2009年2月22日星期日

欲罷不能孖人牌

上2星期買咗第一把孖人牌,唔係好捨得乜都用佢來切,所以只用來切肉! (我都知我係好鬼sad......)

果晚滾豬膶湯用來片豬膶...哇~~~ 從未試過豬膶可以片到咁薄!!!!! 孖人牌果然名不虛傳~ V女廚房寶劍之位非佢莫屬!!

不過咁就弊嘞!!  因為當我愛上咗一樣野,我就會瘋狂地不停想擁有越來越多! e.g. 金銀珠寶...手袋......鞋.........慾望無窮無盡~~~

今日去到shop,老公見我一副望住孖人牌既發青光 + 流口水樣
......就話任我揀!!!

既然老公咁慷慨,我亦識做地冷靜下來控制吓自己 - 因為唔係全部有得減!

磨爛蓆 + 驗屍咁驗咁搞咗一輪......

 終於選咗依5位佳麗入宮!

 其實我只想要圓頭果把! 不過冇得單買,要買哂一set~

 屋企只有一把麵包刀係有鋸齒,切麵包用佢; 切燒牛肉又係佢! 所以揀咗把有鋸齒既來切燒牛肉~~~


 依把同上次果把差唔多,不過細把少少又輕少少,應該會捨得用來切多d野! 哈哈~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>


 早幾日喺shop 攞咗張另一個廚刀品牌既廣告小冊子 - "具良治 Global"~ 返到屋企睇過至知原來係好野來喎!!!

"具良治"故名思義就知係日本野來~ 不過喺歐洲好似好鬼威水喎!


 歷年喺歐洲各地都攞唔少獎! 連孖人牌原產地德國,都曾經選過具良治為最鋒利既刀!!! (咁咪仲巴屎閉過孖人牌!!?!? erm......interesting~~~~)


 除咗巴屎閉,連款都特別多過人!
 

不過我就覺得佢地既刀唔係好靚仔~ 某d款式仲好怪相.....

不過具良治自稱"有無限量資金,去support 佢地鑽研最頂級最專業既廚刀"喎~ 有機會的話,

我都想見識吓具良治有幾頂級 + 專業!!!




22 則留言:

  1. 咁快有新歡!
    [版主回覆02/23/2009 07:29:00]新歡 + 舊愛都有!
     
     

    回覆刪除
  2. 呵呵...都話你忍唔到手1ga啦... 仲有把剪剪好好用ga...我都有... 不過我仲唸緊好唔好買雞骨剪... 其實我唔係好煮雞食...但... 成隻雞真係好難去chop=.="
    [版主回覆02/23/2009 19:13:00]都咁上下架嘞~
    我唔想對原來果幾把日本菜刀太唔公平!
    我上2星期買第一把孖人牌時......
    同時買咗把骨剪 - 不過唔係孖人牌!
    而且我仲未見到孖人牌把剪既芳蹤......
     
     

    回覆刪除
  3. 孖人牌係英國係咪好貴架 ,我係香港都無買過孖人牌,都係是但買把幾把刀用就算喇.....
    [版主回覆02/23/2009 19:15:00]孖人牌邊度都係貴; 而且英國買乜都貴!!!!  我都有街市有售果隻廣東大大把菜刀架!
     
     

    回覆刪除
  4. 還有的是...ceramic knife 都好好用... 可能我太蠢...唔曉點用刀刀... 成日比ceramic knife 界到手手... 因為我好貪心, 成日都想cut到好thin.... =___=" 不過唔知係唔係cut過carrot... 把刀...e+白少少 橙橙地... 冇以前咁白.... ceramic knife--->又係好好用ga...你唸唸^^"
    [版主回覆02/23/2009 19:16:00]早幾年返香港見Sogo 做過示範,
    本來都幾有興趣,
    不過見佢話只可切不可斬,
    所以冇買到!
     
     
     

    回覆刪除
  5. 好以LV咁..令你上癮...好在有供應商...就係你老公啦.....
    [版主回覆02/23/2009 19:18:00]LV個個都會買上癮果喎!
     
