2008年12月2日星期二

孖T返香港2008: 上禾坑既景色 (11月18日)


11月18日,我、V爸爸 + 老公一齊返新界探V爺爺 + V嬤嬤~

一向都有少少抗拒返新界~ 因為...

(1) 圍村好多狗! 我試過比5、6隻狗圍住,隻隻對住我"呵~ 呵~ 呵~"咁...嚇到我即時大喊! 只係幾年前既事,我當時以為自己死緊!!! 從此返親去新界,我都要V爸爸打定電話叫V爺爺攞埋碌棍來村口接我地;

(2) 路程遠~ 一來一回已花去幾粒鐘;

(3) 果度與世隔絕! 冇野做亦冇野好食;

(4) V爺爺 + V嬤嬤係客家人,不過V嬤嬤完全唔識講廣東話! 我同佢傾計要靠V爸爸做翻譯.....

基本上我地好少返去,因為早年V爺爺 + V嬤嬤移居英國,近年先返咗香港定居~ 以往返到去,只係坐吓...好少留意周圍環境~~~

 V爺爺 + V嬤嬤屋前有個小花園,有棵好大棵既碌柚樹!

 碌柚又大個生得又密...不過據V爺爺所講 - 依隻碌柚好酸 + 唔好食既! (真係嘥唒....)

 花園側竟然有個瓜棚 - 佛手瓜! 仲有隻爛鬼咗既漏網之魚攤咗喺上面......(原來有時V媽媽話喺新界攞咗d佛手瓜來煲湯係咁來既!!!)

 雖然我怕圍村既唐狗...不過依隻喱埋偷偷望我地既狗仔,我又覺得佢幾可愛 + 可憐! 因為佢面上有好大條明顯既疤痕~ 亦有一隻耳仔豎唔起... 佢一定曾經比人打咗鑊金......

 村口有棵開得好燦爛既洋紫荊...


 仲有一條好清澈+ 水深只及膝既河仔! 我記得好細個時,曾經同V爸爸喺度捉魚仔~


 印象中我好似從未見過真既稻草人! 估唔到今時今日香港仲有人用稻草人......
原來細心留意吓周圍...我一向唔太感興趣既上禾坑係咁靚果喎!!!



9 則留言:

  1. did u press the wrong button??
    [版主回覆12/02/2008 21:44:00]yes! i did~  

    回覆刪除
  2. 真係好靚呀!!
    [版主回覆12/04/2008 18:14:00]靚係幾靚...不過會悶到發癲架!!!!

    回覆刪除
  3. 又真係好似好偏僻咁喎~
    [版主回覆12/04/2008 18:15:00]唔係"好似"....果度真係好偏僻!!!

    回覆刪除
  4. 上禾 坑喺邊架?上水/粉嶺定....?
    [版主回覆12/05/2008 19:56:00]妳全中! 因為係界乎粉嶺 + 上水之間~~~~

    回覆刪除
  5. 上禾坑唔係近沙頭角咩??
    我都係客瓜人,
    [版主回覆12/07/2008 01:38:00]近呀! V嬤嬤咪成日去沙頭角買好靚 + 好大碌既爆沙魚肚囉~~~~ 即係V媽媽煮果d!!!
     
    咁妳識唔識得講客家話???? 我完全唔識聽 + 唔識講......只識講"lock tie 絮" (落大雨); "銀鯪tie" (好叻); "而C 花唔青" (你食咗飯未); "孝壯來" (好返來).....大約係咁多! 仲有一句粗口~~~~

    回覆刪除
  6. V嬤嬤都有禁區紙架???你可能搞錯左,上禾坑係響粉嶺仲要入,唔近上水架,
    我細個果陣,阿嬤又係好鍾意煲魚膘湯,好好食,
    不過阿嬤唔響度喇,而家都只有掛住佢,
    唔知點解細個果陣同阿嬤住,佢同我講客家話,我會講廣東話應佢,唔會講客家話,不過就識聽識講囉,但又唔係好叻咁, 粗口我都好叻,因為我阿爺,叔伯都講,所以都學到唔少, 我阿爺因為一場大病,搞到講唔到野,但有句粗口就講到,佢一忟就好鍾意講"掉蟻挨掉" 正音唔識打,係咁上下,唔知你知唔知係邊句,
    [版主回覆12/07/2008 21:38:00]我唔知V嬤嬤有冇禁區紙喎~ 不過佢次次比V媽媽既魚肚,都係話喺沙頭角買囉! 我知沙頭角要禁區紙先入得,但我一向都冇唸過V嬤嬤有冇禁區紙...e.g. 託人買~~~
     
    我知上禾坑喺粉嶺呀! 所以每次返親去我地都係搭火車去粉嶺,再轉的士返上禾坑~ 有時返出九龍時,V爸爸會喺禾坑村口同我搭小巴去上水火車站,都好近果喎! 所以我先會話又近粉嶺,又近上水......
     
    唔太肯定果句""掉蟻挨掉"係乜.....我識果句係"掉姨me 智beck"!!!

    回覆刪除
  7. 我知你講邊句,
    你老公係咪都係客家人??佢識唔識架??
    你問下佢知唔知??
    [F回覆01/01/1970 08:00:00]F

    回覆刪除
  8. 好人好者,有個咁既花名???
    [版主回覆12/08/2008 22:07:00]我地個個都覺得佢好乞人憎架! 如果唔係都唔會改個咁既花名比佢啦.......

    回覆刪除
  9. 好靚呀..我咁大個囡都未見過稻草人呀..你都起碼有機會見到吖
    [版主回覆12/09/2008 16:39:00]妳唔覺得其實個樣幾恐怖咩??  如果夜晚見到我唸仲嚇驚.......

    回覆刪除

Related Posts Plugin for WordPress, Blogger...