2008年8月28日星期四

韓國 - 自製泡菜 (Kimchi)


1. 預備醃料: 糖、幼鹽、韓國魚露、韓國人蔘粉、韓國辣椒粉、韓國蝦醬~ (我買唔到韓國辣椒粉 + 韓國蝦醬,所以用韓國辣椒醬 + 西式鹹魚醬 - Anchovy Paste 代替! )



2. 預備材料: 紅蘿蔔切幼絲; 蔥和韭菜切成段; 蒜頭、薑和蘋果(或雪梨)磨成茸備用~ (其實材料仲有白蘿蔔絲,不過白蘿蔔太大隻,做泡菜只用好少,所以我冇用!)




 3. 大白菜(紹菜)打棟切半,如仍然太大,可打棟再切半 (如圖)。


 4. 先將切好的大白菜放入粗海鹽水內浸濕即撈起,然後拮開菜葉,在每塊菜葉上灑上粗海鹽,白色厚身部份要灑上較多粗海鹽。


 5. 每塊菜葉均灑上粗鹽後,再將白菜放回鹽水中浸著,若白菜浮起,要用重物壓在上面。浸白菜所需時間為 - 冬天6小時 + 夏天4小時左右~


 6. 將已浸好的白菜撈起,徹底洗去鹽份後,放在筲簊上自然瀝乾至沒有多餘水份滴出為止,此時白菜會變成軟身。


 7.將所有醃料和材料拌成糊狀泡菜料,份量隨自己口味 + 喜好調較。人蔘粉只需要一小匙~


 8. 拮開菜葉,在每塊菜葉上逐葉塗上泡菜料。


 9. 待每塊菜葉都沾有泡菜料後,抽出最長的一塊菜葉(通常係最外面果塊!)........


 10. 將其餘菜葉摺疊起來.......


 11. 用抽出來最長的菜葉綑好,札成一束。


 12. 放在密封食物盒內,置於室溫讓泡菜發酵一晚。隔天泡菜會出大量水份.......


 13. 將泡菜夾起,放在另一密封食物盒內 (不要已出的水份!),放在雪櫃內儲存,二至三天泡菜入味後可食用。
 
P.S. 唔該哂網友samwei 指點 - 我先至唸起可以用Anchovy Paste 來代替韓國蝦醬! 




13 則留言:

  1. 好叻呀 泡菜都會自己整 我想問問 個d蝦醬 大約係乜野味架?同唔同香港d蝦醬架?
    [版主回覆08/28/2008 23:24:00]我尋晚第一次整架咋,所以仲未食得住,仲未知味道係點! 但尋晚整時試過個汁,都幾OK~~~~
    其實我都唔係好知韓國蝦醬係點~ 我喺YouTube 睇過一個韓國女人整,材料大至係咁! 但就冇影清楚韓國蝦醬個樣......不過我做過research,好似係一d好似蝦皮咁細隻既蝦仔,不過係濕既~~~~~
    其實做泡菜好多唔同食譜,有好多只落韓國魚露而冇落韓國蝦醬! 加魚露 + 蝦醬係為咗要令泡菜發酵~ 所以我唸只落其中一樣已經OK!!

    回覆刪除
  2. 你連泡菜都自己整埋呀, 個樣好得喎, 厲害呀  我都好鐘意食kimchi架
    [版主回覆08/28/2008 23:26:00]終於都見妳浦頭!
    多謝讚賞~ 暫時個樣得但未知味道得唔得! 過幾日先知.....
     

    回覆刪除
  3. 好 明天買到樽既 等我都試下先haha~
    [版主回覆08/29/2008 01:35:00]如果買唔到韓國蝦醬,可以試吓去西式超市e.g. CitySuper 買Anchovy Paste~ 西人通常用來整pizza 既; 如果連Anchovy Paste 都搵唔到,其實只用韓國魚露就得架嘞!!