    不過廚具就未必個個都好似我咁......
     
     

    回覆刪除
  6. 我屋企都係用孖人牌架,孖人牌嘅好處係鋒利&耐用,大大小小,切菜,切肉,刀叉我都有喇,有時睇準減價又買多幾把看門口,因為正價時真係好貴。
    [版主回覆02/23/2009 19:24:00]我係孖人牌新手~ 因為我買第一把孖人牌之前,已經成日買廚具!  但就算比我成買哂成set 我都未必捨得用~ e.g. 斬骨刀我一定唔會捨得用來斬野......
     
     

    回覆刪除
  7. 嘩...好pro呀...
    [版主回覆02/23/2009 19:25:00]淨係工具pro 冇鬼用架~
    最緊要識得點真正運用!
     

    回覆刪除
  8. 孖人牌呀 我都溜口水呀 , 你平時点擺放佢地架?
    [版主回覆02/23/2009 19:26:00]放佢地喺廚櫃拉櫃筒囉! 我好求其架咋~ 最緊要方便我自己攞來用!
     
     

    回覆刪除
  9. hahaha,好用到要買多幾把,孖人牌果然係名不虛傳喎
    [版主回覆02/23/2009 19:30:00]我尋日本來唸住睇吓過吓眼癮架咋! 不過老公見我個恨樣,話比我任揀! 我即時歡呼~~~
     
     

    回覆刪除
  10. 孖人牌有一款剪骨較剪,你一定要買,買完一定要用。
    我自從有咗把剪骨較剪之後,就唔洗再斬雞時成身都係油,仲要快靚正。
    你點解唔捨得用呀,試下嘛,感受下嘛~~~
    [版主回覆02/23/2009 21:41:00]專用來剪雞鴨既poultry scissors 我已經有一把,不過唔係孖人牌,但都係快靚正!
     
    而家我用來斬雞鴨既係普通廣東菜刀 / 日本斬骨刀~ 兩者都好好用~ 可能我keep 得夠利 + 我夠大力,斬雞鴨都冇問題~~~
     
     
     
     

    回覆刪除
  11. you should storage them in a wooden knife block, better protection to the knifes and also for your own safety, no good to put them all in a drawer

    [版主回覆02/24/2009 16:24:00]yes im thinking about getting one of these~ Thanks!

    回覆刪除
  12. hi V女
    妳講得好啱呀,當有第一把孖人之後就會........
    因為我都係用過一把之後就愛上咗孖人喇
    所以有好多嘢都會用佢嘅
    我依家己經有斬骨刀,菜刀,妳一盒 3 件果set我都有
    另磨刀器又有 ,雖然係貴咗d $299 但真係好好磨
    只需磨一吓己經ok喇,磨一次有排都唔使磨呀
    好似响度蕒廣告咁
    [版主回覆02/24/2009 16:16:00]我唔係淨係買孖人牌買上癮喎!
    我買好多野都係咁果喎~ 哈哈~~~~~
     
    $299咁平????? 依度買是但一樣都唔得......
     
     

    回覆刪除
  13. 呀..唔記得咗tim
    佢有把剪雞鉗架,如果妳成日食雞嘅話
    依隻一定要買,真係好好用架
    [版主回覆02/24/2009 16:11:00]我已經有一把好好 + 專用來剪家禽既poultry scissors,而且我早2星期買第一把孖人牌時,又買咗另一把廚用剪,所以暫時唔會買較剪住!
     
     
     
     

    回覆刪除
  14. 我一直都用開孖人牌, 但自從上年肥佬生日, 佢老細買了一把global刀給他後, 我發覺global是最好用, 最正, 但價錢也比孖人牌貴。有機會你試下global, 你會知佢同孖人牌點唔同。
    [版主回覆02/24/2009 17:09:00]係? Global 貴過孖人牌咩?? 我果日只攞咗廣告小冊子,並冇留意價錢~ 不過我睇討論區,d人話具良治平過孖人牌 + 好用過孖人牌喎!!!?!?! 
     
