再見V麻麻~ (2009年3月7日)

剛剛收到V媽媽電話，V麻麻喺香港時間今朝9.18am走咗嘞......

其實由年初五開始，V麻麻因為感染咗金黃葡萄球菌 + 大腸杆菌入院至今~ 大家應該知道金黃葡萄球菌抗藥性好強，醫生用咗好幾隻唔同既抗生素，都未能令控制到V麻麻病情。V麻麻入院以來完全食唔到固體食物，只靠插喉注入流質食物~ 其實上星期V麻麻情況曾經一度好轉，不過畢竟佢已經87歲......而家唸返起，其實應該係迴光返照吧?

近2星期，V媽媽幾乎每日都打電話比我同我講V麻麻既情況~ V媽媽亦同我講，醫生曾經叫過佢地要做好心理準備，所以心理上我一早已prepare 好! (屋企大掃除唔得閒煮飯其實只係籍口! 執屋只為分散吓自己注意力，所以越執越亂......)

其實我對V麻麻感覺幾陌生~ 因為我未來英國前，V爺爺 + V麻麻一直長住英國，一年只見得一兩次; 到後來我來咗英國後，佢地反而返咗香港定居; 而最主要既係 - V麻麻完全唔識講廣東話，只講客家~ 不過我唔識客家，每次同V麻麻傾計，都只可以靠V爺爺or V爸爸"翻譯"......

我以為自己會好平靜地接受消息，但同V媽媽通電話收線後，眼淚不受控制地流! 連自己都覺得意外......係咪真係血濃於水? 雖然感覺上同V麻麻唔熟絡，不過從小到大，V爸爸都話我知 - V麻麻最鍚既係我! 因為V麻麻雖然係傳統客家人，但連埋V爸爸只有4兄弟，V麻麻一直都好恨女，而我係屋企第一個女孫~

唔知點去形容依一刻既感覺? 不過唸起好多往事.....

我細個時唔鍾意食飯，鍾意食出前一丁~ 每次V爺爺 + V麻麻返香港，我地去探佢地時食飯，V麻麻見我唔想食飯就會話: 阿妹~ 唔鍾意食飯唔好食嘞~ 煮公仔麵比妳食好唔好? 要咩味?? (依個時候V媽媽通常唔會出聲，會等到返屋企先鬧我......);

V爺爺 + V麻麻住圍村，好鬼多狗! 好細個時我試過喺屋前花園比唐狗圍，我跑返入屋就係V麻麻救咗我~ 從此每次我返去圍村探V爺爺 + V麻麻，V麻麻都會攞定碌棍企定喺村口等我地!

人總係貪心既~ 上星期收到V媽媽電話叫我要有心理準備，我就安慰自己: 起碼V麻麻睇得到我出嫁! 到V麻麻情況一度好轉，我就希望佢可以睇得到我生BB......

大家唔洗擔心我~ 我冇事! 等老公瞓醒會幫我book 機票，廚房將會關門一陣子~ 不過返香港前我會煮多幾餐，因為已買哂餸唔想浪費~ 反正點都要食飯......