵線做法好唔同~ 台灣麵線口感類似碗仔翅架! 阿升係台灣麵線來，味道正宗~ 所以唔會似妳做果種! 要妳試過先知鍾意鍾意嘞!
不過妳既麵線做法都幾吸引，但我會改為用瀨粉或米線!
我成日在阿升麵線門口搭車返屋企架 .... 不過這店我未試過 , 下次試下先 !
回覆刪除[版主回覆05/03/2009 08:10:00]我知去黃埔喺果度搭車! 妳搵次試吓阿升吖~ 如果妳食得辣的話，記得要辣喎!
魚肉燒賣我都好鍾意食架！
回覆刪除[版主回覆05/05/2009 04:16:00]哈哈~~~~~ 其實邊鬼係魚肉來吖! 粉 + 味精就真~~~ 不過我覺得越cheap 越好味!