     
     
     

    回覆刪除
  15. 如第時無工人, 到我煮時, 我都想買番套, 工具好用煮飯都快手又醒神好多...
    [版主回覆02/25/2009 21:55:00]咁就係呀 - 有工人就唔好比佢地用,有個網友話佢地連孖人牌都會用崩......
     
     

    回覆刪除
  16. 我想我這裏近德國, 所孖人牌會平d, 但相反global會貴d。想請問, 我剛剛斬排骨時, 斬斷我把大陸菜刀, 有沒有斬骨刀介紹?  上網看過global的斬骨刀只可以斬細骨, 對我來說, 無用。我要斬豬骨, 因這裏肉檔是不會幫我斬開一塊塊, 謝!  另, 你說得對, 孖人牌始終都是德國平, 你去德都好方便, 是嗎?
    [版主回覆02/25/2009 22:14:00]我仲以為西歐度度價錢應該差唔多呢......唉~ 不過英國乜鬼都貴架嘞!!!!!
     
    我斬豬骨都係用大陸菜刀之喎!
     
     不過係依種全鋼果囉! 應該唔會斬斷啩!?!?!!
     
     另外斬雞骨 + 斬熟咗既野就用依把日本斬刀~
     
     
     
     

    回覆刪除
  17. 我上網有找過孖人牌的斬骨刀, 但我記得在德國時找不到。可能鬼佬唔會斬骨, 所以無賣。我把大陸斬刀骨,  昨天斬排骨時可以中間有一塊鐵飛了出來, "賓"了一個口。我都想像唔到把菜刀會變成咁。你可然有好多刀, 我諗我可以去唐人店看看中或菜刀算了。
    [版主回覆02/25/2009 23:05:00]係啦~ 妳不如去chinatown買返把我依種中國菜刀來斬骨啦! 又平又好用~ 斬崩都唔會心痛嘛!
     
     

    回覆刪除
  18. 你咁多刀, 我諗你應該好多廚具, 其實我好有興趣睇下你個廚房係點樣, 個廚櫃係唔係白色架呢? 我好鐘意大廚房, 仲要有好大個廚櫃, 同雙門大雪櫃, 成部洗衣機咁大嘅焗爐, 廚房正中仲有張超大嘅枱整餸tim...
    [版主回覆02/25/2009 23:15:00]妳想像力幾豐富喎~ 我個廚房其實冇乜特別! 妳估啱咗 - 廚櫃全部白色 (有8個廚櫃 + 4個拉既櫃筒); 洗衣機咁大既焗爐 - 依度個個都係咁大個架啦! 不過我整餸枱係圍廚房2邊,唔係中間既~
     
    我個廚房唔算好大~ 當然比香港廚房大好多啦~ 不過我希望第日有個更大既廚房!
     
     
     
     

    回覆刪除
  19. 啱啱先買完六把孖人牌(including the first one), V女, 你唔可以再買啦
    [版主回覆02/27/2009 00:59:00]係既~ 係既~ 我應該控制吓自己!!!   最多我下次見到具良治時......我拎歪塊面!
     
     

    回覆刪除
  20. 其實我意思係話想我個廚房好似咁...
    [版主回覆02/27/2009 00:57:00]我知~ 不過我又"順便"講吓我個廚房之嘛!
     
     

    回覆刪除
  21. HELLO,請問香港邊度有得買 "具良治" 既刀具?
    我去過上海街同SOGO搵左好耐都搵唔到, 唔通真係要飛日本買?
    [版主回覆03/27/2009 16:48:00]唔好意思~ 我住喺英國既! 我既刀都係喺英國買既,唔係好清楚香港邊度有得賣......
     
    或者妳可以試試大型百貨公司e.g. Sogo~
     
     

    回覆刪除
  22. 具良治,有 買 ?
    [版主回覆10/23/2012 03:25:48]唔係好清楚你問乜野.....
    我住喺英國既,具良治喺John Lewis 有售;
    香港我喺上海街陳枝記見過,其他地方就唔知~

    回覆刪除

Related Posts Plugin for WordPress, Blogger...