又打敗仗...

我真係好討厭好討厭好討厭英國既天氣!!!!!!!!! 著得多又唔係，著得少又唔得......  

星期六(1月17日)一起身，見到陽光普照，雖然超凍，但我見到太陽心情即時靚靚~ 本來同老公約咗朋友一齊去食YO! Sushi，但朋友們臨時有事唔去得~ 不過靚靚天氣 + 靚靚心情，冇損我 + 老公食壽司既興志!

 天氣實在太凍，壽司又係生冷食物...所以今次戰績冇上次咁彪炳 - 得17碟~ 上次食咗20碟......

食完壽司舖頭差唔多收，冇乜地方去就打道回府~ 點知一出Silverburn 門口......

 天呀~~~~ 橫風橫雨，同早幾個鐘完全兩回事!!!!

Silverburn 既停車場係露天既，

 細心既老公見到咁既情況就話: Princess~ 妳門口等我啦，我去渣架車埋來!

老公一枝箭咁冒住大雨跑去攞車......就係咁當晚就賴野 - 發燒呀!

老公好少感冒到會發燒~ 多數都只係鼻塞流鼻水有兩聲咳，不過每次佢感冒，都一定會傳染我!!!!

 而我一感冒，多數都唔會只鼻塞流鼻水兩聲咳咁簡單...多數都會發燒!

星期六晚照顧咗老公成晚，尋日星期日起身老公稍為退咗少少燒，不過仍然有少少興，不過精神幾好，佢又話唔想屈喺張床度，所以出咗去做weekly shopping~

 尋日天氣更差! 落足成日濕雪咁滯~~~~

 越落越勁! 不過雪一落到地面就溶鬼哂......

拿拿淋買完野，返到屋企先放水比老公沖涼 + 煮野比佢食~ 忙完一輪就到我自己食野......點知到我沖完涼，點解周身骨痛 + 有少少戇居居既?

 一量體溫 - 37.5C~ 微微地燒啫，即啪2粒paracetamol，應該禁得住既!

平時依個時候，

 我一定會埋怨老公: 最衰係你啦!!!! 天氣咁凍又懶大隻唔著衫，感冒又唔即時食藥，次次都傳染埋我!!!!!!!

不過今次我冇! 因為(1) 老公自己都未完全退燒; (2) 今次老公係因為我先淋雨病倒，所以我今次反而有d內疚......

因為兩個一齊病，所以尋晚唔夠9pm 就上床覺覺豬! 老公當時已經開始慢慢退燒，不過我就越來越辛苦~~~~  食藥後完全冇好過，周身骨痛到連換睡衣都要老公幫我手!

 喺床上面碌來碌完全瞓唔到，每隔一陣我都量一次體溫: 38.2C, 38.5C, 39C.....越來越燒~ 不過因為食咗paracetamol 未夠4個鐘，所以我唔敢再食藥......

老公雖然病程好轉咗，但始終未完全好返，我成晚典來典去，搞到佢都休息唔到~ 成晚問我有冇事，仲要起身斟水比我飲......(sorry 啊! 本來應該我照顧你架嘛......

)

卒之碌咗4粒鐘，零晨1am 我就再食隻勁d既藥! 今次食完藥瞓得著嘞~

老公已完全退燒，而且佢今朝有meeting，晨咁早要返工; 至於我呢就仲未完全退哂燒，啱啱量過係37.4C，但我仲有精神打blog 就知我仲未死得住啦!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

我身體一向都算健康，好少病痛，有咩損傷傷口都好快癒合~ 唯獨是我由細到大都好易感冒! 直到而家，V婆婆都成日同人講: 佢(即係我)細個時湊佢好麻煩呀! 成日發燒~ 個個月都要睇一次醫生!!!

不過我咁容易感冒，其實自己都要付好大責任! 因為我十幾歲時懶有型，2隻耳仔足足釘咗8個耳窿 - 左耳5個; 右耳3個~

後來睇書先知，耳朵有好多神經穴道連住身體各部份，隨便亂釘耳窿，會破壞依d神經穴道位而影響身體健康! 嚇到我即時除剩1對耳環......不過好可惜，為時已晚!

我而家真係好後悔!!!!

 奉勸各位想扮型仔之前，一定要三思呀!!!!!