    回覆刪除
  4. hehe, 見你掛住我嘛
    試咗味再post出黎啦, 我想問你係咪用膠既密實盒整架, 我屋企得膠盒咋  不過最大問題係要搵韓國蝦醬喎, 我屋企又冇 Anchovy Paste
    [版主回覆08/29/2008 00:53:00]過兩日開飯時試味~ 到時公怖結果如何!
    總之蓋得實唔好疏氣就得架嘞! 我果隻之類似咁既........

    我整前其實睇過好多唔同做法! 好多食譜都只係用韓國魚露,而冇用韓國蝦醬架~ 只係我咁啱睇到YouTube 個韓國女人用埋蝦醬,所以我先加埋啫! 如果真係買唔到,可以唔用都得架!
    韓國魚露香港應該好易買~ 我喺英國都買到~~~

    回覆刪除
  5. 唔該晒靚女, 我屋企啲盒都係差唔多樣, 等我都試下整先
    [版主回覆08/29/2008 15:30:00]you're welcome!

    回覆刪除
  6. 你真係好有心機呀!食完話過我知好唔好味~
    [版主回覆08/29/2008 15:32:00]其實整泡菜都唔係花好多時間,因為大部份野醃緊時係唔洗理佢既!
    或者星期一晚試啦~ 因為我weekend 多數唔煮飯!

    回覆刪除
  7. 我去韓國旅行時都整過..好好味呀...
    [版主回覆08/29/2008 15:29:00]而家去韓國旅行,真係好興有一part 教人整泡菜~ 不過我估應該係新野來,因為我幾年前去首爾仲未有依個節目~~~

    回覆刪除
  8. 你好掂呀 ! 我同C6勁鍾意食 " KIMCHI"  , 剛星期一去食韓國料理咋 , 見到你整 , 我搬好屋後要向你偷師及請教 !
    [版主回覆08/30/2008 16:15:00]唔好話向我偷師請教...我都係向人地偷師 + 請教人地架咋!
    我都好鍾意食韓國野! 但依度得一間冇其他選擇,仲要上次食到把鬼火!!! 罐頭泡菜又太稔......咪試吓自己整囉~~~

    回覆刪除
  9. 試咗未呀 , 好唔好食呀 , 我都好想整呀 !
    [版主回覆09/24/2008 20:15:00]試咗啦~ 幾好食好爽脆! 不過可能我太重手...有少少太鹹! 但網友都話咗比我知要整多幾次先可以較啱自己口味~ 妳又整啦!
    http://hk.myblog.yahoo.com/veronicams_tsim/article?mid=5309

    回覆刪除
  10. 嘩 ...仲要落韓國人參粉 , 咁未好貴囉 !
    [版主回覆09/24/2008 21:24:00]我做research 時,資料話韓式人整泡菜會加少少人參粉架! 咁我之前去韓國有買落,咁啱有喺度,咪落囉! 少少夠架嘞~ 不過我唸唔用都冇問題.....因為都食唔出味道既!

    回覆刪除
  11. 我抄底哂你的材料啦 , 放了入手袋 , 去開尖咀就去金巴利道那邊的小韓國街買啦 ! THANKS ! 
    [版主回覆09/24/2008 23:21:00]唔洗客氣~
    金巴利道小韓國街易唔易搵架? 我返來時都想去睇吓~

    回覆刪除
  12. 哈哈 ...我今日去了金巴利街 ( 小韓國街)買韓國魚露及辣椒粉 !
    其實這條 金巴利街是近 "加連威老道" 中間 ( EL Beauty )有條小路有街市果度啦 !
    [版主回覆10/20/2008 18:00:00]等我返香港時又去八吓先!
     
    咁妳幾時整泡菜呀? 記得post 出來睇睇喎!!!
     
    P.S. 今晚叫老公幫妳睇酒店!

    回覆刪除
  13. 請問 辣椒粉幾$ ? G  THX^^
    [版主回覆05/12/2011 19:06:00]我唔記得幾錢喎! 不過喺韓國街買一樽樽架~
     
     

    回覆刪除

Related Posts Plugin for WordPress, Blogger...